ຟີຟາ ເລືອກສະຫະລັດຮັບໜ້າທີ່ເຈົ້າພາບບານເຕະຊີງແຊ໊ມສະໂມສອນໂລກໂສມໃຫມ່
ຟີຟາ ປະກາດເລືອກສະຫະລັດເປັນເຈົ້າພາບບານເຕະຊີງແຊ໊ມສະໂມສອນໂລກ 2025 ເຊິ່ງຈະມີການເພີ່ມທີມຮ່ວມເຂົ້າແຂ່ງຂັນເຖິງ 32 ທີມ.
ສະຫະພັນບານເຕະນາໆຊາດ ຫລື FIFA ປະກາດເລືອກສະຫະລັດ ເປັນເຈົ້າພາບບານເຕະຊີງແຊ໊ມສະໂມສອນໂລກ ຫລື FIFA World Club 2025 ເຊິ່ງຈະມີການັບປ່ຽນຮູບແບບການແຂ່ງຂັນນຳອີກດ້ວຍການເພີ່ມທີມເຂົ້າຮ່ວມແຂ່ງຂັນເປັນ 32 ທີມ.
ຈາກການປັບປ່ຽນຮູບແບບການແຂ່ງຂັນໃຫມ່ ໂດຍມີທີມເຂົ້າຮ່ວມຊີງໄຊເຖິງ 32 ທີມດັ່ງກ່າວ ເຮັດໃຫ້ບານເຕະຊີງແຊ໊ມສະໂມສອນໂລກ ຈະປ່ຽນໄປຈັດຂຶ້ນທຸກ 4 ປີແທນທີ່ຈະມີການຈັດການແຂ່ງຂັນເປັນປະຈຳທຸກປີຄືຜ່ານມາ ໂດຍເຈົ້າຂອງຂັນແຊ໊ມປຽນ ລີກ 3 ລະດູການຫລັງສຸດ ທັງ ເຊລຊີ, ຣຽວ ມາດຣິດ ແລະ ແມນເຊສເຕີ ຊິຕີ ລວມທັງແຊ໊ມປີ 2024 ຈະໄດ້ສິດທິເຂົ້າຮ່ວມການແຂ່ງຂັນທັງຫມົດ.
ນອກຈາກນີ້ທີມທີ່ມີຄະແນນດີທີ່ສຸດ 8 ອັນດັບທຳອິດໃນຕາຕະລາງຈັດອັນດັບ 4 ປີຂອງ ສະຫະພັນບານເຕະຢູໂຣບ ກໍຈະໄດ້ສິດລົງແຂ່ງດ້ວຍເຊັ່ນກັນ ເຊິ່ງວມແລ້ວຈະມີຕົວແທນຈາກຝັ່ງຢູໂຣບເຂົ້າຮ່ວມໃນລາຍການນີ້ເຖິງ 12 ທີມ.
ຂະນະທີ່ ພັລໄມຣັສ ແລະ ຟລາເມງໂກ 2 ທີມດັງຈາກບຣາຊິລ ກໍຈະໄດ້ສິດລົງຫລິ້ນໃນ ຟີຟາ ຄລັບ ເວີນ ຄັບ 2025 ໃນຖານະແຊ໊ມໂກປາ ລິເບຕາໂດເຣສ ເຊັ່ນດຽວກັນ ມອນເຕີເຣ ກັບ ເລອອນ ຈາກເມັກຊິໂກ ແລະ ຊີແອດເທິລ ຊາວເດີ ຈາກສະຫະລັດ ເຊິ່ງເປັນເຈົ້າຂອງແຊ໊ມຄອນຄາເຄຟ ແຊ໊ມປຽນ ລີກ ປີ 2021, 2023 ແລະ 2022 ຕາມລຳດັບ.
