ເຕືອນໄພ! Smart Watch ລະເບີດຄາແຂນ ຈົນໄດ້ຮັບບາດເຈັບສາຫັດ

ສຳນັກຂ່າວຕ່າງປະເທດລາຍງານ: ວັນທີ 3 ກໍລະກົດ 2023, ເກີດເຫດ Smart Watch ລະເບີດຄາແຂນຂອງເດັກນ້ອຍອາຍຸ 10 ປີ ໃນເຂດ ເມືອງນິວໄທເປ ໄຕ້ຫວັນ ຂອງຈີນ, ເຮັດໃຫ້ບາດເຈັບສາຫັດ ມີບາດແຜຢູ່ມືເບື້ອງຂວາ ຖືກໄຟໄໝ້ຮຸນແຮງ ຈົນຕ້ອງໄດ້ປູກຖ່າຍຜິວໜັງໃໝ່.
ໃນວັນເກີດເຫດ, ເດັກນ້ອຍຄົນນີ້ ກຳລັງເດີນທາງໄປໂຮງຮຽນ ໃນຂະນະນັ້ນ Smart Watch ກໍໄດ້ລະເບີດຂຶ້ນຢ່າງບໍ່ທັນໄດ້ຕັ້ງໂຕ, ເຈົ້າຂອງຮ້ານຂາຍເຄື່ອງຢູ່ບໍລິເວນໃກ້ຄຽງເຫັນເຫດການດັ່ງກ່າວ ໄດ້ເຂົ້າໄປຊ່ວຍປະຖົມພະຍາບານເບື້ອງຕົ້ນ, ຈາກນັ້ນຈຶ່ງນຳຕົວໄປໂຮງໝໍໂດຍທັນທີ.
ຢ່າງໃດກໍຕາມເຈົ້າໜ້າທີ່ໄທເປ ໄດ້ເຕືອນປະຊາຊົນວ່າ ໃຫ້ຊື້ຜະລິດຕະພັນ Smart Watch ທີ່ຜ່ານການຮັບຮອງ ແລະ ເຊື່ອຖືໄດ້ ເພື່ອຫລີກລ່ຽງການເກີດອຸບັດເຫດຍ້ອນການລະເບີດຂອງອຸປະກອນ, ເນື່ອງຈາກຄຸນນະພາບຂອງໂມງອັດສະລິຍະອິນເຕີເນັດທີ່ບໍ່ໄດ້ມາດຕະຖານນັ້ນອາດເປັນອັນຕະລາຍແກ່ຊີວິດໄດ້.