ໃນກົດໝາຍແພ່ງ ແລະ ກົດໝາຍອາຍາ ເຍົາວະຊົນອາຍຸຈັກປີທີ່ບໍ່ຖືກໂທດ?

ທ່ານ ຄໍາປະສິດ ເທບວົງສາ ສະມາຊິກສະພາແຫ່ງຊາດເຂດເລືອກຕັ້ງທີ 16 ແຂວງເຊກອງ ໄດ້ປະກອບ ຄໍາເຫັນໃສ່ຮ່າງກົດໝາຍວ່າດ້ວຍເຍົາວະຊົນລາວ ຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 7 ກໍລະກົດ ນີ້, ໂດຍການເປັນປະທານຂອງ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ.

ທ່ານ ຄໍາປະສິດ ເທບວົງສາ ໄດ້ປະກອບຄຳເຫັນຕໍ່ມາດຕາ 2 ໃນການກຳນົດເຍົາວະຊົນທີ່ມີອາຍຸແຕ່ 9 ປີ ບໍ່ເຖິງ 15 ປີ, ສຳລັບເດັກນ້ອຍເຮົາຈະກຳນົດອາຍຸຈັກປີ ຊຶ່ງໃນສອງຄໍາສັບສໍາລັບເດັກນ້ອຍ ແລະ ເຍົາວະຊົນ ເຫັນວ່າມີລັກສະນະສັບສົນກັນ ເພາະຈະມີຜົນສະທ້ອນຕໍ່ກົດໝາຍ ຕໍ່ລະບຽບການຂອງສາກົນ ຊຶ່ງອົງການສະຫະປະຊາດໄດ້ກຳນົດອາຍຸເດັກນ້ອຍແມ່ນ 1 ປີຫາ 14 ປີ. ສຳລັບເຍົາວະຊົນແມ່ນອາຍຸແຕ່ 15 ຫາ 24 ປີ, ສະນັ້ນເຮົາຄວນທົບທວນຄືນວ່າຈະກຳນົດຈັກປີຈຶ່ງເໝາະສົມ ຊຶ່ງສານປະຊາຊົນເຮົາຄວນກຳນົດຈັກປີທີ່ຕ້ອງຖືກຄະດີ ຫຼື ວ່າສິດທິເດັກນ້ອຍຄວນກຳນົດເທົ່າໃດ ?, ສໍາລັບອົງການອຸຍນີເຊັບກຳນົດອາຍຸຕໍ່າກວ່າ 18 ປີ, ໃນກົດໝາຍແພ່ງ ແລະ ກົດໝາຍອາຍາ ເຍົາວະຊົນອາຍຸຈັກປີທີ່ບໍ່ຖືກໂທດໃຊ້ມາດຕາອື່ນໄດ້ບໍ່ ? ຕາມຂ້າພະເຈົ້າເຂົ້າໃຈວ່າອາຍຸ 18 ປີຂຶ້ນໄປ ຈຶ່ງສາມາດດຳເນີນຄະດີໄດ້ໃນ ສປປ ລາວ. ດັ່ງນັ້ນ ຈຶ່ງສະເໜີໃຫ້ພາກສ່ວນກ່ຽວຂ້ອງເບິ່ງຄືນໃໝ່ກ່ຽວກັບມາດຕາດັ່ງກ່າວ, ສ່ວນພາກທີ 3 ໝວດທີ 1 ການປົກປ້ອງເຍົາວະຊົນໃນໝວດດັ່ງກ່າວຢາກໃຫ້ຄະນະຮ່າງກົດ ໝາຍເບິ່ງຄືນໃຫ້ມີມາດຕາໃດໜຶ່ງທີ່ເວົ້າເຖິງດ້ານຄວາມປອດໄພ ແລະ ສຸຂະພາບຈິດຂອງເຍົາວະຊົນ, ເພາະວ່າບັນຫາຕ່າງໆຢູ່ໃນສັງຄົມປັດຈຸບັນບໍ່ວ່າເລື່ອງພະຍາດ ແລະ ເລື່ອງກັ່ນແກ້ງກັນຢູ່ໃນສັງຄົມອອນລາຍເຫັນວ່າມີຫຼາຍ ເຊັ່ນ: ການຂົ່ມຂູ່, ທຳລາຍສິ່ງຂອງເສຍຫາຍ, ໃຊ້ຄຳເວົ້າທຳລາຍຄວາມຮູ້ສຶກ, ການວິພາກ, ວິຈານ, ການໃຊ້ຄວາມຮຸນແຮງໃນຄອບຄົວ ແລະ ອື່ນໆ.