6 ເດືອນຕົ້ນປີ ອົງການໄອຍະການປະຊາຊົນສູງສຸດ ອອກຄຳສັ່ງຈັບຕົວ 1.610 ສະບັບ ແລະ ອອກຄຳສັ່ງກັກຂັງພາງ 5.483 ສະບັບ
ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ (ອອປສ) ລາຍງານໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງ ຊາດ ຊຸດທີ IX, ເມື່ອ ວັນທີ 5 ກໍລະກົດ 2023 ວ່າ: ໃນໄລຍະ 6 ເດືອນ ຕົ້ນປີ 2023 ນີ້, ອົງການໄອຍະການປະຊາຊົນສູງສຸດ ໄດ້ອອກຄຳສັ່ງຈັບຕົວ 1.600 ກ່ວາສະບັບ, ອອກຄຳສັ່ງກັກຂັງພາງ 5.480 ກວ່າສະບັບ, ກວດຄົ້ນເຄຫະສະຖານ 391 ເລື່ອງ, ຢຶດ ຫລື ອາຍັດຊັບ 12 ເລື່ອງ, ອອກຄຳສັ່ງປ່ອຍຕົວພາງ 400 ກວ່າສະບັບ ແລະ ອອກຄຳສັ່ງປ່ອຍຕົວກ່ອນກຳນົດເກືອບ 180 ສະບັບ.
ນີ້ກໍເພື່ອເຮັດໃຫ້ການນຳໃຊ້ກົດໝາຍ ວ່າດ້ວຍການດຳເນີນຄະດີອາຍາ ແລະ ການດຳເນີນຄະດີຕ່າງໆ ມີປະສິດທິພາບ ແລະ ປະສິດທິຜົນ, ອົງການໄອຍະການປະຊາຊົນສູງສຸດ ຈະໃຊ້ກົນໄກປະສານງານ ລະຫວ່າງ ອົງການໄອຍະການປະຊາຊົນ ແລະ ອົງການສືບສວນ-ສອບສວນ ເປັນເວທີໃນການປຶກສາຫາລື ແກ້ໄຂບັນຫາຕ່າງໆ ທີ່ເປັນຂໍ້ຄົງຄ້າງ, ໂດຍສະເພາະການຄົ້ນຄວ້າ ປຶກສາຫາລືກັນລະອຽດ ແລະ ກຽມຮ່າງປຶ້ມຄູ່ມື ກ່ຽວກັບການຕິດຕາມກວດກາ ແລະ ການນໍາໃຊ້ 7 ມາດຕະການສະກັດກັ້ນຈັບຕົວ, ກັກຕົວ ແລະ ກັກຂັງພາງ ຄາດວ່າຈະໃຫ້ສຳເລັດ ໃນທ້າຍປີ 2023 ນີ້ ແລະ ຈະເລີ່ມເຜີຍແຜ່ໃນຕົ້ນປີ 2024. ພ້ອມທັງຈັດຝຶກອົບຮົມຮ່ວມກັນ ລະຫວ່າງໄອຍະການປະຊາຊົນ ແລະ ອົງການສືບສວນ-ສອບສວນ ເພື່ອສ້າງຄວາມເຂັ້ມແຂງ ແລະ ຄວາມເປັນເອກະພາບ ໃນການຕິດຕາມກວດກາ ແລະ ການນຳໃຊ້ 7 ມາດຕະການສະກັດກັ້ນ ໂດຍໃຫ້ຕິດພັນກັບການປະເມີນຜົນ ການຈັດຕັ້ງປະຕິ ບັດກົດໝາຍ ແລະ ຍັງຈະຕ້ອງໄດ້ປັບປຸງເນື້ອໃນບາງມາດຕາຂອງກົດໝາຍ ວ່າດ້ວຍການດໍາເນີນຄະດີອາຍາ ໂດຍສະເພາະຕ້ອງໄດ້ກຳນົດລະອຽດ ກ່ຽວກັບກົນໄກການປະສານສົມທົບ ແລະ ກົນໄກການລາຍງານ ໃນການນໍາໃຊ້ 7 ມາດຕະການສະກັດກັ້ນ.
ຜ່ານການຈັດຕັ້ງປະຕິບັດວຽກງານຕົວຈິງ ກໍບໍ່ປາສະຈາກໄດ້ດ້ານອ່ອນ-ຂໍ້ຄົງຄ້າງ ເຊິ່ງນັບທັງຢູ່ຂັ້ນຕອນ ຂອງເຈົ້າໜ້າທີ່ສືບສວນ-ສອບສວນ ແລະ ພະນັກງານໄອຍະການ ເປັນຕົ້ນອອກຄຳສັ່ງກັກຂັງພາງໄປແລ້ວ ແຕ່ຂາດການຕິດຕາມກວດກາຄືນ ໂດຍທຳມະດາແລ້ວສັ່ງກັກຂັງພາງຕໍ່ໄດ້ເທື່ອລະ 2 ຫລື 3 ເດືອນ ແລະ ບໍ່ໃຫ້ເກີນ 6 ເດືອນ ຫລື 1 ປີ ຕາມແຕ່ລະສະຖານການກະທໍາຜິດ, ຍ້ອນພວກເຮົາຂາດຄວາມເຂັ້ມງວດ ພາໃຫ້ມີການກັກຂັງເກີນກໍານົດ ເຮັດໃຫ້ສັງຄົມມີຫາງສຽງຈົ່ມວ່າ ຫລື ບາງກໍລະນີ ສັງຄົມມັກຕັ້ງຄຳຖາມ ຫລື ປະເດັນຂຶ້ນຕໍ່ເຈົ້າໜ້າທີ່.
