ປກສ ນະຄອນຫລວງທຳລາຍລົດຈັກຜິດລະບຽບເປັນຈໍານວນຫລາຍ

ໃນວັນທີ 29 ມີນານີ້, ເຈົ້າໜ້າທີ່ກອງພັນເຄື່ອນທີ່ ປກສ ນະຄອນຫລວງວຽງຈັນໄດ້ນໍາລົດຈັກທີ່ຜິດລະບຽບ ເຊັ່ນ: ດັດແປງສະພາບເປັນລົດແຂ່ງ, ດັດແປງທໍ່ເຮັດໃຫ້ເກີດສຽງດັງ, ບໍ່ມີເອກະສານ ແລະ ອື່ນໆຈໍານວນ 60 ຄັນໄປທຳລາຍຖີ້ມ ເພື່ອບໍ່ໃຫ້ກຸ່ມຄົນທີ່ເຄີຍກະທຳຜິດສາມາດນຳເອົາລົດດັ່ງກ່າວໄປນຳໃຊ້ໃນທາງບໍ່ຖືກຕ້ອງອີກ, ເຊິ່ງລົດຈັກເຫລົ່ານີ້ແມ່ນຢຶດໄດ້ຈາກແກ໋ງກວນເມືອງໃນໄລຍະຜ່ານມາ.

ທ່ານພັນໂທ ຄຳຜິວ ວັດທະນາພອນ ຫົວໜ້າກອງພັນເຄື່ອນທີ່ ໃຫ້ຮູ້ວ່າ: ຜ່ານການປະຕິບັດໜ້າທີ່ຂອງເຈົ້າໜ້າທີ່ພວກເຮົາໃນການລາດຕະເວນກວດກາຄວາມບໍ່ເປັນລະບຽບຮຽບຮ້ອຍໃນສັງຄົມຜ່ານມາເຫັນວ່າ: ພົບຜູ້ລະເມີດກົດລະບຽບຈະລາຈອນ ແລະ ເຄື່ອນໄຫວຜິດລະບຽບກົດໝາຍບ້ານເມືອງຄື: ຂັບຂີ່ໃນສະພາບມືນເມົາ, ຂັບຂີ່ດ້ວຍຄວາມໄວເກີນກຳນົດ ແລະ ຄຶກຄະນອງ, ດັດແປງສະພາບລົດໃຫ້ມີສຽງດັງ, ໃສ່ຢາງນ້ອຍ, ບໍ່ຕິດປ້າຍທະບຽນ, ປ້າຍທະບຽນບໍ່ຖືກຕ້ອງ, ຫລົບຫລີກການກວດກາ, ຖົກຖຽງເຈົ້າໜ້າທີ່ ແລະ ໄດ້ກັກຕົວຜູ້ລະເມີດຈຳນວນ 41 ຄົນ, ຍຶດລົດຈັກໄດ້ຫລາຍກວ່າ 300 ຄັນ, ລົດໃຫຍ່ 8 ຄັນ ນອກຈາກນີ້ຍັງມີເຄື່ອງຂອງກາງທີ່ຜິດກົດໝາຍ ເຊັ່ນ: ຢາບ້າຫລາຍກວ່າໜຶ່ງພັນເມັດ, ຢາໄອສ໌ 8 ຖົງນ້ອຍ, ປືນ 13 ກະບອກ, ລູກປືນຈໍານວນໜຶ່ງ, ໂທ

ລະສັບມືຖື 16 ໜ່ວຍ ແລະ ວັດຖຸອື່ນໆທີ່ເຈົ້າໜ້າທີ່ຢືດໄດ້ຈາກກຸ່ມແກ໋ງກວນເມືອງ ແລະ ໄດ້ເອົາຕົວໄປດໍາເນີນຄະດີຕາມລະບຽບກົດໝາຍແລ້ວ.