ປາຕາຍຈຳນວນຫລາຍຍ້ອນການລະບາຍນໍ້າເຂື່ອນທີ່ມີການຕົກຕະກອນຊີວະມວນ
ວັນທີ 27 ມິຖຸນາ 2023 ຜ່ານມານີ້ ມີກໍລະນີປາຕາຍຈຳນວນຫລາຍຢູ່ ລຸ່ມ ເຂື່ອນໄຟຟ້າຂອງ ບໍລິສັດຜະລິດໄຟຟ້າພະລັງນໍ້າ ນໍ້າອູຈໍາກັດ ຫລວງພະບາງ ເຮັດໃຫ້ສັງຄົມເກີດມີຄວາມສົງໄສ ແລະ ຢາກຮູ້ທີ່ໄປທີ່ມາຕໍ່ກໍລະນີດັ່ງກ່າວ,
ຫລ້າສຸດ ວັນທີ 28 ມິຖຸນາ 2023 ນີ້ ບໍລິສັດຜະລິດໄຟຟ້າພະລັງນໍ້າ ນໍ້າອູຈໍາກັດ ຫລວງພະບາງ ໄດ້ອອກໜັງສືຊີ້ແຈງອະທິບາຍ ກ່ຽວກັບສະພາບການຕາຍຂອງປານ້ອຍຢູ່ໃນເຂດລຸ່ມໂຄງການເຂື່ອນ ໄຟຟ້ານໍ້າອູ 5 ວ່າ:
ໃນຕອນບ່າຍເວລາ 13:15 ໂມງ ຂອງວັນທີ 26 ມິຖຸນາ 2023 ລະດັບນໍ້າໃນອ່າງຂອງເຂື່ອນໄຟຟ້າ ນໍ້າອຸ 5 ຮອດລະດັບຕໍ່າສຸດທີ່ໃຊ້ງານໄດ້ (ລະດັບນໍ້າຕາຍ) 430 m ເພື່ອຮັບປະກັນຄວາມປອດໄພໃນການປ້ອງ ການອຸທົກກະໄພຊ່ວງລະດູຝົນ ແລະ ການຜະລິດໄຟຟ້າໃນລະດູແລ້ງໃຫ້ເປັນປົກກະຕິ ບໍລິສັດພວກເຮົາຈຶ່ງເປີດປະຕູລະບາຍນໍ້າລະດັບຕໍ່າຂອງເຂື່ອນ ເພື່ອດໍາເນີນການກວດກາເປັນປົກກະຕິ ແລະ ປ່ອຍນໍ້າເຂົ້າອ່າງ ເກັບນໍ້າຂອງເຂື່ອນໄຟຟ້ານໍ້າອູ 4 ດ້ວຍ. ໃນຕອນບ່າຍຂອງວັນທີ 27 ມິຖຸນາ 2023 ບໍລິສັດພວກເຮົາໄດ້ພົບ ເຫັນມີປານ້ອຍຕາຍ ໃນເຂດລຸ່ມເຂື່ອນໄຟຟ້ານໍ້າອູ 5.
ຜ່ານການການວິເຄາະເບື້ອງຕົ້ນ ສາເຫດເຮັດໃຫ້ປານ້ອຍຕາຍແມ່ນ: ນັບແຕ່ເຂື່ອນໄຟຟ້ານໍ້າອູ 5 ໄດ້ກັກເກັບນໍ້າໃນປີ 2015 ຜ່ານມາ ນໍ້າຢູ່ຕໍ່າກວ່າລະດັບນໍ້າຕາຍ ເປັນນໍ້ານິ້ງເປັນເວລາດົນນານ ການຕົກຕະກອນ ຂອງຊີວະມວນສານໄດ້ເພີ່ມຫຼາຍຂຶ້ນ ເມື່ອມາເປີດປະຕູລະບາຍນໍ້າຕະກອນຂອງຊີວະມວນສານ ໄດ້ໄຫຼລົງສູ່ເຂດລຸ່ມເຂື່ອນ ຈຶ່ງເຮັດໃຫ້ປານ້ອຍເຂດລຸ່ມເຂື່ອນຕາຍຈໍານວນໜຶ່ງ.
ໃນຕອນແລງເວລາ 19:00 ໂມງຂອງວັນທີ 27 ມິຖຸນາ 2023 ບໍລິສັດພວກເຮົາໄດ້ປິດປະຕູ ແລະ ເລີ່ມກັກເກັບນໍ້າ ເຊິ່ງປາກົດການນີ້ ຈະຫາຍໄປເມື່ອລະດັບນໍ້າສູງຂຶ້ນ, ສະນັ້ນ ຈຶ່ງຮຽນລາຍງານມາຍັງທ່ານ ເພື່ອຊີ້ແຈງອະທິບາຍ ສະພາບດັ່ງກ່າວທີ່ເກີດຂຶ້ນ.
