ປກສ ແຂວງຊຽງຂວາງ ຈັບຜູ້ຂາຍນ້ຳກະທ່ອມ ອາຍຸ 17 ປີ ພ້ອມຂອງກາງນ້ຳຫົວເຊື້ອຈຳນວນໜຶ່ງ

ວັນທີ 28 ມິຖຸນາ 2023 ຜ່ານມາ, ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ແຂວງຊຽງຂວາງໄດ້ກວດພົບເຫັນ ແລະ ກັກຕົວຜູ້ຄ້າ-ຂາຍນ້ຳກະທ່ອມຈຳນວນ 1 ຄົນຄື: ທ້າວ ວຽງເງິນ, ອາຍຸ 17 ປີ ຢູ່ບ້ານນ້ຳຕົ້ມ ເມືອງແປກ ແຂວງຊຽງຂວາງ ພ້ອມດ້ວຍຂອງກາງຄື ນ້ຳຫົວເຊື້ອສຳລັບຕົ້ມໃສ່ໃບກະທ້ອມ ຈຳນວນ 8 ແກ້ວ ແລະ ໃບກະທ່ອມທີ່ຍັງບໍ່ປຸງແຕ່ງຈຳນວນໜຶ່ງ.
ຜ່ານການສືບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ນ້ຳຫົວເຊື້ອຕົ້ມໃສ່ໃບກະທ້ອມ ຈຳນວນ 8 ແກ້ວ ແລະ ໃບກະທ່ອມຈຳນວນໜຶ່ງ ແມ່ນຂອງຜູ້ກ່ຽວແທ້ ເຊິ່ງຜູ້ກ່ຽວໄດ້ສັ່ງຊື້ນຳກຸ່ມແກ້ງທີ່ຢູ່ນະຄອນຫຼວງວຽງຈັນ ຈຳນວນ 10 ຊຸດ ມີໃບກະທ້ອມ 1 ກິໂລກຣາມ ເພື່ອນຳມາຕົ້ມດື່ມ ແລະ ຈຳໜ່າຍ, ໃນນີ້ໄດ້ຂາຍໄປແລ້ວ 2 ຊຸດ ຍັງເຫລືອ 8 ຊຸດທີ່ຜູ້ກ່ຽວຈະນຳໄປຂາຍຕໍ່ແຕ່ຍັງບໍ່ໄດ້ຂາຍຈຶ່ງຖືກເຈົ້າໜ້າທີ່ກັກຕົວມາດຳເນີນຄະດີກ່ອນ.