ໄທ ພ້ອມໃຫ້ການສະໜັບສະໜູນ ສປປ ລາວ ເພື່ອເສີມຂະຫຍາຍການຄ້າ ແລະ ການລົງທຶນ ລາວ-ໄທ ໃຫ້ນັບມື້ເພີ່ມຂຶ້ນ
ວັນທີ 22 ມິຖຸນາ 2023, ທ່ານ ນາງມໍລະກົດ ສີສະຫວັດ ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ພ້ອມຄະນະ ໄດ້ເຂົ້າຢ້ຽມຂໍ່ານັບ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ເພື່ອປຶກສາຫາລືກ່ຽວກັບວຽກງານການຮ່ວມມືວຽກງານການຄ້າ-ການລົງທຶນ ລະຫວ່າງ ສປປ ລາວ- ຣາຊະອານາຈັກໄທ ທີ່ມີການພົວພັນເສີມສ້າງທີ່ດີໃນໄລຍະຜ່ານມາ.
ໂອກາດນີ້, ທ່ານ ລັດຖະມົນຕີກະຊວງອຸດສາຫະກໍາ ແລະ ການຄ້າ ສະແດງຄວາມຍິນດີຕ້ອນຮັບຕໍ່ ທ່ານທູດໃນໂອກາດເຂົ້າຢ້ຽມຂໍ່ານັບຄັ້ງນີ້, ເຊິ່ງທັງສອງຝ່າຍໄດ້ສົນທະນາປຶກສາຫາລືກ່ຽວກັບວຽກງານການຮ່ວມມື ລະຫວ່າງ ສປປ ລາວ-ຣາຊະອານາຈັກໄທ ທີ່ມີການພົວພັນເສີມສ້າງທີ່ດີໃນໄລຍະຜ່ານມາເປັນຕົ້ນ ໂອກາດການຄ້າ-ການລົງທຶນທົ່ວໄປ, ບັນຫາບາງຂໍ້ຄົງຄ້າງທີ່ຍັງບໍ່ທັນເຂົ້າໃຈຊຶ່ງກັນ ແລະ ກັນ ເປັນຕົ້ນ: ການນໍາເຂົ້ານໍ້າມັນເຊື້ອໄຟຈາກປະເທດໄທ, ການອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ-ຈີນ ຕໍ່ ຢູໂລບ, ການພັດທະນາການຄ້າຊາຍແດນ ລາວ-ໄທ ໃນຂອບເຂດສິນຄ້າກະສິກໍາ ແລະ ການສະໜັບສະໜູນພາກທຸລະກິດໄທໃຫ້ມາລົງທຶນໃນລາວໃຫ້ຫລາຍເພີ່ມຂຶ້ນ; ພ້ອມນີ້, ຝ່າຍໄທກໍພ້ອມໃຫ້ການສະໜັບສະໜູນຄວາມຊ່ວຍເຫລືອທາງວິຊາການໃນການພັດທະນາຊັບພະຍາກອນມະນຸດ, ມີບົດຮຽນການພັດທະນາຊຸມຊົນ, ການສ້າງເສດຖະກິດພໍພຽງ, ການຂົນສົ່ງໂດຍ Logistic; ການຜະລິດກະສິກໍາ ທີ່ເຮັດເປັນສະມາຄົມ ແລະ ສະຫະກອນ; ການຜະລິດສິນຄ້າ SMEs (OTOP) ທີ່ດີ.
ພ້ອມນີ້, ທ່ານເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ໄດ້ສະແດງຄວາມຍິນດີ ແລະ ຂອບໃຈທີ່ໄດ້ໃຫ້ການຮ່ວມມື ລະຫວ່າງ ສປປ ລາວ– ຣາຊະອານາຈັກໄທ ແລະ ອຳນວຍຄວາມສະດວກໃນວຽກງານຫລາຍດ້ານເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດໃນຕໍ່ໜ້າ. ສອງປະເທດຈະສືບຕໍ່ເປີດກວ້າງການສະໜັບສະໜູນ, ແລກປ່ຽນບົດຮຽນ-ຂໍ້ມູນຂ່າວສານຊຶ່ງກັນ ແລະ ກັນ ແລະ ການຮ່ວມມື ເພື່ອເສີມຂະຫຍາຍການຄ້າ ແລະ ການລົງທຶນໃຫ້ນັບມື້ເພີ່ມຂຶ້ນ.
