ຂໍ້ຫ້າມ ພະນັກງານ-ລັດຖະກອນ, ພະນັກງານລັດວິສາຫະກິດ ແລະ ມາດຕະການຕໍ່ຜູ້ລະເມີດ ດຳລັດວ່າດ້ວຍການປະຢັດ ແລະ ຕ້ານການຟູມເຟືອຍ

ຂໍ້ຫ້າມ ພະນັກງານ-ລັດຖະກອນ, ພະນັກງານລັດວິສາຫະກິດ ແລະ ມາດຕະການຕໍ່ຜູ້ລະເມີດ ດຳລັດວ່າດ້ວຍການປະຢັດ ແລະ ຕ້ານການຟູມເຟືອຍ

ໃນມາດຕາ 38 ຂອງດຳລັດໄດ້ລະບຸຫ້າມ ພະນັກງານ-ລັດຖະກອນ ແລະ ພະນັກງານລັດວິສາຫະກິດ ມີ ພຶດຕິກໍາ ດັ່ງນີ້:

1. ຫ້າມໃຊ້ຈ່າຍງົບປະມານ, ຊັບສິນ ແລະ ເວລາ ຢ່າງຟູມເຟືອຍໃນການຈັດງານຕ່າງໆ ເປັນຕົ້ນພິທີທາງ ລັດຖະການ, ງານດອງ, ງານລ້ຽງສັງສັນ, ງານບາສີສູ່ຂວັນ, ງານຊາປະນະກິດສົບ ລວມໄປເຖິງງານບຸນປະເພນີຕ່າງໆ;
2. ຫ້າມສວຍໃຊ້ໜ້າທີ່ຕໍາແໜ່ງ, ສົມຮູ້ຮ່ວມຄິດ, ໃຫ້ ຫຼື ຮັບສິນບົນ ເພື່ອຜົນປະໂຫຍດສ່ວນຕົວ ແລະ ເຄືອຍາດຄອບຄົວ.
3. ຫ້າມໃຊ້ສິດເກີນຂອບເຂດ ຊຶ່ງກໍ່ຄວາມເສຍຫາຍໃຫ້ແກ່ຜົນປະໂຫຍດຂອງລັດ, ລວມໄປເຖີ່ງສິດຜົນປະໂຫຍດອັນຊອບທໍາຂອງສັງຄົມ, ປະຊາຊົນບັນດາເຜົ່າ;
4. ຫ້າມປະລະໜ້າທີ່ ແລະ ຄວາມຮັບຜິດຊອບ;
5. ຫ້າມກົດໜ່ວງຖ່ວງດຶງ ແລະ ປອມແປງເອກະສານ ແລະ ໃບບິນ ກ່ຽວກັບການນໍາໃຊ້ງົບປະມານຂອງລັດ ແລະ ລັດວິສາຫະກິດ;
6. ຫ້າມພຶດຕິກໍາອື່ນ ທີ່ເປັນການລະເມີດກົດໝາຍ.

ໃນມາດຕາ 52 ກ່ຽວກັບມາດຕະການຕໍ່ຜູ້ລະເມີດຂໍ້ຫ້າມ ມີດັ່ງນີ້:

1. ອົງການຈັດຕັ້ງ ຫຼື ບຸກຄົນທີ່ລະເມີດນະໂຍບາຍປະຢັດ ແລະ ຕ້ານການຟູມເຟືອຍການໃຊ້ຈ່າຍ ງົບປະມານຂອງລັດ ຈະຖືກດໍາເນີນມາດຕະການທາງດ້ານບໍລິຫານ, ປະຕິບັດວິໄນ ຫຼື ຖືກລົງໂທດ ໂດຍອີງຕາມລັກສະນະ ແລະ ລະດັບຄວາມຜິດ;
2. ຄະນະຮັບຜິດຊອບກວດກາໃດທີ່ຂາດຄວາມຮັບຜິດຊອບ ຕໍ່ໜ້າທີ່ວຽກງານກວດກາການກະທໍາ ຟູມເຟືອຍ ແລະ ມີພຶດຕິກໍາຟູມເຟືອຍ; ບຸກຄົນທີ່ຂັດຂວາງການກວດກາ; ບຸກຄົນທີ່ມີພຶດຕິກໍາເພື່ອຂົ່ມຂູ່ ຜູ້ຮ້ອງຟ້ອງ, ຜູ້ລາຍງານກ່ຽວກັບການກະທໍາຟຸມເຟືອຍຂອງຕົນ ຈະຖືກລົງໂທດ ແລະ ດໍາເນີນຄະດີ ຕາມກົດຫມາຍ ຕາມແຕ່ລະກໍລະນີ ເບົາ ຫຼື ໜັກ.

ດຳລັດວ່າດ້ວຍການປະຢັດ ແລະ ຕ້ານການຟຸມເຟືອຍ ເລກທີ 205/ລບ. ມີຜົນບັງຄັບໃຊ້ກັບພະນັກງານ-ລັດຖະກອນທົ່ວປະເທດນັບແຕ່ 22 ກໍລະກົດ 2022