ອາເຊນອລ ຄິດການໃຫຍ່ພ້ອມຄວ້າ ເອັມບັບເປ ແບບບໍ່ມີຄ່າຕົວໃນປີ 2024

ອາເຊນອລ ຕົກເປັນຂ່າວວາງແຜນທີ່ຈະຄວ້າ ຄີລຽນ ເອັມບັບເປ ກອງໜ້າ ປາຣີ ແຊັງ ແຊັກແມັງ ມາຮ່ວມທີມໃນປີ 2024 ແບບບໍ່ມີຄ່າຕົວ.

ສຳລັບ ເອັມບັບເປ ຢືນຢັນຈະແຈ້ງວ່າລາວຈະບໍ່ຂະຫຍາຍສັນຍາສະບັບໃຫມ່ກັບ ເປແອສເຊ ອອກໄປຫລັງຈາກສັນຍາສະບັບປັດຈຸບັນຂອງລາວຈະຫມົດໃນລະດູການປີ 2024.

ຈາກສະຖານະການທີ່ເກີດຂຶ້ນເຮັດໃຫ້ມີຂ່າວວ່າ ເປແອສເຊ ຢາກທີ່ຈະປ່ອຍດາວເຕະອາຍຸ 24 ປີລາຍນີ້ ເນື່ອງຈາກບໍ່ຕ້ອງການເສຍອອກຈາກທີມແບບບໍ່ມີຄ່າຕົວ ໂດຍມີ ຣຽວ ມາດຣິດ ໃຫ້ຄວາມສົນໃຈແຕ່ຍັງບໍ່ມີການຍື່ນຂໍ້ສະເໜີທາງການເນື່ອງຈາກຄ່າຕົວທີ່ສູງເກີນໄປ.

ຈົນຫລ້າສຸດເວັບໄຊ footballtranfers.com ລາຍງານວ່າ : ອາເຊນອລ ເປັນອີກທີມທີ່ມັກໃນສີຕີນຂອງ ເອັມບັບເປ ແລະ ພວມທົບທວນວ່າຈະດຶງກອງໜ້າທີມຊາດຝຣັ່ງລາຍນີ້ມາເສີມທີມຫລືບໍ່ໃນປີ 2024 ແລະ ຍັງບໍ່ມີການຍື່ນລາຍລະອຽດໃດໆໃຫ້ກັບຕົວແທນຂອງນັກເຕະ.