ສສຊ ແຂວງສະຫວັນນະເຂດ ມີຄຳເຫັນໃສ່ຮ່າງກົດໝາຍວ່າດ້ວຍການຈັດຫາງານ ທີ່ຈຳເປັນຕໍ່ການຂາດວຽກເຮັດວຽກງານທຳ ແລະ ບໍ່ມີລາຍຮັບຂອງແຮງງານ
ວັນທີ 10 ກໍລະກົດ 2023, ທ່ານ ສຸກສະຫວັນ ໄຊສົມບັດ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ມີຄຳເຫັນໃສ່ຮ່າງກົດໝາຍວ່າດ້ວຍການຈັດຫາງານ (ສ້າງໃໝ່) ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ໂດຍຊີ້ໃຫ້ເຫັນວ່າ: ຮ່າງກົດໝາຍວ່າດ້ວຍການຈັດຫາງານແມ່ນມີຄວາມຈຳເປັນຫລາຍ ຖ້າທຽບໃສ່ກັບສະພາບໃນປັດຈຸບັນທີ່ເສດຖະກິດຂອງປະເທດລາວເຮົາ ກຳລັງໄດ້ຮັບຜົນກະທົບຢ່າງໜັກໜ່ວງ, ຊາວຜູ້ອອກແຮງງານທັງຫລາຍ ໄດ້ຂາດວຽກເຮັດວຽກງານທຳ, ບໍ່ມີລາຍຮັບ, ເຊິ່ງກົດໝາຍດັ່ງກ່າວ ຖ້າຮັບຮອງ ແລະ ປະກາດໃຊ້ ຈະເປັນບ່ອນອີງໃຫ້ແກ່ຜູ້ອອກແຮງງານລາວ ສາມາດໄປຊອກວຽກເຮັດຢູ່ພາຍໃນ ແລະ ຕ່າງປະເທດ. ພ້ອມທັງ, ສ້າງຄວາມເຊື່ອໝັ້ນໃຫ້ອົງການຈັດຕັ້ງສາກົນ ຕໍ່ກັບລະບົບການຈັດຫາງານ, ການປົກປ້ອງ ແລະ ສົ່ງເສີມສິດ ແລະ ຜົນປະໂຫຍດ ອັນຊອບທໍາຂອງແຮງງານລາວ.
ຕໍ່ກັບມາດຕາ 16 ການສະຫງວນຮັກສາອາຊີບ, ນອກຈາກຈະເປັນອາຊີບທີ່ຕິດພັນກັບການສົ່ງເສີມ ຮີດຄອງປະເພນີວັດທະນະທຳລາວແລ້ວ ໃນຂະແໜງອື່ນໆ ກໍຢາກໃຫ້ກົດໝາຍສະບັບນີ້ຄວບຄຸມເຊັ່ນດຽວກັນ, ເປັນຕົ້ນແມ່ນຜູ້ປະກອບການຊາວຕ່າງດ້າວ ທີ່ມາດຳເນີນທຸລະກິດຢູ່ ສປປ ລາວ ເຊິ່ງບາງກໍລະນີ ກໍພົບວ່າຍັງບໍ່ຖືກຕ້ອງຕາມກົດລະບຽບກົດໝາຍ ເຊັ່ນໃຫ້ນາຍໜ້າເປັນຜູ້ລົງທະບຽນວິສະຫາກິດ ແຕ່ເຈົ້າຂອງເປັນຄົນຕ່າງປະເທດ ເຮັດໃຫ້ເກີດມີການຈຳກັດແຮງງານລາວ ທີ່ຈະໄປເຮັດວຽກໃນວິສະຫາກິດດັ່ງກ່າວ, ຖ້າຫາກມີການຮັດກຸມ, ມີການຄຸ້ມຄອງຊາວຕ່າງດ້າວທີ່ດີຈະເຮັດໃຫ້ຜູ້ອອກແຮງງານທີ່ເປັນຄົນລາວມີໂອກາດແຂ່ງຂັນໃນການປະກອບອາຊີບ.
ນອກນີ້, ຍັງສະເໜີໃຫ້ເພີ່ມມາດຕາໃດໜຶ່ງທີ່ກ່ຽວກັບການກະກຽມຄວາມພ້ອມໃຫ້ແກ່ຜູ້ອອກແຮງງານລາວກ່ອນໄປເຮັດວຽກຢູ່ຕ່າງປະເທດ ໂດຍຈັດໃຫ້ມີການຝຶກອົບຮົມສີມືແຮງງານ ຫາກບໍ່ກຳນົດໃນໄວ້ໃນກົດໝາຍ ຈະເຮັດໃຫ້ແຮງງານລາວ ໄປເຮັດຕາມມີຕາມເກີດ, ເປັນແຮງງານຂັ້ນຕໍ່າ, ເປັນແຮງງານຕາມລະດູການ.
