ໝາກເຜັດຫວານ 3 ສີ ຕ້ານມະເຮັງ ປ້ອງກັນພະຍາດຫົວໃຈ ຫລຸດຄວາມສ່ຽງຈໍປະສາດຕາເສື່ອມ

ໝາກເຜັດຫວານ ຫລື ໝາກເຜັດໃຫຍ່ທີ່ເຮົາຮູ້ຈັກກັນນີ້ ນອກຈາກຈະບໍ່ເຜັດ, ກິນງ່າຍ ແລະ ອຸດົມໄປດ້ວຍວິຕາມິນ A, B1, B2, C, ທາດເຫລັກ ແລະ ໂພແທັດຊຽມ, ແຄລໍຣີ່ຕໍ່າ ແລະ ມີໄຟເບີສູງ ເຊິ່ງດີຕໍ່ລະບົບຂັບຖ່າຍ ແລະ ຊ່ວຍຫລຸດນໍ້າໜັກ, ບໍາລຸງຜິວ ແລະ ບໍາລຸງເສັ້ນຜົມໃຫ້ແຂງແຮງອີກດ້ວຍ

.

ນອກຈາກນີ້ໝາກເຜັດຫວານ ຫລື ໝາກເຜັດໃຫຍ່ ແຕ່ລະສີຍັງມີຄຸນປະໂຫຍດຕ່າງກັນດັ່ງນີ້:

.

– ສີຂຽວ

ມີສານອາຫານສໍາຄັນເຊັ່ນ ຄໍໂຣຟິວ ມີຜົນຊ່ວຍໃນການຢັບຢັ້ງການເກີດຊີ້ນປົ່ງທີ່ເຕົ້ານົມ, ຫລຸດຄວາມສ່ຽງຂອງມະເຮັງຕັບ, ຊ່ວຍເພີ່ມຈໍານວນ ແລະ ປະສິດທິພາບການເຮັດວຽກຂອງເມັດເລືອດຂາວ, ຊ່ວຍຂັບໄລ່ສານພິດອອກຈາກຮ່າງກາຍ, ຊ່ວຍຫລຸດກິ່ນເໝັນຕາມຕົວ, ກິ່ນຈາກການຖ່າຍໜັກ ແລະ ຖ່າຍເບົາ, ຊ່ວຍໃຫ້ບາດແຜເທິງຜິວໜັງທີ່ເກີດຈາກການສາຍແສງ ເພື່ອຮັກສາມະເຮັງໃຫ້ເຊົາໄວຂຶ້ນອີກດ້ວຍ

.

– ສີເຫລືອງ

ມີສານອາຫານສໍາຄັນຄື ລູທີນ: ຊ່ວຍບໍາລຸງສາຍຕາ ເຮັດໃຫ້ເຫັນພາບຊັດເຈນຂຶ້ນ, ຫລຸດຄວາມສ່ຽງຂອງປະສາດຕາເສື່ອມ ແລະ ການເກີດຕາຕໍ້, ປົກປ້ອງດວງຕາຈາກແສງແດດ-ແສງສີຟ້າ, ບັນເທົາອາການອັກເສບຂອງດວງຕາ ແລະ ຖ້າເປັນແມ່ມານ ຈະຊ່ວຍປ້ອງກັນພາວະສາຍຕາສັ້ນ (myopia) ແລະ ອາການຜິດປົກກະຕິຂອງດວງຕາເດັກນ້ອຍໃນທ້ອງ (ROP)

.

– ສີແດງ

ມີສານອາຫານສໍາຄັນຄື ເບຕ້າແຄໂຣທີນ: ເຮັດໜ້າທີ່ເປັນສານຕ້ານອະນຸມູນອິດສະຫລະ, ເສີມລະບົບພູມຄຸ້ມກັນໃຫ້ແຂງແຮງ ສູ້ໄຂ້ຫວັດ, ປ້ອງກັນພະຍາດຮ້າຍເຊັ່ນ ມະເຮັງເຕົ້ານົມ, ມະເຮັງກະເພາະອາຫານ, ພະຍາດຫົວໃຈ,​ ຢັບຢັ້ງການເສື່ອມສະພາບຂອງສະໝອງ ແລະ ຄວາມຊົງຈໍາ, ຊ່ວຍປົກປ້ອງຜິວຈາກແສງແດດ, ບໍາລຸງຜິວພັນ ແລະ ເສັ້ນຜົມໃຫ້ແຂງແຮງ ແລະ ຍັງຫລຸດຄວາມສ່ຽງຈໍປະສາດຕາເສື່ອມຄືກັນກັບສີເຫລືອງອີກດ້ວຍ

.

ໝາກເຜັດຫວານສາມາດນໍາໄປປະກອບອາຫານໄດ້ຫລາຍເມນູ ຫລື ຈະກິນສົດກໍໄດ້ເຊັ່ນກັບ ແລະ ຍັງໄດ້ສານອາຫານຄົບຖ້ວນແບບນີ້ ຕ້ອງຫາມາກິນແລ້ວ~

.

ຂໍ້ມູນຈາກ Healthline, ຄະນະເພສັດສາດ ມະວິທະຍາໄລມະຫິດົນ