ລັດຖະບານ ກຳນົດຍຸດທະສາດພັດທະນາແຮ່ທາດ 10 ປີ ແລະ ວິໄສທັດ 15 ປີ ເພື່ອການພັດທະນາສີຂຽວ ແລະ ຍືນຍົງ
ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ລາຍງານ ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 30 ມິຖຸນາ 2023 ວ່າ: ສຳລັບ ຍຸດທະສາດ 10 ປີ (2021- 2030) ໄດ້ເນັ້ນການຊອກຮູ້ ແລະ ປະເມີນທ່າແຮງຊັບພະກອນແຮ່ທາດ ທົ່ວປະເທດ ແລະ ນໍາໃຊ້ຊັບພະຍາກອນແຮ່ທາດໃຫ້ມີປະສິດທິພາບ, ປະສິດທິຜົນ, ມີຄວາມຍືນຍົງ ແລະ ສີຂຽວ ເຊິ່ງປະກອບມີ 6 ເປົ້າໝາຍ ແລະ 49 ວຽກຈຸດສຸມ ເປັນຕົ້ນ, ການສໍາຫລວດສ້າງຂໍ້ມູນພື້ນຖານດ້ານທໍລະນີສາດ ແລະ ແຮ່ທາດ, ທັງປະເມີນຊັບພະຍາກອນແຮ່ທາດ ທົ່ວປະເທດ; ກໍານົດນະໂຍບາຍການບໍລິຫານຈັດການ/ຄຸ້ມຄອງ ແລະ ພັດທະນາແຮ່ທາດໃຫ້ເກີດຜົນປະໂຫຍດສູງສຸດ ຕາມທິດສີຂຽວ; ການພັດທະນາກົນໄກບໍລິຫານຈັດການ, ຄຸ້ມຄອງ, ຕິດຕາມກວດກາ ແລະ ການບັງຄັບໃຊ້ກົດໝາຍ; ສົ່ງເສີມການມີສ່ວນຮ່ວມ ໃນການຄຸ້ມ ຄອງ ແລະ ພັດທະນາຊັບພະຍາກອນແຮ່ທາດ; ສ້າງຄວາມເຂັ້ມແຂງໃຫ້ລັດວິສາຫະກິດ ແລະ ພະນັກງານໃນຂະແໜງການບໍ່ແຮ່ ແລະ ການເຊື່ອມສານເປົ້າໝາຍການພັດທະນາແບບຍືນຍົງ (SDG) ແລະ ການເຕີບໂຕສີຂຽວ (GG) ເຂົ້າໃນການຈັດຕັ້ງປະຕິບັດ ແຜນພັດທະນາພະລັງງານ ແລະ ບໍ່ແຮ່.
ສະເພາະວິໄສທັດ ຮອດປີ 2035 ໄດ້ກຳນົດທິດທາງ, ວິໄສທັດ, ເປົ້າໝາຍລວມ, ຫລັກການພື້ນຖານການສ້າງຍຸດທະສາດການພັດທະນາແຮ່ທາດ ແລະ ສິ່ງທ້າທາຍຢ່າງຊັດເຈນ ຄື: “ພັດທະນາວຽກງານທໍລະນີສາດ ແລະ ບໍ່ແຮ່ ຕາມທິດຫັນເປັນອຸດສາຫະກຳທີ່ທັນສະໄໝ, ໂປ່ງໃສ ແລະ ນຳໃຊ້ທ່າແຮງຊັບພະຍາກອນແຮ່ທາດ ຢ່າງປະຢັດ, ມີປະສິດ ທິພາບ ແລະ ປະສິດທິຜົນສູງ ຕາມເປົ້າໝາຍການພັດທະນາສີຂຽວ ແລະ ຍືນຍົງ”.
ສຳລັບ ເປົ້າໝາຍ ແລະ ວຽກງານຈຸດສຸມ ຂອງຍຸດທະສາດ ແມ່ນຈະໄດ້ດຳເນີນການສຳຫລວດທໍລະນີສາດ ແລະ ແຮ່ທາດຂັ້ນພື້ນຖານ ເພື່ອສືບຕໍ່ປັບປຸງຂໍ້ມູນທໍລະນີສາດ-ແຮ່ທາດ, ທໍລະນີໄພພິບັດ-ດິນເຈື່ອນ ແລະ ສຶກສາແລກປ່ຽນຂໍ້ມູນກັບບັນດາປະເທດ ທີ່ມີຊາຍແດນຕິດຈອດກັບ ສປປ ລາວ; ຊຸກຍູ້, ສົ່ງເສີມໂຄງການ ຫລື ກິດຈະການຊອກຄົ້ນ ແລະ ສຳຫລວດແຮ່ທາດ ໃຫ້ກ້າວເຂົ້າສູ່ຂັ້ນຕອນການຂຸດຄົ້ນ, ປຸງແຕ່ງ-ຜະລິດ, ຈຳໜ່າຍ ຫລາຍກວ່າ 70% ຂອງກິດຈະການທີ່ມີຢູ່ໃນປັດຈຸບັນ. ພ້ອມນັ້ນ ໄດ້ສະເໜີໃຫ້ລັດຖະບານໃຫ້ບູລິມະສິດໂກຕາບຸກຄະລາກອນໃນຂະແໜງທໍລະນີສາດ ແລະ ແຮ່ທາດ ທັງສູນກາງ ແລະ ທ້ອງຖິ່ນ ເພີ່ມຕື່ມຢ່າງໜ້ອຍໃຫ້ໄດ້ 100 ຄົນ ໃນປີ 2025 ແລະ 200 ຄົນໃນປີ 2030 ເພື່ອໃຫ້ພຽງພໍກັບຄວາມຮຽກຮ້ອງຕ້ອງການຂອງວຽກງານ ການຄຸ້ມຄອງກິດຈະການບໍ່ແຮ່ໃນແຕ່ລະໄລຍະ, ພ້ອມທັງຍົກລະດັບວິຊາສະເພາະບຸກຄະລາກອນໃນຂະແໜງການໃຫ້ສູງຂຶ້ນ, ພ້ອມທັງ ສືບຕໍ່ຊຸກຍູ້, ສົ່ງເສີມ ແລະ ສ້າງເງື່ອນໄຂບັນດາໂຄງການທີ່ມີໃນປັດຈຸບັນ ແລະ ພາກອຸດສາຫະກຳບໍ່ແຮ່ ໃຫ້ມີການພັດທະນາອຸດສາຫະກໍາຕໍ່ເນື່ອງເລີ່ມແຕ່ອຸດສາຫະກໍາຂັ້ນຕົ້ນ, ຂັ້ນກາງ ແລະ ຂັ້ນສຸດທ້າຍ ຢູ່ເຂດທີ່ມີຄວາມເໝາະສົມ ເພື່ອພັດທະນາແຮ່ທາດ ໃຫ້ເກີດປະໂຫຍດສູງສຸດ.
