ກອງປະຊຸມສະພາ ເປັນບ່ອນພິຈາລະນາບັນຫາຂອງຊາດ ແລະ ຕົກລົງເອົາມາດຕະການໄປແກ້ໄຂໃຫ້ເກີດດອກອອກຜົນ

ໂດຍ: ທິດກ່ຳ

ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໄດ້ໄຂຂຶ້ນຢ່າງເປັນທາງການມາແຕ່ວັນທີ 26 ມິຖຸນາ 2023 ທີ່ຜ່ານມາ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມບັນດາການນຳພັກ-ລັດ ແລະ ບັນດາສະມາຊິກສະພາແຫ່ງຊາດປະຈຳເຂດເລືອກຕັ້ງໃນທົ່ວປະເທດເຂົ້າຮ່ວມ ແລະ ຈະດຳເນີນໄປຮອດວັນທີ 18 ກໍລະກົດ 2023 ຈຶ່ງຈະໄດ້ສ້ຽງສຸດລົງ,

ໃນວາລະກອງປະຊຸມຄັ້ງນີ້ ນອກຈາກຟັງບົດລາຍງານວຽກງານອັນພົ້ນເດັ່ນ 6 ເດືອນຕົ້ນປີຂອງລັດຖະບານ, ແຜນງົບປະມານແຫ່ງລັດ, ແຜນເງິນຕາຕິດພັນກັບສອງວາລະແຫ່ງຊາດຈາກທ່ານນາຍົກລັກຖະມົນຕີ ສອນໄຊ ສີພັນດອນ ແລ້ວ ຍັງມີບັນດາທ່ານລັດຖະມົນຕີແຕ່ລະກະຊວງກ່ຽວຂ້ອງຂຶ້ນລາຍງານຜົນງານ 6 ເດືອນຕົ້ນປີຂອງຕົນ ທັງໄດ້ຕອບຄຳຊັກຖາມແລະ ຂໍ້ຂ້ອງໃຈ ຂອງຜູ້ແທນສະພາທີ່ມີຕໍ່ລັດຖະບານ ຕໍ່ວຽກງານໃນແຕ່ລະຂົງເຂດ ໂດຍສະເພາະອັນທີ່ພົ້ນເດັ່ນທີ່ສຸດກໍແມ່ນໃນຂົງເຂດເສດຖະກິດ-ການເງິນທີ່ປະເທດເຮົາພວມຜະເຊີນຢ່າງໜັກໜ່ວງໃນປັດຈຸບັນ. ເພາະສະນັ້ນ ຖືໄດ້ວ່າໃນກອງປະຊຸມຄັ້ງນີເມັນເປັນບັ້ນທີ່ສຳຄັນທີ່ສຸດ ເພື່ອບັນລຸເປົ້າໝາຍສູ່ທາງອອກຈາກບັນຫາວິກິດຕ່າງໆຂອງຊາດ ແລະ ຍິ່ງໄປກວ່ານັ້ນ ຖ້າບໍ່ມີການເລັ່ງລັດໃນການແກ້ໄຂກໍຍິ່ງຈະເຮັດໃຫ້ບັນຫາວິກິດຕ່າງໆກາຍເປັນຊຳເຮື້ອເໝືອນດັ່ງຢາເສບຕິດ ແລະ ການສໍ້ລາດບັງຫລວງນັ້ນແລ.

ຢ່າງໃດກໍດີ, ຕາມທິດກ່ຳວ່າ ບັນຫາວິກິດຕ່າງໆທີ່ລັດຖະບານຕ້ອງເລັ່ງແກ້ໄຂໃນປັດຈຸບັນ, ໃນສະເພາະໜ້າແລະຍາວນານນັ້ນ ມັນມີຫລາຍຂົງເຂດ, ຫລາຍໜ້າວຽກ ເປັນຕົ້ນອັນທີ່ເລັ່ງດ່ວນກໍຄືຕ້ອງແກ້ບັນຫາເງິນເຟີ້, ການຄຸ້ມຄອງເງິນຕາໃຫ້ໄປຕາມກົດໝາຍຢ່າງເຂັ້ມງວດ ແລະ ເດັດຂາດ. ການຄຸ້ມຄອງແຮງງານທີ່ຫລັ່ງໄຫລໄປເຮັດວຽກຢູ່ປະເທດໄທ, ບັນຫາການຂຸດຄົ້ນແຮ່ທີ່ຝືນກັບຄວາມຍືນຍົງ ແລະ ຜົນປະໂຫຍດອັນສູງສຸດຂອງຊາດ, ບັນຫາການສໍ້ລາດບັງຫລວງທີ່ຍັງມີລັກສະນະຊຳເຮື້ອ, ບັນຫາຢາເສບຕິດທີ່ຍັງແພ່ລາມແບບບໍ່ຢຸດຢ່ອນ, ບັນຫາການຮົ່ວໄຫລຂອງງົບປະມານທີ່ຍັງອັດບໍ່ຢູ່, ການເກັບລາຍຮັບເຂົ້າງົບປະມານ ນັບທັງການສົ່ງເສີມການຜະລິດໃຫ້ກຸ້ມຕົນເອງ ແລະ ເພື່ອສົ່ງອອກ ແລະ ບັນຫາອື່ນໆທີ່ຍັງຕິດພັນກັບຊາຕາກຳຂອງຊາດ.

ເພາະສະນັ້ນ, ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ຈຶ່ງເປັນກອງປະຊຸມທີ່ມີຄວາມໝາຍສຳຄັນຫຼາຍ ແລະ ເປັນບາດກ້າວເດີນໜຶ່ງທີ່ກຳນົດ ມາດຕະການ ວິທີການທີ່ຖືກທິດ ເຂົ້າແຫກ້ໄຂບັນຫາວິກິດຂອງຊາດບ້ານເມືອງ ໃຫ້ສອດຄ່ອງກັບຄວາມເປັນຈິງຂອງປະເທດທີ່ກຳລັງປະເຊີນຢູ່ ທັງສອດຄ່ອງກັບຄວາມມຸ່ງມາດປາຖະໜາຂອງພົນລະເມືອງລາວບັນດາເຜົ່າ ທີ່ຢາກເຫັນ ບັນຫາວິກິດຂອງຊາດບ້ານເມືອງໄດ້ຮັບການແກ້ໄຂຢ່າງແທ້ຈິງ.