ເບຣຊິນ ຊະນະ ອີຕາລີ 3-2 ເຊັດ ບານສົ່ງຍິງ ເນຊັນ ລີກ 2023

ການແຂ່ງຂັນບານສົ່ງຍິງ ເນຊັນ ລີກ 2023 ໃນວັນທີ 28 ມິຖຸນາ 2023 ເປັນການແຂ່ງຂັນໃນອາທິດທີ 3 ມີການລົງສະໜາມທັງໝົດ 4 ຄູ່ ໃນນີ້ກຸ່ມ 5 ແຂ່ງຂັນທີ່ເມືອງຊູວອນ ປະເທດ ສ.ເກົາຫຼີ. ສ່ວນກຸ່ມ 6 ແຂ່ງຂັນທີ່ນະຄອນຫຼວງບາງກອກ ປະເທດໄທ.

ຄູ່ທຳອິດ ໃນກຸ່ມ 5 ໃນວັນທີ 28 ມິຖຸນາ 2023 ໃນເວລາ 13:30 ໂມງ ທີມຊາດສະຫະລັດອາເມຣິກາ ລົງສະໜາມພົບກັບ ທີມຊາດໂປໂລຍ ຜົນປະກົດວ່າ ເກມນີ້ ສະຫະລັດອາເມຣິກາ ກັບມາສ້າງຜົນງານໄດ້ດີເອົາຊະນະໄປໄດ້ 3-2 ເຊັດ 17-25, 25-15, 27-25, 28-30 ແລະ 16-14 ຄະແນນ. ສ່ວນຄູ່ຕໍ່ມາ ໃນເວລາ 17:00 ໂມງ ທີມຊາດຈີນ ພົບກັບ ທີມຊາດແຊກບີ ຜົນການແຂ່ງຂັນປະກົດວ່າ ຈີນ ເສຍໃຫ້ ແຊກບີ 1-3 ເຊັດ 13-25, 25-17, 23-25 ແລະ 20-25 ຄະແນນ.

ຂະນະທີ່ກຸ່ມ 6 ຄູ່ທຳອິດໃນເວລາ 17:00 ໂມງ ທີມຊາດຍີ່ປຸ່ນ ລົງສະໜາມພົບກັບ ທີມຊາດຕວກກີ ຜົນການແຂ່ງຂັນປະກົດວ່າ ຍີ່ປຸ່ນ ເອົາຊະນະໄປໄດ້ 3-2 ເຊັດ 25-23, 25-23, 21-25, 16-25 ແລະ 15-9 ຄະແນນ. ຕໍ່ມາ ໃນເວລາ 20:30 ໂມງ ທີມຊາດເບຣຊິນ ທີມອັນດັບ 2 ຂອງໂລກ ລົງສະໜາມພົບກັບ ທີມຊາດອີຕາລີ ທີມອັນດັບ 3 ຂອງໂລກ ແລະ ແຊ໋ມເກົ່າເມື່ອປີຜ່ານມາ ຜົນການແຂ່ງຂັນປະກົດວ່າ ເບຣຊິນ ເອົາຊະນະໄປໄດ້ 3-2 ເຊັດ 26-28, 25-20, 19-25, 25-21 ແລະ 15-10 ຄະແນນ.