ເປັນຫ່ວງເສັ້ນທາງເພຫຼາຍໄປໃສມາໃສກໍຫຍຸ້ງຍາກ ຂະແໜງການກ່ຽວຂ້ອງວ່າແນວໃດ ?
ໂດຍ: ທ່ຽງທຳ
ເພື່ອນຜູ້ອ່ານທີ່ຮັກແພງທັງຫຼາຍ, ໃນໄລຍະນີ້ໄປໃສມາໃສກໍພົບຄວາມຫຍຸ້ງຍາກ ເພາະເສັ້ນທາງຫຼາຍສາຍໄດ້ເປ່ເພຫຼາຍ, ໃນເຂດນອກເມືອງກໍໄດ້ຮັບຜົນກະທົບຈາກໄພທຳມະຊາດ ແລະ ຢູ່ຕົວເມືອງສ່ວນໜຶ່ງກໍເປັນເສັ້ນທາງເກົ່າແກ່ຊຸດໂຊມມາຫຼາຍປີ ແລະ ອີກສ່ວນໜຶ່ງກໍແມ່ນເລື່ອງຄຸນນະພາບການກໍ່ສ້າງ ໂດຍສະເພາະເສັ້ນທາງຊອຍຕ່າງໆໃນນະຄອນຫຼວງວຽງຈັນ, ສ້າງມາພຽງບໍ່ເທົ່າໃດປີກໍມາເປ່ເພ ຈົນຈະແປງນຳກໍບໍ່ທັນ, ແປງບ່ອນນີ້ພັດເພບ່ອນນັ້ນ ເບິ່ງຄືວ່ານັບມື້ຮ້າຍແຮງ. ນີ້ແລ້ວເພິ່ນວ່າການຄຸ້ມຄອງຄຸນນະພາບບໍ່ດີ, ໃນຂະນະທີ່ເສັ້ນທາງໃນເຂດຕະຫຼາດແລງໜອງດ້ວງ ເຊິ່ງເປັນໃຈກາງຂອງຕົວເມືອງຫຼວງແທ້ໆ ສ້າງມາບໍ່ຮອດ 3 ປີມາຮອດດຽວນີ້ເປ່ເພຈົນຈະໄປບໍ່ໄດ້, ຂອງແນວວ່າໃນໄລຍະກໍ່ສ້າງເອົາແຕ່ບໍລິສັດຜູ້ຮັບເໝົາເຂົາຈະເຮັດແນວໃດກໍເຮັດ, ຂໍແຕ່ວ່າມື້ລົງກວດກາຄຸນນະພາບຂອງການກໍ່ສ້າງ, ຖ້າມີຊອງໃຫຍ່ຊອງນ້ອຍໃສ່ຖົງແລ້ວກໍຜ່ານຢ່າງຂາດຄວາມຮັບຜິດຊອບ ບາດການເສຍຫາຍພັດແມ່ນເງິນແມ່ນຄຳຂອງຊາດ. ມີຫຼາຍຄົນໃຫ້ທັດສະນະວ່າ: ຖ້າແນວຄິດນີ້ຍັງສືບຕໍ່ມີຢູ່ ກໍຈະສົ່ງຜົນກະທົບໜັກໃຫ້ແກ່ການພັດທະນາປະເທດຊາດບ້ານເມືອງເຮົາຢ່າງບໍ່ມີມື້ໝົດເປັນ ແລະ ເຮົາຈະແກ້ໄຂສະພາບນີ້ແນວໃດ ? ອັນນີ້ເປັນຄຳຖາມຕອບໄດ້ຍາກໃນເມື່ອການຈັດຕັ້ງປະຕິບັດຂໍ້ແຂ່ງຂັນ “ຮັກຊາດ ແລະ ການພັດທະນາ” ຍັງບໍ່ແຂງແຮງພໍ ແລະ ສະເພາະໜ້ານີ້ເດ ເພື່ອການປົວແປງເສັ້ນທາງດັ່ງກ່າວໃຫ້ດີ ແລະ ສາມາດນຳໃຊ້ໄປມາໄດ້ສະດວກສະບາຍ ແລະ ທົນທານ, ເບື້ອງລັດເຮົາກໍຈະໄດ້ສຸມທຸກທຶນຮອນເຂົ້າໃນການປົວແປງດັ່ງກ່າວຢ່າງມີປະສິດທິພາບ ແລະ ເອົາໃຈໃສ່ຄຸ້ມຄອງນຳກັນໃຫ້ມີຄວາມໂປ່ງໃສ ເພື່ອຫຼຸດຜ່ອນການຕົກເຮ່ຍເສຍຫາຍ ແລະ ເຮັດໃຫ້ໜ້າວຽກມີຄຸນນະພາບດີຂຶ້ນ ເພື່ອຮອງຮັບປີທ່ອງທ່ຽວລາວ 2018 ບັນລຸຜົນສຳເລັດ ແລະ ໄດ້ຮັບຄວາມຍົກຍ້ອງຈາກແຂກບ້ານແຂກເມືອງຜູ້ມາທ່ຽວ ເມື່ອເຫັນບ້ານເມືອງເຮົາມີການພັດທະນາດີຂຶ້ນຢ່າງບໍ່ຢຸດຢັ້ງ.
