ຮູ້ຈັກກັບ ໄລໂຄປີນ ຄຸນປະໂຫຍດຫລາກຫລາຍໃກ້ຕົວທ່ານ.
ໝາກເລັ່ນ ມີຊື່ວິທະຍາສາດວ່າ Lycopersicon esculentum Mill ຢູ່ໃນຕະກູນ SOLANACEAE ການສຶກສາລິດທາງການຢາວິທະຍາລະບຸວ່າ : ໝາກເລັ່ນ ແລະ ສານສຳຄັນຕ່າງໆ ໂດຍສະເພາະສານໄລໂຄປີນ ມີລິດຕ້ານອະນຸມູນອິດສະລະ, ຕ້ານຄວາມເຖົ້າ, ຕ້ານການອັກເສບ, ຊ່ວຍຫລຸດໄຂມັນ ແລະ ນຳ້ຕານໃນເລືອດ ແລະ ມີລິດຕ້ານມະເຮັງຫລາຍຊະນິດ ໂດຍສະເພາະຢ່າງຍິ່ງມະເຮັງຕ່ອມລູກໝາກ. ການບໍລິໂພກໝາກເລັ່ນສົດ, ນຳ້ຊັອດໝາກເລັ່ນ, ສານສະກັດໝາກເລັ່ນ ແລະ ສານໄລໂຄປີນ ສາມາດຫລຸດຄວາມສ່ຽງໃນການເກີດພະຍາດມະເຮັງຕ່ອມລູກໝາກໄດ້ ທັງຍັງຊ່ວຍຫລຸດຂະໜາດ ແລະ ຂັດຂວາງການລຸກລາມຂອງແຊນມະເຮັງດັ່ງກ່າວໄດ້. ນອກຈາກນີ້, ໝາກເລັ່ນຍັງມີຄວາມປອດໄພສູງ ແລະ ໃນຂະນະນີ້ກໍຍັງບໍ່ມີລາຍງານຄວາມເປັນພິດຂອງການບໍລິໂພກໝາກເລັ່ນໃນຮູບແບບຂອງອາຫານເລີຍ ຫລາຍໆຄົນອາດຄິດວ່າການກິນຜັກສົດເປັນວິທີທີ່ດີທີ່ສຸດທີີ່ຈະໃຫ້ໄດ້ສານສຳຄັນໃນພືດຜັກຫລາຍໆ ແຕ່ໃນກໍລະນີຂອງສານໄລໂຄປີນ ຖືເປັນຂໍ້ຍົກເວັ້ນ ເພາະການສຶກສາປຽບທຽບສານໄລໂຄປີນໃນຜະລິດຕະພັນທີ່ເຮັດຈາກໝາກເລັ່ນ (ທີ່ນຳ້ໜັກເທົ່າກັນ) ເຊັ່ນ : ນຳ້ຊັອດໝາກເລັ່ນ, ນຳ້ໝາກເລັ່ນ, ຜະລິດຕະພັນໝາກເລັ່ນເຂັ້ມຂຸ້ນ, ແກງໝາກເລັ່ນເຂັ້ມຂຸ້ນ, ໝາກເລັ່ນປຸງແຕ່ງສຸກ, ໝາກເລັ່ນຝຸ່ນ ແລະ ໝາກເລັ່ນສົດ ເຮັດໃຫ້ສາມາດລຽງລຳດັບປະລິມານຂອງໄລໂຄປີນຈາກໜ້ອຍໄປຫາຫລາຍໄດ້ດັ່ງນີ້ :
- ໝາກເລັ່ນສົດ.
- ໝາກເລັ່ນປຸງແຕ່ງສຸກ.
- ແກງໝາກເລັ່ນເຂັ້ມຂຸ້ນ.
- ນຳ້ໝາກເລັ່ນ.
- ນຳ້ຊັອດໝາກເລັ່ນ.
- ໝາກເລັ່ນຝຸ່ນ.
- ຜະລິດຕະພັນໝາກເລັ່ນເຂັ້ມຂຸ້ນ.
ຈະເຫັນໄດ້ວ່າໝາກເລັ່ນທີ່ຜ່ານຂະບວນການ ແລະ ຄວາມຮ້ອນ ຈະມີປະລິມານຂອງສານໄລໂຄປີນຫລາຍກ່ວາໝາກເລັ່ນສົດ, ແຕ່ແນວໃດກໍຕາມ ການບໍລິໂພກໝາກເລັ່ນສົດກໍຈະເຮັດໃຫ້ໄດ້ວິຕາມິນ ແລະ ສານອື່ນໆທີ່ສະຫລາຍໄປໃນລະຫ່ວາງຂະບວນການຜະລິດແທນ. ຮູ້ແນວນີ້ແລ້ວ ຕໍ່ໄປທ່ານຄົງບໍ່ຖືເບົາເລື່ອງການກິນໝາກເລັ່ນອີກແລ້ວແມ່ນບໍ່ ?
