ສະເໜີໃຫ້ລັດຖະບານ ທົບທວນ ແລະ ປະເມີນຄືນການທົດລອງຂຸດຄົ້ນແຮ່ທາດ

ທ່ານ ນາງ ຫົງຄໍາ ໄຊຍະຄົມ, ສະມາຊິກສະພາແຫ່ງຊາດຈາກເຂດເລືອກຕັ້ງທີ 13, ແຂວງສະຫວັນນະເຂດ ໄດ້ປະກອບຄໍາເຫັນ ໃນວາລະການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນຕອນເຊົ້າວັນທີ 29 ມິຖຸນາ 2023 ນີ້ ວ່າ: ສະໜັບສະໜູນລັດຖະບານສືບຕໍ່ຈັດຕັ້ງປະຕິບັດບັນດາມາດຕະການໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ທີ່ເຫັນວ່າໄດ້ຮັບປະສິດທິຜົນດີ ແຕ່ສະເໜີໃຫ້ລັດຖະບານທົບທວນ ແລະ ປະເມີນຄືນການອະນຸຍາດໃຫ້ມີການຂຸດຄົ້ນແຮ່ທາດແບບທົດລອງວ່າມັນຊ່ວຍແກ້ໄຂບັນຫາເສດຖະກິດຂອງຊາດດີຂຶ້ນແທ້ ຫລື ບໍ່? ສາມາດສ້າງຜົນປະໂຫຍດໃຫ້ປະຊາຊົນແທ້ບໍ່? ຫລື ເຮັດໃຫ້ປະເທດຊາດເສຍຊັບສົມບັດໂດຍບໍ່ກຸ້ມຄ່າ.

ໃນໄລຍະທົດລອງລັດຖະບານໄດ້ອະນຸຍາດໃຫ້ 98 ບໍລິສັດ, ໃນນັ້ນ ໄດ້ເຊັນສໍາປະທານບໍ່ແຮ່ແລ້ວ 89 ບໍລິສັດ (ແຮ່ເຫລັກ 38, ຄໍາຕົກຂ້ອນ 31, ແຮ່ຫາຍາກ 10, ແຮ່ຄໍາເຄົ້າ 8 ແລະ ຫີນມາໂບ 2) ໄດ້ມອບພັນທະເຂົ້າງົບປະມານຂອງລັດ 864,7 ຕື້ກີບ ແລະ 85 ລ້ານໂດລາສະຫະລັດ ເຊີ່ງຖືວ່າເປັນລາຍຮັບທີ່ຫລາຍສົມຄວນ, ແຕ່ເຫັນວ່າເສດຖະກິດຂອງປະເທດເຮົາຍັງຫຍຸ້ງຍາກ, ໜີ້ສິນຍັງສູງ, ອັດຕາແລກປ່ຽນຍັງມີການຜັນຜວນທຸກຊົ່ວໂມງ.

ນອກຈາກນີ້ ຄ່າຄອງຊີບ ແລະ ຊີວິດການເປັນຢູ່ຂອງປະຊາຊົນພົບຄວາມຫຍຸ້ງຍາກຍ້ອນລາຄາສິນຄ້າເພີ່ມຂຶ້ນ 2-3 ທົບ. ດັ່ງນັ້ນ ສະເໜີໃຫ້ລັດຖະບານເລືອກເອົາວິທີທີ່ສ້າງຜົນປະໂຫຍດແທ້ໃຫ້ປະເທດຊາດ ແລະ ປະຊາຊົນ ເພາະການຂຸດຄົ້ນແຮ່ທາດບໍ່ສົມຄວນທີ່ຈະມາເຮັດທົດລອງ ເພາະຍ້ອນບັນດາແຮ່ທາດທີ່ເປັນຊັບສົມບັດຂອງປະເທດຊາດທີ່ຂຸດຄົ້ນອອກໄປນັ້ນໝົດແລ້ວແມ່ນໝົດເລີຍ ມັນບໍ່ແມ່ນ ໝົດທົດລອງ. ນອກຈາກນີ້, ການປະເມີນຜົນກະທົບເບື້ອງຕົ້ນກໍບໍ່ໄດ້ປະເມີນ ເຮັດໃຫ້ມີຜົນກະທົບຕໍ່ທໍາມະຊາດ ແລະ ສິ່ງແວດລ້ອມທີ່ອຸດົມສົມບູນຢູ່ຂອບເຂດທີ່ມີການທົດລອງຂຸດຄົ້ນ ເຊິ່ງໃນໄລຍະຜ່ານມາ ມີບາງຈຸດຕັດໄມ້ອອກໄປໝົດແລ້ວແຕ່ເວົ້າວ່າບໍລິມາດບໍ່ແຮ່ຢູ່ຈຸດນັ້ນບໍ່ມີຫລາຍ ແລະ ຂຸດຄົ້ນອອກມາແລ້ວບໍ່ມີຄຸນນະພາບ ເຮັດໃຫ້ລັດຖະບານອັບປະໂຫຍດ, ແຕ່ສິ່ງທີ່ປະຊາຊົນເຫັນປະຈັກຕາຈາກການທົດລອງນີ້ ແມ່ນຫົນທາງເປ່ເພເສຍຫາຍ, ທໍາມະຊາດຢູ່ບໍລິເວນນັ້ນຖືກທໍາລາຍ ແລະ ປະຊາຊົນໄດ້ຮັບຜົນກະທົບຈາກສານປົນເປື້ອນທີ່ບໍລິສັດນໍາໃຊ້ຢູ່ຈຸດນັ້ນ