ລາວເລັ່ງຄວບຄຸມການນໍາໃຊ້ສານເຄມີທໍາລາຍຊັ້ນໂອໂຊນໃຫ້ມີປະສິດທິຜົນ
ເຈົ້າໜ້າທີ່ພາສີ ແລະ ໜ່ວຍງານກ່ຽວຂ້ອງຂອງລາວໄດ້ຮັບການຍົກລະດັບຄວາມຮູ້ກ່ຽວກັບການຄວບຄຸມການນຳເຂົ້າ-ສົ່ງອອກສານເຄມີທີ່ທຳລາຍຊັ້ນໂອ ໂຊນໃນວັນທີ 18-19 ກັນຍານີ້ຢູ່ທີ່ສູນປະຊຸມແຫ່ງຊາດ, ນະຄອນຫລວງວຽງຈັນ, ພາຍໃຕ້ແຜນງານແຫ່ງຊາດເພື່ອຫລຸດຜ່ອນ ແລະ ຢຸດຕິການນຳໃຊ້ສານເຄມີທີ່ທຳລາຍຊັ້ນໂອໂຊນຊະນິດ (HCFCs), ໂດຍຜູ້ເຂົ້າຮ່ວມໄດ້ຮັບຮູ້ກ່ຽວກັບອະນຸສັນຍາມົງເຣອານ-ຊັ້ນໂອໂຊນ, ສະພາບອາກາດ ແລະ ພະລັງງານປະຢັດ, ສານເຄມີທີ່ທຳລາຍຊັ້ນໂອໂຊນ, ສານທົດແທນ ແລະ ເຄື່ອງສ້າງຄວາມເຢັນ ແລະ ແອເຢັນ, ພ້ອມທັງການຈັດຕັ້ງປະຕິບັດແຜນງານແຫ່ງຊາດວ່າດ້ວຍການຫລຸດຜ່ອນ ແລະ ຢຸດຕິການນຳໃຊ້ສານ HCFC ແລະ ລະບົບການອອກໃບອະນຸຍາດນຳເຂົ້າ-ສົ່ງອອກສານເຄມີທີ່ທຳລາຍຊັ້ນໂອໂຊນ, ລວມເຖິງການສະກັດກັ້ນການຄ້າທີ່ຜິດກົດໝາຍ ແລະ ບັນຫາອື່ນໆທີ່ກ່ຽວຂ້ອງກັບສານເຄມີທຳລາຍຊັ້ນໂອໂຊນ.
ກົມຄວບຄຸມມົນລະພິດກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ການນຳໃຊ້ສານເຄມີທີ່ທຳລາຍຊັ້ນໂອໂຊນຢູ່ລາວມີ 2 ຊະນິດຄື: ສານເຄມີ CFC-12 ຫລື ສານສ້າງຄວາມເຢັນ R-12 ໂດຍໄດ້ຢຸດຕິການນຳເຂົ້າຕັ້ງແຕ່ປີ 2010 ແລະ ອີກຊະນິດໜຶ່ງແມ່ນ HCFC-22 ຫລື ສານ ເຮັດຄວາມເຢັນ R-22 ຊຶ່ງຖືກນຳໃຊ້ຫລາຍໃນການຕິດຕັ້ງສ້ອມແປງເຄື່ອງເຢັນ (ແອ), ຊຶ່ງເຫັນວ່າມີທ່າອ່ຽງການນໍາເຂົ້າເພີ່ມຂຶ້ນຄື: ຈາກ 39 ໂຕນໃນປີ 2010 ເພີ່ມຂຶ້ນເປັນ 48 ໂຕນໃນປີ 2011. ຕໍ່ບັນຫາດັ່ງກ່າວ, ໃນຖານະທີ່ປະເທດເຮົາເປັນພາຄີອະນຸສັນຍາມົງເຣອານ ກໍຄືການປະຕິບັດພັນທະສາກົນ, ຈຶ່ງໄດ້ມີການຄວບຄຸມເພື່ອຫລຸດຜ່ອນການນຳໃຊ້ສານ HCFCs ໃນຂະແໜງການຕ່າງໆບໍ່ໃຫ້ເກີນປະລິມານທີ່ກຳນົດໄວ້ໃນອະນຸສັນຍາດັ່ງກ່າວນັບແຕ່ປີ 2013-2015 ສາມາດຫລຸດລົງ 10% ຂອງຈໍານວນປີ 2010 ເທົ່າກັບ 36 ໂຕນ ແລະ ຈະໃຫ້ຫລຸດລົງເຫລືອ 35% ຮອດປີ 2020 ແລະ ກ້າວໄປສູ່ການຢຸດຕິນຳເຂົ້າໃຫ້ໄດ້ 100% ຮອດປີ 2040.
