“ສະຖາພອນ” ຊະນະ “ວິທະຍາ” ມື 1 ຂອງລາວ 2-1 ເຊັດ ຄວ້າແຊ໋ມເທັນນິດ ນໍ້າດື່ມຫົວເສືອ ໂອເພັນ 2023

ສະຖາພອນ ສິມມາລາວົງ ຫຼື ໂຢ ນັກກິລາເທັນນິດ ມື 2 ຂອງລາວ ສາມາດເອົາຊະນະ ວິທະຍາ ຣາຊາວະດີ (ອາລິມ) ນັກກິລາເທັນນິດມື 1 ຂອງລາວ ໄປໄດ້ແບບຫວຸດຫວິດ 2-1 ເຊັດ 6-3, 2-6 ແລະ 4-6 ຄະແນນ ຄວ້າແຊ໋ມປະເພດດ່ຽວຊາຍ ການແຂ່ງຂັນເທັນນິດ ນໍ້າດື່ມຫົວເສືອ ໂອເພັນ 2023 ຫຼື “Tigerhead Open 2023” ໄປຄອງໄດ້ສຳເລັດ ແລະ ຖືເປັນແຊ໋ມລາຍການນີ້ສະໄໝທຳອິດຂອງລາວອີກດ້ວຍ.

ພິທີປິດການແຂ່ງຂັນຂັນເທັນນິດ ນໍ້າດື່ມຫົວເສືອ ໂອເພັນ 2023 ເພື່ອສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ (1 ມິຖຸນາ) ໃນປີນີ້ ໄດ້ມີຂຶ້ນເມື່ອວັນທີ 17 ມິຖຸນາ 2023 ທີ່ເດີ່ນເທັນນິດວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ແສງພອນ ພົມອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ ທັງເປັນຮອງປະທານ ແລະ ເລຂາທິການຄະນະກຳມະການໂອລິມປິກແຫ່ງຊາດ, ທ່ານ ສູນທອນ ພົມມະຈັກ ປະທານບໍລິສັດ ເບຍລາວ ຈຳກັດ, ຜູ້ໃຫ້ການສະໜັບສະໜູນຫຼັກ ແລະ ທ່ານ ດາວວອນ ພະຈັນທະວົງ ປະທານສະຫະພັນກິລາເທັນນິດແຫ່ງຊາດ ພ້ອມດ້ວຍຄະນະນຳ, ຄູຝຶກ ແລະ ນັກກິລາ ຕະຫຼອດຮອດແຂກຖືກເຊີນ ແລະ ກອງເຊຍເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

ການແຂ່ງຂັນຂັນເທັນນິດລາຍການດັ່ງກ່າວ ຈັດຂຶ້ນທຸກປີ ນອກຈາກເປັນການສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດແລ້ວ ຍັງເປັນການສ້າງໂອກາດໃຫ້ນັກເທັນນິດລາວ ໃນແຕ່ລະຮຸ່ນອາຍຸ ໄດ້ມີໂອກາດແລກປ່ຽນປະສົບການ ແລະ ທົດສອບຄວາມສາມາດ ແນໃສ່ເຄື່ອນໄຫວຝຶກແອບແຂ່ງຂັນຢ່າງຕໍ່ເນື່ອງ ຊຶ່ງມີການຊີງໄຊທັງໝົດ 9 ລາຍການ ແຂ່ງຂັນລະຫວ່າງວັນທີ 2-17 ມິຖຸນາ 2023. ຜ່ານການແຂ່ງຂັນຜົນປະກົດວ່າ ຄູ່ຊີງຊະນະເລີດ ປະເພດດ່ຽວຊາຍທົ່ວໄປ ສາຍ ກ ລະຫວ່າງ ທ້າວ ສະຖາພອນ ສິມມະລາວົງ ມື 2 ຂອງລາວ ພົບກັບ ທ້າວ ວິທະຍາ ຣາຊາວະດີ ມື 1 ຂອງລາວ ຊຶ່ງຄູ່ນີ້ ສູ້ກັນໄດ້ຢ່າງສູສີ ກວ່າຈະເອົາຊະນະກັນໄດ້ຕ້ອງໃຊ້ເວລາແຂ່ງຂັນເຖິງ 3 ຊົ່ວໂມງກວ່າ ໂດຍຮູບເກມນັ້ນເປັນ ວິທະຍາ ສາມາດເອົາຊະນະໄປກ່ອນໃນເຊັດທຳອິດ 6-3 ແຕ່ເຊັດ 2 ແລະ ເຊັດ 3 ກໍກາຍເປັນ ໂຢ ແຊງຊະນະ 6-2 ແລະ 6-4 ຄະແນນ ຊຶ່ງເປັນໄຊຊະນະຄັ້ງທຳອິດຂອງ ໂຢ ໃນການພົບກັນຂອງທັງສອງຄົນ ລາຍການດັ່ງກ່າວ ມີນັກກິລາເຂົ້າຮ່ວມ 16 ຄົນ ສົ່ງຜົນໃຫ້ ໂຢ ໄດ້ຮັບຂັນລາງວັນ ພ້ອມເງິນສົດ 1 ລ້ານກີບ ໄປຄອງ.

ສຳລັບປະເພດດ່ຽວຊາຍ ຮຸ່ນອາຍຸ 8-12 ປີ ຊະນະເລີດ ທ້າວ ພູຜາ ຈັນທະວົງ ໄດ້ຮັບຂັນລາງວັນ ພ້ອມເງິນລາງວັນ 800.000 ກີບ, ຮຸ່ນອາຍຸ 12-16 ປີ ຊະນະເລີດ ທ້າວ ໄດມ້ອນ ບຸນທະລາ ຮັບຂັນລາງວັນ ພ້ອມເງິນລາງວັນ 800.000 ກີບ, ປະເພດຄູ່ຊາຍທົ່ວໄປ ຊະນະເລີດ ວິທະຍາ ຣາຊາວະດີ ແລະ ອານັນດອນ ຄຳພູມີ ຮັບຂັນລາງວັນ ພ້ອມເງິນລາງວັນ 800.000 ກີບ, ປະເພດດ່ຽວຊາຍ ສາຍ ຂ ຊະນະເລີດ ທ່ານ ຈຳນຽນ ສີຫາວົງ ຮັບຂັນລາງວັນ ພ້ອມເງິນລາງວັນ 800.000 ກີບ, ປະເພດຄູ່ຊາຍ ສາຍ ຂ ຊະນະເລີດ ທ່ານ ຄຳຫຼ້າ ພອນປະເສິດ ແລະ ທ່ານ ພຸດທະວົງ ບຸນທົງ ວົງສາລີ ຮັບຂັນລາງວັນ ພ້ອມເງິນລາງວັນ 800.000 ກີບ ແລະ ປະເພດດ່ຽວຊາຍ ສາຍ ຄ ຊະນະເລີດ ທ່ານ ຟິວລິບ ຮັບຂັນລາງວັນ ພ້ອມເງິນລາງວັນ 1.000.000 ກີບ, ປະເພດຄູ່ຊາຍ ສາຍ ຄ ຊະນະເລີດ ທ່ານ ແສງພອນ ພົມອາມາດ ແລະ ທ່ານ ສົມສັກ ສະກຸນຄຳ ຮັບຂັນລາງວັນ ພ້ອມເງິນລາງວັນ 800.000 ກີບ.

ສ່ວນປະເພດຄູ່ຊາຍອາຍຸລວມກັນ 75 ຂຶ້ນໄປ ຊະນະເລີດ ທ່ານ ອິນທະນູ ເດືອນສະຫວັນ ແລະ ທ່ານ ຈຳນຽນ ສີຫາວົງ ຮັບຂັນລາງວັນ ພ້ອມເງິນລາງວັນ 800.000 ກີບ, ປະເພດຄູ່ປະສົມ ຊະນະເລີດ ອາໂນລົງ ທຳມະວົງ ແລະ ມະໄລພອນ ປະທຸມມາ ກູໂຣເນັນ ຮັບຂັນລາງວັນ ພ້ອມເງິນລາງວັນ 800.000 ກີບ. ພິເສດການແຂ່ງຂັນຄັ້ງນີ້ ຍັງໄດ້ຈັດໃຫ້ມີກິລາຊັອບເທັນນິດ ເປັນຄັ້ງທຳອິດ ແລະ ຄູ່ແຊ໋ມຕົກເປັນຂອງ ທ້າວ ເປັກກີ້ ວົງພັກດີ ແລະ ທ້າວ ພັດທະນາ ສີສົມບັດ ຮັບຂັນລາງວັນ ພ້ອມເງິນລາງວັນ 800.000 ກີບ.

ຂ່າວ: ໜັງສືພິມສຶກສາ-ກິລາລາຍວັນ