ສຳມະນາວິຊາການພາຍໃຕ້ຫົວຂໍ້ “ສື່ມວນຊົນລາວໃນຍຸກດີຈີຕອນ”
ກອງປະຊຸມສຳມະນາດ້ານວິຊາການ ພາຍໃຕ້ຫົວຂໍ້ “ສື່ມວນຊົນລາວໃນຍຸກດີຈີຕອນ” ໄດ້ຈັດຂຶ້ນໃນວັນທີ 19 ກັນຍານີ້ ທີ່ນະຄອນຫຼວງວຽງຈັນ ໂດຍສະມາຄົມນັກຂ່າວແຫ່ງ ສປປ ລາວ ພາຍໃຕ້ການເປັນປະທານຂອງທ່ານ ສະຫວັນຄອນ ຣາຊະມົນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານສະມາຄົມນັກຂ່າວແຫ່ງ ສປປ ລາວ ແລະ ມີຜູ້ຕາງໜ້າຈາກສື່ຕ່າງໆໃນຂອບເຂດທົ່ວປະເທດເຂົ້າຮ່ວມ.
ກອງປະຊຸມຄັ້ງນີ້ຈະໄດ້ຮ່ວມກັນປຶກສາຫາລືຍຸດທະສາດຕ່າງໆ ເພື່ອວາງແຜນພັດທະນາສື່ມວນຊົນລາວຈາກລະບົບອານາລອກກ້າວສູ່ຍຸກດີຈີຕອນໃຫ້ມີປະສິດທິຜົນ ເຊິ່ງບົດກ່າວເປີດກອງປະຊຸມຂອງທ່ານປະທານສະມາຄົມນັກຂ່າວ ກໍໄດ້ຍົກໃຫ້ເຫັນເຖິງຄວາມໝາຍສຳຄັນຂອງການພັດທະນາສື່ດັ່ງກ່າວ ເຊິ່ງມັນມີທັງຄວາມສະດວກ ແລະ ສິ່ງທ້າທາຍຕ່າງໆ ເພາະປັດຈຸບັນ ໂລກເຮົາໄດ້ກ້າວສູ່ຍຸກລະບົບເສດຖະກິດ-ສັງຄົມດີຈີຕອນ ແລະ ເຕັກໂນໂລຊີດີຈີຕອນ. ນີ້ບໍ່ເປັນພຽງເຄື່ອງມືຢູ່ໃນແຕ່ຫ້ອງການເທົ່ານັ້ນ ມັນຍັງຈະເຊື່ອມສານເຂົ້າກັບຊີວິດຂອງມະນຸດເຮົາຢ່າງແທ້ຈິງ ແລະ ຈະຫັນປ່ຽນທຸກຮູບແບບການເຄື່ອນໄຫວຕ່າງໆຂອງສັງຄົມ ແລະ ສະເພາະ ສປປ ລາວເຮົາ, ລະບົບເຕັກໂນໂລຊີດີຈີຕອນກໍໄດ້ເຂົ້າມາມີບົດບາດໃນການພັດທະນາເສດຖະກິດ-ສັງຄົມ ແລະ ວຽກງານຖະແຫຼງຂ່າວ ແລະ ສື່ມວນຊົນກໍມີການພັດທະນາເຕີບໃຫຍ່ຂະຫຍາຍຕົວ ແລະ ເພື່ອສາມາດກະຈາຍຂໍ້ມູນຂ່າວສານໄດ້ຢ່າງກວ້າງຂວາງ ແລະ ເລິກເຊິ່ງ ພວກເຮົາກໍຈະຕ້ອງໄດ້ຫັນປ່ຽນໄປສູ່ລະບົບດີຈີຕອນເຊັ່ນກັນ ແລະ ໂດຍການປະຕິບັດຕາມແຜນການຂອງບັນດາປະເທດອາຊຽນໃນການຫັນປ່ຽນລະບົບເຕັກນິກການກະຈາຍວິທະຍຸ ແລະ ໂທລະພາບຈາກອານາລອກໄປສູ່ດີຈີຕອນໃຫ້ສຳເລັດໂດຍພື້ນຖານໃນປີ 2015 ແລະ ໃຫ້ສຳເລັດ 100% ໃນປີ 2020, ລາວເຮົາກໍໄດ້ຮັບຮອງເອົາແຜນດັ່ງກ່າວຕາມມາດຕະຖານ DTMB ຂອງ ສປ ຈີນ, ແຕ່ພວກເຮົາກໍຍັງມີສິ່ງທ້າທາຍຫຼາຍຢ່າງ ໂດຍສະເພາະພາຫະນະ ແລະ ຜະລິດຕະພັນສື່ມວນຊົນມີສະພາບຄວາມຫຼຸດໂຕນກັນຫຼາຍ ນັບທັງດ້ານປະລິມານ ແລະ ຄຸນນະພາບ ຖ້າທຽບກັບປະເທດຕ່າງໆໃນອາຊຽນ. ນີ້ກໍເນື່ອງມາຈາກຄວາມຮັບຮູ້ ແລະ ເຂົ້າໃຈເຕັກໂນໂລຊີດ້ານນີ້ມີຈຳກັດ, ຂາດປັດໃຈຊຸກຍູ້ສົ່ງເສີມ, ຂາດທຶນຮອນເພື່ອປ່ຽນຖ່າຍຈາກເຕັກນິກເດີມໄປສູ່ລະບົບດີຈີຕອນ ແລະ ສິ່ງນີ້ປັດຈຸບັນລັດຖະບານເຮົາກໍກຳລັງຊອກຫາທຶນຮອນ ແລະ ເງື່ອນໄຂຕ່າງໆເພື່ອກ້າວໄປສູ່ລະບົບດີຈີຕອນໃຫ້ໄດ້ ແລະ ເມື່ອເຖິງເວລານັ້ນ ມັນຮຽກຮ້ອງໃຫ້ພວກເຮົາເພີ່ມທະວີການຄຸ້ມຄອງ-ນຳໃຊ້ໃຫ້ເປັນປະໂຫຍດແກ່ສັງຄົມ ແລະ ປະເທດຊາດ.
ໃນກອງປະຊຸມຍັງໄດ້ຮັບຟັງການສັງເກດຕີລາຄາການພັດທະນາ ແລະ ການນຳໃຊ້ລະບົບດີຈີຕອນເຂົ້າໃນວຽກງານສື່ພວກເຮົາໃນປັດຈຸບັນ, ບົດຮຽນການນຳໃຊ້ລະບົບດັ່ງກ່າວຂອງ ສປ ຈີນ ໃນຫຼາຍປະເທດ, ພ້ອມໄດ້ຮັບຟັງບົດຮຽນຂອງການຄຸ້ມຄອງສື່ແບບໃໝ່ໃຫ້ມີປະສິດທິຜົນ ແລະ ຖືກຕ້ອງຕາມລະບຽບກົດໝາຍ ແລະ ການແລກປ່ຽນຄຳຄິດຄຳເຫັນຕ່າງໆຂອງຜູ້ເຂົ້າສຳມະນາ ເພື່ອພວກເຮົາໄດ້ເຂົ້າໃຈ ແລະ ມີທັດສະນະທີ່ຖືກຕ້ອງຕໍ່ການນຳໃຊ້ເຕັກໂນໂລຊີດັ່ງກ່າວເຂົ້າໃນວຽກງານຂອງຕົນ.
