ສະໝຸນໄພໄລ່ຍຸງ ຫາໄດ້ງ່າຍໆ ບໍ່ເປືອງ

ຫລາຍອາທິດຜ່ານມານ ມີຝົນຕົກ ເຮັດໃຫ້ມີນໍ້າຖ້ວມຂັງໃນຫລາຍພື້ນທີ່ ແລະ ເປັນສາເຫດທີ່ຈະເຮັດໃຫ້ເກີດແຫລ່ງເພາະພັນຍຸງລາຍ ອັນເປັນພາຫະນໍາເຊື້ອໄຂ້ເລືອດອອກໄດ້
.
ເຊິ່ງພະຍາດໄຂ້ເລືອດອອກ (Dengue hemorrhagic fever: DHF) ຈະມີອາການໄຂ້ສູງກະທັນຫັນ, ອ່ອນເພຍ, ເບື່ອອາຫານ, ເຈັບທ້ອງ, ໜ້າແດງ, ປວດຮາກ ແລະ ມີຜື່ນຂຶ້ນຕາມຕົນຕົວ ແລະ ຖ້າມີອາການດັ່ງກ່າວຄວນພົບແພດໂດຍໄວ
.
ເມື່ອບໍ່ດົນມານີ້ເຮົາອາດຈະໄດ້ຍິນຂ່າວຄົນເສຍຊີວິດຈາກພະຍາດໄຂ້ຍຸງລາຍແລ້ວ, ແຕ່ບັນຫາພະຍາດໄຂ້ຍຸງລາຍນີ້ເປັນບັນຫາຊໍາເຮື້ອມາດົນ ແລະ ບໍ່ສາມາດຢັບຢັ້ງໄດ້ ມີພຽງແຕ່ປ້ອງກັນຕົນເອງເພື່ອບໍ່ໃຫ້ຖືກຍຸງກັດຈົນເປັນພະຍາດໄຂ້ຍຸງລາຍ, ເຊິ່ງພວກເຮົາທີມງານສາລະໜ້າຮູ້ລາວພັດທະນາຈຶ່ງໄດ້ນໍາເອົາສະໝຸນໄພໃກ້ຕົວມາແນະນໍາເພື່ອປ້ອງກັນຕົວຈາກຍຸງລາຍ ອັນເປັນສາເຫດທີ່ເຮັດໃຫ້ເກີດພະຍາດໄຂ້ຍຸງລາຍໄດ້ດັ່ງນີ້:

.

– ຜັກອີ່ຕູ່: ເປັນສະໝຸນໄພທີ່ມີກິ່ນແຮງ, ໃຊ້ໃບຜັກອີ່ຕູ່ມາຍ່ອງໃຫ້ໄດ້ກິ່ນ ແລ້ວນໍາໄປວາງໄວ້ໃນບໍລິເວນເຮືອນທີ່ຕ້ອງການໄລ່ຍຸງ ຫລື ຈະນໍາມາທາຕົນຕົວ, ນອກຈາກຈະຊ່ວຍປ້ອງກັນຍຸງແລ້ວ ຍັງປ້ອງກັນແມງໄມ້ກັດໄດ້ອີກດ້ວຍ
.
– ໃບກະເພົາ: ນອກຈາກຈະນໍາມາເຮັດອາຫານແລ້ວ ຍັງສາມາດໄລ່ຍຸງໄດ້ອີກດ້ວຍ ສໍາລັບສູດໄລ່ຍຸງດ້ວຍໃບກະເພົາແມ່ນນໍາເອົາໃບກະເພົາມາຍ່ອງໃຫ້ເກີດກິ່ນຄືກັນກັບວິທີຂອງຜັກອີ່ຕູ່ ແລ້ວຈຶ່ງເອົາໄປວາງໄວ້ຕາມຈຸດຕ່າງໆ, ກໍລະນີມີຍຸງຫລາຍຕ້ອງໝັ່ນປ່ຽນຕະຫລອດ
.
– ພິກໄທດໍາ: ເຄີຍສັງເກດບໍ່ວ່າໃຜທີ່ມັກກິນພິກໄທຫລາຍໆຈະເຮັດໃຫ້ຍຸງບໍ່ມາໃກ້ ເພາະຍຸງບໍ່ມັກກິ່ນພິກໄທ ແຕ່ສໍາລັບການນໍາເອົາພິກໄທມາໃຊ້ໄລ່ຍຸງນີ້ເຮົາຈະນໍາເອົາພິກໄທໄປທຸບ ຫລື ຕໍາ ແຕ່ບໍ່ໃຫ້ລະອຽດຫລາຍ ແລ້ວຈຶ່ງນໍາໄປວາງຕາມຈຸດຕ່າງໆພາຍໃນເຮືອນ
.
– ຫົວສີໃຄຫອມ: ຫລາຍຄົນອາດຈະພໍຮູ້ຈັກຢູ່ແລ້ວວ່າຫົວສີໃຄສາມາດໄລ່ຍຸງໄດ້ ແຕ່ລະວັງຢ່າເຂົ້າໃຈຜິດວ່າເປັນຫົວສີໃຄແບບໃດກໍໄດ້ ສໍາລັບການໄລ່ຍຸງຄວນໃຊ້ຫົວສີໃຄຫອມເພາະມີກິ່ນທີ່ແຮງກວ່າ ໂດຍການນໍາມາທຸບ ຫລື ສະກັດເອົານໍ້າມາສີດຕາມຕົນຕົວ
.
– ກະທຽມ: ນໍາມາໃຊ້ໂດຍການເອົາກະທຽມໄປທຸບໃຫ້ພໍແຕກ ຈາກນັ້ນຈຶ່ງນໍາໄປໃສ່ພາຊະນະ ແລະ ນໍາໄປວາງໄວ້ຕາມຈຸດຕ່າງໆໃນເຮືອນ, ນອກຈາກກະທຽມຈະໄລ່ຍຸງໄດ້ແລ້ວ ຍັງບັນເທົາອາການຄັນຈາກຍຸງກັດໄດ້ອີກດ້ວຍ
.
ຄວາມຈິງແລ້ວເພື່ອບໍ່ເປັນການເສຍເວລາໄປກັບການໄລ່ຍຸງ ເຮົາຄວນແກ້ບັນຫາທີ່ຕົ້ນເຫດໂດຍການໝັ່ນກວດເບິ່ງບໍລິເວນອ້ອມເຮືອນ ເພື່ອບໍ່ໃຫ້ມີນໍ້າຂັງ ແລະ ຄວນຕັດຫຍ້າບໍ່ໃຫ້ມັນຮົກເຮື້ອເກີນໄປ ເພາະຍຸງມັກບ່ອນປຽກຊຸ່ມ