ສຶກສາອົບຮົມໄວໜຸ່ມດັດແປງສະພາບເຕັກນິກລົດ ທີ່ສ້າງຄວາມລຳຄານໃຫ້ແກ່ສັງຄົມ

ວັນທີ 15 ມິຖຸນາ 2023 ຜ່ານມາ, ເຈົ້າໜ້າທີ່ພະແນກຈະລາຈອນ ປກສ ແຂວງອຸດົມໄຊ ໄດ້ສຶກສາອົບຮົມກ່າວເຕືອນຜູ້ທີລະເມີດກົດລະບຽບຈະລາຈອນ ເປັນຕົ້ນແມ່ນການດັດແປງສະພາບເຕັກນິກລົດ ຈຳນວນ 8 ຄົນ ພ້ອມກັກພາຫະນະດັດແປງສະພາບ ຈຳນວນ 15 ຄັນ.

ທ່ານ ຮອ ພູລົມ ຈັນຕິສຸກ ຮອງພະແນກຕຳຫຼວດຈະລາຈອນ ປກສ ແຂວງອຸດົມໄຊ ໄດ້ໃຫ້ຮູ້ວ່າ: ຕະຫຼອດໄລຍະຜ່ານມາ ເຈົ້າໜ້າທີ່ວິຊາສະເພາະໄດ້ສຸມໃສເຄື່ອນໄຫວລົງໂຄສະນາ ເຜີຍແຜ່ບັນດານິຕິກຳ ກ່ຽວກັບຂໍ້ກຳນົດ ກົດລະບຽບການສັນຈອນຢູ່ໃນຂອບເຂດຊຸມຊົນ ແລະ ສະຖາບັນການສຶກສາຢູ່ຫຼາຍແຫ່ງ ທັງຢູ່ພາຍໃນເທສະບານແຂວງ ແລະ ເມືອງຢ່າງເປັນປົກກະຕິຕໍ່ເນື່ອງ ຕິດພັນກັບສຶກສາອົບຮົມການເມືອງແນວຄິດ ໃຫ້ແກ່ຜູ້ຂັບຂີ່ຍານພາຫະນະໄດ້ຮັບຮູ້ເຂົ້າໃຈ ແລະ ເຊື່ອມຊຶມນິຕິກຳຕ່າງໆຢ່າງເລິກເຊິງ ເຮັດໃຫ້ບັນຫາອຸບັດເຫດຕາມທ້ອງຖະໜົນຫລຸດໜ້ອຍຖອຍລົງ, ຜູ້ໃຊ້ລົດໃຊ້ຖະໜົນລວມເຖິງປະຊາຊົນບັນດາເຜົ່າ ໄດ້ໃຫ້ການສະໜັບສະໜູນ ແລະ ໃຫ້ການຮ່ວມມືປະຕິບັດຢ່າງເຂັ້ມງວດ, ແຕ່ຍັງມີກຸ່ມຄົນຈຳນວນໜຶ່ງ ຍັງສືບຕໍ່ເຄື່ອນໄຫວລະເມີດຕໍ່ລະບຽບທີ່ໄດ້ກຳນົດ ພາເກີດມີບັນຫາຫຍໍ້ທໍ້ດ້ວຍຫຼາຍກໍລະນີ ເຊັ່ນ: ມີການດັດແປງສະພາບເຕັກນິກລົດ ພາໃຫ້ມີຄວາມສ່ຽງຕໍ່ການເກີດອຸບັດເຫດ, ໃສ່ຢາງລໍ້ນ້ອຍເກີນຂະໜາດ, ດັດແປງທໍ່ໃຊ້ສຽງດັງກວນເມືອງ, ສ້າງຄວາມລຳຄານໃຫ້ແກ່ສັງຄົມ ແລະ ອື່ນໆທີ່ບໍ່ປອດໄພ, ໃນນີ້ໄດ້ກວດກາ ແລະ ກັກພາຫະນະລົດຈັກດັດແປງສະພາບ ຈໍານວນ 15 ຄັນ ພ້ອມພາກສ່ວນທີ່ລະເມີດມາດຳເນີນການສຶກສາອົບຮົມກ່າວເຕືອນ ວາງມາດຕະການຕໍ່ພາກສ່ວນດັ່ງກ່າວໃຫ້ປ່ຽນແປງພຶດຕິກຳ, ປ່ຽນແປງສະພາບເຕັກນິກລົດໃຫ້ເປັນສະພາບປົກກະຕິ, ສ່ວນອາໄລ່ທີ່ດັດແປງສະພາບແມ່ນຢຶດທຳລາຍຖິ້ມຕາມລະບຽບການທີ່ໄດ້ກຳນົດ.