ປະທານສູນກາງແນວລາວສ້າງຊາດ ເນັ້ນໃຫ້ກຳມະບານລາວ ບຸກທະລຸແກ້ໄຂບັນຫາຕ່າງໆໃຫ້ມີຜົນສໍາເລັດ

ໃນໂອກາດເຂົ້າຮ່ວມກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກສູນກາງສະຫະພັນກຳມະບານລາວ ສະໄໝທີ IV ໃນວັນທີ 6 ກໍລະກົດນີ້, ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ (ສນຊ) ໂອ້ລົມຕໍ່ກອງປະຊຸມ ໂດຍເນັ້ນໃຫ້ຄະນະພັກ ແລະ ສະມາຊິກພັກທົ່ວຄະນະບໍລິຫານງານພັກ ສູນກາງສະຫະພັນກຳມະບານລາວ ເອົາໃຈໃສ່ມີສວ່ນຮວ່ມໃນການແກ້ໄຂຄວາມຫຍຸ້ງຍາກ ແລະ ອຸປະສັກທີ່ເກີດຂຶ້ນ, ເຊິ່ງພວກເຮົາບໍ່ມີສິດທໍ້ຖອຍ ແລະ ຕ້ອງກຽມພ້ອມເພື່ອບຸກທະລຸແກ້ໄຂບັນຫາຕ່າງໆໃຫ້ມີຜົນສໍາເລັດຕໍ່ໄປ.

ທ່ານ ສູນກາງແນວລາວສ້າງຊາດ ກ່າວວ່າ: ເພື່ອສືບຕໍ່ນຳພາ-ຊີ້ນຳປະຕິບັດບັນດາວຽກງານ ແລະ ທິດທາງແຜນການທີ່ໄດ້ກຳນົດໄວ້ໃນອີກສອງປີເຄິ່ງໃນຕໍ່ໜ້າໃຫ້ບັນລຸຄາດໝາຍ, ຄວນເອົາໃຈໃສ່ໃນການເພີ່ມທະວີນຳພາ-ຊີ້ນຳວຽກງານໂຄສະນາ, ສຶກສາອົບຮົມການເມືອງ-ແນວຄິດ ແມ່ນໜ້າທີ່ຄວາມຮັບຜິດຊອບອັນຈຳເປັນ ແລະ ຮີບດ່ວນຂອງຄະນະບໍລິຫານງານພັກ ສູນກາງສະຫະພັນກຳມະບານລາວ ຈະຕ້ອງໄດ້ສືບຕໍ່ຈັດຕັ້ງປະຕິບັດວຽກງານໃຫ້ສອດຄ່ອງກັບສະພາບຕົວຈິງໃນໄລຍະໃໝ່, ເສີມຂະຫຍາຍສິດເປັນເຈົ້າຂອງຊົນຊັ້ນກຳມະກອນ ແລະ ຊາວຜູ້ອອກແຮງງານໃນການຈັດຕັ້ງປະຕິບັດແນວທາງແຜນນະໂຍບາຍຂອງພັກ, ລັດຖະທຳມະນູນ, ກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມແຫ່ງຊາດ. ຄົ້ນຄວ້າບັນດານິຕິກຳ, ພາລະບົດບາດ, ຮູບການ, ກົນໄກ, ວິທີການເຄື່ອນໄຫວຂອງກຳມະບານລາວ, ຫັນລົງຮາກຖານປັບປຸງ, ຂະຫຍາຍການຈັດຕັ້ງກຳມະບານແຕ່ລະຂັ້ນໃຫ້ມີຄວາມໜັກແໜ້ນເຂັ້ມແຂງ.

ພ້ອມນີ້, ຕ້ອງເປັນແບບຢ່າງໃນການປະຕິບັດໜ້າທີ່, ເພີ່ມທະວີຄວາມບຸກບືນສູ້ຊົນ, ກ້າຫານ, ສະດຸ້ງໄວ ແລະ ປະດິດສ້າງຫລາຍກວ່າເກົ່າ ເພື່ອແກ້ໄຂບັນຫາ ແລະ ການດຳລົງຊີວິດທີ່ປອດໃສ, ຕ້ານພະຍາດອາດຍາສິດ, ການສໍ້ລາດບັງຫລວງ ແລະ ຫ່າງເຫີນມະຫາຊົນ; ສິ່ງສຳຄັນແມ່ນໃຫ້ປະຕິບັດຕາມເນື້ອໃນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍຕິດພັນກັບວຽກງານວິຊາສະເພາະ, ສືບຕໍ່ຄົ້ນຄວ້າທ່າແຮງທີ່ບົ່ມຊ້ອນຂອງຕົນເພື່ອສ້າງເງື່ອນໄຂພັດທະນາເສດຖະກິດລວມໝູ່ໃຫ້ຖືກຕ້ອງຕາມກົດໝາຍ ສ້າງຖານລາຍຮັບໃຫ້ແກ່ອົງການຈັດຕັ້ງກໍາມະບານ, ອົງການຈັດຕັ້ງມະຫາຊົນໂດຍອີງໃສ່ເງື່ອນໄຂຄວາມອາດສາມາດຕົວຈິງຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ.