ກ້າຕັດສິນໃຈ ກ້າເຮັດ ກ້າທຳ ແລະ ກ້າເສຍສະຫຼະເພື່ອຜົນປະໂຫຍດຂອງປະຊາຊົນຂອງຊາດບ້ານເມືອງຢ່າງບໍລິສຸດແທ້ຈິງ ທຸກບັນຫາທ້າທາຍຈະແກ້ໄຂໄດ້ໂດຍໄວ

ໂດຍ: ຜາຕຸງ

ວາລະດຳເນີກອງປະຊຸມ ສະໄໝສາມັນ ເທື່ອທີ V ຂອງສະພາແຫ່ງຊາດ ຊຸດທີ IX, ວັນທີ 3 ກໍລະກົດ 2023 ທ່ານ ສອນໄຊສີພັນດອນ ນາຍົກລັດຖະມົນຕີ ໃນນາມຫົວໜ້າລັດຖະບານ ໄດ້ຊີ້ແຈງຕອບຄຳຊັກຖາມເຈາະຈີ້ມຂອງສະມາຊິກສະພາແຫ່ງຊາດ ທີ່ໄດ້ປະກອບຄວາມເຫັນຕໍ່ການປະຕິບັດໜ້າທີ່ຂອງຂະແໜງການຕ່າງໆທັງຢູ່ສູນກາງ ແລະ ທ້ອງຖິ່ນ ຕົ້ນຕໍແມ່ນຄຳຖາມເຈາະຈີ້ມທີ່ພົວພັນເຖິງບັນຫາເສດຖະກິດທີ່ຕິດພັນ ແລະ ກະທົບໄວຕໍ່ຊີວິດຄວາມເປັນຢູ່ຂອງປະຊາຊົນ ໂດຍສະເພາະຜູ້ມີລາຍຮັບໜ້ອຍ.

ຕໍ່ຄຳຖາມທີ່ວ່າ:ໃນປັດຈຸບັນ, ລັດຖະບານ ຈະມີກົນໄກ, ວິທີການ ແລະ ມາດຕະການ ຮີບດ່ວນ ໃນການຕ້ານ, ສະກັດກັ້ນ ແລະ ແກ້ໄຂອັດຕາເງິນເຟີ້, ການອ່ອນຄ່າຂອງເງິນກີບ, ການຜັນຜວນຂອງອັດຕາແລກປ່ຽນ, ການເພີ່ມສູງຂຶ້ນຂອງລາຄາສິນຄ້າ ແລະ ຄ່າ ຄອງຊີບຄື ແນວໃດ? ກ່ຽວກັບເລື່ອງນີ້ ທ່ານນາຍົກລັດຖະມົນຕີຢືນຢັນວ່າ: ນີີ້ແມ່ນເປັນບັນຫາທີ່ເຄັ່ງຮ້ອນ ແລະ ຮີບດ່ວນທີ່ສຸດ ທີ່ທົົ່ວລະບົບການເມືອງຂອງພວກເຮົາໄດ້ພ້ອມກັນສຸມໃສ່ແກ້ໄຂ ແລະ ກໍສະເໜີໃຫ້ທົົ່ວສັງຄົມຊ່ວຍສະໜັບສະໜູນ ແລະ ໃຫ້ການຮ່ວມມືໃນການປະຕິບັດ.  ຊຶ່ງລັດຖະບານໄດ້ວາງມາດຕະການແກ້ໄຂອອກເປັນ 3 ໄລຍະ ຄືມາດຕະການສະເພາະໜ້າ ມາດຕະການແກ້ໄຂໄລຍະກາງ ແລະ ໄລຍະຍາວ.

ສໍາລັບມາດຕະການສະເພາະໜ້າ ນັ້ນແມ່ນ ເລັ່ງຄົ້ນຄວ້າແກ້ໄຂບັນຫາໂຄງສ້າງດຸນການຊໍາລະ ລະຫວ່າງປະເທດທີ່ຂາດດຸນໃຫ້ມີຄວາມສົມດຸນເທື່ອລະກ້າວ ໄປຄວບຄູ່ກັບການປະຕິບັດມາດຕະການສະເພາະໜ້າ ເພື່ອຄວບຄຸມຄວາມກົດດັນຂອງອັດຕາແລກປ່ຽນ, ສືບຕໍ່ຫັນການແລກປ່ຽນເງິນຕາເຂົ້າສູ່ລະບົບທະນາຄານ ແລະ ໃຫ້ມີໜ່ວຍບໍລິການພຽງພໍຮັບໃຊ້ ສັງຄົມເຊັ່ນ: ໜ່ວຍບໍລິການແລກປ່ຽນ, ການແລກປ່ຽນເອເລັກໂຕຣນິກ; ປັບປຸງຕະຫຼາດເງິນຕາຕ່າງປະເທດ ລະຫວ່າງທະນາຄານທຸລະກິດດ້ວຍກັນ; ຄຸ້ມຄອງບັນດາບໍລິສັດນໍາເຂົ້າ-ສົົ່ງອອກ ແຈ້ງລົງທະບຽນ ແລະ ຊໍາລະສະສາງການນໍາເຂົ້າ ແລະ ສົົ່ງອອກສິນຄ້າ ຜ່ານບັນຊີທະນາຄານທຸລະກິດທີ່ຕັ້ງຢູູ່ ສປປ ລາວ ໂດຍກໍານົດເຂົ້າເປັນເງື່ອນໄຂທີ່ຂາດບໍ່ໄດ້ສໍາລັບການສົົ່ງ ອອກ-ນໍາເຂົີ້າສິນຄ້າຕໍ່ໄປ ເພື່ອສູ້ຊົນໃຫ້ມີເງິນຕາເຂົ້າມາຜ່ານລະບົບທະນາຄານເພີ່ມຂຶ້ນຫລາຍກວ່າ 50% ຂຶ້ນໄປ, ສືບຕໍ່ຕິດຕາມບັນດາເປົ້າໝາຍທີ່ປັ່ນປ່ວນ ແລະ ເກງກໍາໄລ ຈາກການແລກປ່ຽນເງິນຕາ ດ້ວຍຮູບແບບ ຕ່າງໆຢ່າງໃກ້ຊິດ, ຖ້າພົບເຫັນແມ່ນ ດໍາເນີນມາດຕະການຕາມກົດໝາຍ ແລະ ຮີບຮ້ອນເລັ່ງທວງບັນດາບໍລິສັດທີ່ມີໜີີ້ສິນກັບລັດຖະບານໃຫ້ຫາແຫຼ່ງທຶນມາຊໍາລະຕາມສັນຍາດັດແກ້ທີ່ໄດ້ເຊັນຮ່ວມກັນ ແລະ ກ່ອນກໍານົດໃນສັນຍາເພື່ອຊ່ວຍແກ້ໄຂບັນຫາເຄັ່ງຮ້ອນຂອງລັດຖະບານ.

ນີ້ມັນເປັນພຽງມາດຕະການແກ້ໄຂສະເພາະໜ້າອັນຮີບດ່ວນທີ່ລັດຖະບານພວມໄດ້ຈັດຕັ້ງປະຕິບັດໃຫ້ເປັນຈິງ ເພື່ອປັບປຸງຄຸນນະພາບຊີວິດຄວາມເປັນຢູ່ຂອງປະຊາຊົນໃຫ້ດີຂຶ້ນ,  ສ່ວນມາດຕະການໄລຍະກາງ ແລະ ໄລຍະຍາວ ນັ້ນລັດຖະບານຍັງຈະໄດ້ເລັ່ງ ສືບຕໍ່ດໍາເນີນນະໂຍບາຍເງິນຕາໄປໃນທິດຮັດກຸມ ດ້ວຍການຄວບຄຸມການຂະຫຍາຍຕົວຂອງ ປະລິມານເງິນ, ທັງບໍ່ສ້າງຄວາມກົດດັນຕໍ່ຄວາມຕ້ອງການເງິນຕາຕ່າງປະເທດອັນຈະເຮັດໃຫ້ອັດຕາແລກປ່ຽນອ່ອນຄ່າ, ສືບຕໍ່ກໍານົດນະໂຍບາຍອັດຕາແລກປ່ຽນໃນທິດທາງທີ່ສາມາດເຮັດໃຫ້ທະນາຄານທຸລະກິດກໍານົດອັດຕາແລກປ່ຽນໄດ້ຜ່ອນຜັນຫຼາຍຂຶ້ນ, ເພີ່ມທະວີການຄຸ້ມຄອງເງິນຕາຕ່າງປະເທດເພື່ອສ້າງໃຫ້ມີເງິນຕາຕ່າງປະເທດເຂົ້າມາໃນລະບົບໃຫ້ຫຼາຍຂຶ້ນ.

ບັນດາມາດຕະການລະອຽດ ບາງມາດຕະການ, ຜ່ານມາລັດຖະບານກໍໄດ້ປະຕິບັດແລ້ວ ຈໍານວນໜຶ່ງ ແລະ ປັດຈຸບັນກໍກໍາລັງປະຕິບັດ, ແຕ່ຈະເພີ່ມທະວີຄວາມຮັບຜິດຊອບໃຫ້ສູງຂຶ້ນກວ່າເກົ່າ ໂດຍລັດຖະບານຈະສັງລວມເອົາຄໍາເຫັນທັງໝົດເປັນຕົ້ນແມ່ນບັນດາວຽກທີ່ສະພາແຫ່ງຊາດໄດ້ເນັ້ນໜັກຕື່ມ ໃນ 2 ມະຕິ ກ່ຽວກັບການຮັບຮອງວຽກງານຂອງລັດຖະບານ 6 ເດືອນຕົ້ນປີ ແລະ ແຜນການວຽກງານຈຸດສຸມ 6 ເດືອນທ້າຍປີ 2023 ເພື່ອອອກຄໍາສັ່ງ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ແລະ ຄໍາສັ່ງ ວ່າດ້ວຍມາດຕະການແກ້ໄຂບັນຫາເງິນເຟີ້, ການຄຸ້ມຄອງແລກປ່ຽນເງິນຕາ, ການຄຸ້ມຄອງລາຄາສິນຄ້າ ແລະ ແກ້ໄຂໜີີ້ສິນຕ່າງປະເທດ ດ້ວຍກໍານົດເປັນມາດຕະການຄົບຊຸດທີ່ເປັນລະບົບ ແລະ ມີການແບ່ງຄວາມຮັບຜິດຊອບ ລະອຽດໃນບັນດາຄໍາສັ່ງດັ່ງກ່າວ ເພື່ອເປັນບ່ອນອີງໃນການບັນຊາແກ້ໄຂຕົວຈິງ.

ຢ່າງໃດກໍຕາມການແກ້ໄຂບັນຫາຂອງຊາດທີ່ເກີດຂຶ້ນ ບໍ່ແມ່ນວ່າຈະສາມາດເຮັດໄດ້ໃນເວລາອັນສັ້ນໆບາງຄັ້ງຕ້ອງອາໄສຄວາມສາມັກຄີເປັນປຶກແຜ່ນຈາກຫຼາຍພາກສ່ວນ ອາໄສເວລາອ່າວດົນແດ່ ຍັງອາໄສປັດໄຈຫຼາຍຢ່າງເຂົ້າຊ່ວຍ ຈຶ່ງຈະເຮັດໃຫ້ໃນການແກ້ໄຂບັນຫາລຸລ່ວງໄປດ້ວຍດີ  ແຕ່ທັງໝົດນີ້ຈະປະຕິບັດໄດ້ດີພຽງໃດນັ້ນແມ່ນຂຶ້ນນຳຫຼາຍພາກສ່ວນໃນສັງຄົມໂດຍສະເພາະບັນດາພາກສ່ວນທີ່ກ່ຽວຂ້ອງຕ້ອງຕັດສິນໃຈກ້າເຮັດກ້າທຳ ແລະ ກ້າເສຍສະຫຼະເພື່ອຜົນປະໂຫຍດຂອງປະຊາຊົນຂອງຊາດບ້ານເມືອງຢ່າງບໍລິສຸດ ແລະຈິງໃຈແທ້ໆເພື່ອນຳເອົາຄວາມສົມບູນພູນສຸກມາສູ່ປະຊາຊົນ.