ສິງກະໂປຈະຈັດງົບເກືອບ 1,5 ລ້ານໂດລາສິງກະໂປ ພັດທະນາຄວາມໝັ້ນຄົງ ປອດໄພໄຊເບີໃນອາຊຽນ
ລັດຖະບານສິງກະໂປເປີດເຜີຍໃນວັນທີ 18 ກັນຍາວ່າ: ພາຍໃນ 3 ປີຈະຈັດສັນງົບປະມານຈຳນວນ 1,5 ລ້ານໂດລາສິງກະໂປ ພາຍໃຕ້ໂຄງການສົ່ງເສີມຂີດຄວາມສາມາດທາງໄຊເບີອາຊຽນ (ACCP) ເພື່ອພັດທະນາຂີດຄວາມສາມາດດ້ານເຕັກໂນໂລຊີໃນການຮັບມືກັບຄວາມສ່ຽງດ້ານໄຊເບີໃນພາກພື້ນ.
ທ່ານ ຢາຄອບ ອິບຣາຮິມ ລັດຖະມົນຕີວ່າການກະຊວງສື່ສານ ແລະ ເຕັກໂນໂລຊີຂໍ້ມູນຂ່າວສານສິງກະໂປ ກ່າວລະຫວ່າງພິທີເປີດກອງປະຊຸມລັດຖະມົນຕີອາຊຽນດ້ານຄວາມໝັ້ນຄົງປອດໄພທາງຂໍ້ມູນຂ່າວສານຄັ້ງທີ 2 ວ່າ: ງົບປະມານດັ່ງກ່າວຈະໃຊ້ໃນການສົ່ງເສີມສ້າງຂີດຄວາມສາມາດດ້ານເຕັກນິກຂອງໜ່ວຍງານຕອບສະໜອງ ແລະ ຜູ້ປະຕິບັດງານຈັດການກັບເຫດການຄວາມໝັ້ນຄົງປອດໄພຄອມພິວເຕີໃນພາກພື້ນອາຊຽນ.
ສິງກະໂປເປີດຕົວໂຄງການ ACCB ລະຫວ່າງພິທີເປີດກອງປະຊຸມລັດຖະມົນຕີອາຊຽນດ້ານຄວາມໝັ້ນຄົງປອດໄພທາງຂໍ້ມູນຂ່າວສານຄັ້ງທຳອິດໃນປີຜ່ານມາ ໂດຍຕັ້ງກອບງົບປະມານສະໜັບສະໜູນພັດທະນາຂີດຄວາມສາມາດໃນການຮັກສາຄວາມໝັ້ນຄົງປອດໄພໄຊເບີໄວ້ 10 ລ້ານໂດລາສິງກະໂປ.
ທ່ານ ຢາຄອບ ກ່າວວ່າ: ໃນປີນີ້ ສິງກະໂປຈະຮ່ວມກັບພາກອຸດສາຫະກຳຈັດອົບຮົມດ້ານການຮັກສາຄວາມໝັ້ນຄົງປອດໄພໄຊເບີໃຫ້ແກ່ຜູ້ສະໝັກ 18 ຄົນຈາກປະເທດສະມາຊິກອາຊຽນ. ທ່ານເຊື່ອໝັ້ນວ່າ: ຄວາມພະຍາຍາມຮ່ວມກັນໃນບັນດາປະເທດອາຊຽນຈະຊ່ວຍປູທາງໄປສູ່ການເຕີບໃຫຍ່ ແລະ ພັດທະນາທີ່ຍືນຍົງໃນອີກ 50 ປີຕໍ່ໜ້າ.
