ຮອງປະທານປະເທດ ຕີລາຄາສູງຕໍ່ຜົນສຳເລັດປະຕິບັດໜ້າທີ່ການທູດສິງກະໂປ ຢູ່ ສປປ ລາວ ມີບາດກ້າວຂະຫຍາຍສາຍພົວພັນຮ່ວມມື

ວັນທີ 22 ມິຖຸນາ 2023 ນີ້, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບ ທ່ານ ນາງ ລຽວ ຊິວ ລິນ (Leow Siu Lin) ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສາທາລະນລັດ ສິງກະໂປ ປະຈຳລາວ ເຂົ້າຢ້ຽມຂໍ່ານັບອຳລາໃນໂອກາດທີ່ສຳເລັດການປະຕິບັດໜ້າທີ່ການທູດ ຢູ່ ສປປ ລາວ.

ໂອກກາດນີ້, ທ່ານຮອງປະທານປະເທດ ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງຕໍ່ ທ່ານ ນາງ ລຽວ ຊິວ ລິນ ທີ່ປະສົບຜົນສຳເລັດໃນການປະຕິບັດໜ້າທີ່ການທູດ ປະຈຳ ສປປ ລາວ ຊຶ່ງຕະຫລອດໄລຍະປະຕິບັດໜ້າທີ່ທ່ານທູດໄດ້ເອົາໃຈໃສ່ຢ່າງຕັ້ງໜ້າເຂົ້າໃນການປະກອບສ່ວນເສີມຂະຫຍາຍສາຍພົວພັນອັນດີງາມ ແລະ ເປັນມູນເຊື້ອລະຫວ່າງ ລາວ ແລະ ສິງກະໂປ ທີ່ມີມາແຕ່ດົນນານໃຫ້ນັບມື້ມີບາດກ້າວຂະຫຍາຍຕົວຂຶ້ນຢ່າງບໍ່ຢຸດຢັ້ງ. ພ້ອມນີ້, ທ່ານຮອງປະທານປະເທດ ຍັັງໄດ້ອອຍພອນໃຫ້ທ່ານທູດ ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສຳ ເລັດໃນໜ້າທີ່ໃໝ່ອັນມີກຽດຂອງທ່ານ.

ທ່ານທູດໄດ້ສະແດງຄວາມຂອບໃຈຕໍ່ ທ່ານ ນາງ ປານີ ຢາທໍ່ຕູ້ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈຕໍ່ການຈັດຕັ້ງທຸກຂັ້ນ ຂອງ ສປປ ລາວ ທີ່ໄດ້ໃຫ້ຄວາມຮ່ວມມື ແລະ ອຳນວຍຄວາມສະດວກໃນໄລຍະການປະຕິບັດໜ້າທີ່ການທູດ ປະຈຳ ສປປ ລາວ ຈົນໄດ້ຮັບຜົນສຳເລັດເປັນຢ່າງດີ.

ລາວ-ສິງກະໂປ ໄດ້ສ້າງຕັ້ງສາຍພົວພັນການທູດ ໃນວັນທີ 2 ທັນວາ 1974, ການລົງທຶນ ແລະ ການຄ້າລາວ-ສິງກະໂປ ໂດຍສະເພາະດ້ານການລົງທຶນມາເຖິງປີ 2022 ມູນຄ່າການລົງທຶນຂອງ ສິງກະໂປ ຢູ່ລາວ ແມ່ນມີ 362 ລ້ານໂດລາ, ລວມມີ 83 ໂຄງການ, ຈັດເປັນອັນດັບທີ 10 ຂອງການລົງທຶນຕ່າງປະເທດລາຍໃຫຍ່ຢູ່ ສປປ ລາວ, ດ້ານການຄ້າສອງຝ່າຍນັບແຕ່ປີ 2018-2022 ແມ່ນມີມູນຄ່າ 451,4 ລ້ານໂດລາ, ນຳເຂົ້າສິນຄ້າຈາກສິງກະໂປປະມານ 176,8 ລ້ານໂດລາ, ຈັດເປັນອັນດັບທີ 7 ຂອງການນຳເຂົ້າສິນຄ້າຢູ່ລາວ ໂດຍລວມມີຜະລິດຕະພັນຢາສູບ, ອຸປະກອນກົນຈັກ, ນໍ້າຫອມ, ເຄື່ອງສຳອາງ, ຊິ້ນສ່ວນອາໄຫລ່ລົດ, ນໍ້າມັນກາຊວນ ແລະ ອື່ນໆ. ລາວສົ່ງອອກສິນຄ້າໄປສິງກະໂປ ມີມູນຄ່າປະມານ 274,6 ລ້ານໂດລາ ຈັດເປັນອັນດັບທີ 5 ຂອງການສົ່ງອອກສິນຄ້າຂອງລາວເປັນຕົ້ນແມ່ນແກ້ວ ແລະ ເຄື່ອງທີ່ເຮັດດ້ວຍແກ້ວ, ຢາສູບ, ເຫລົ້າ, ເບຍ, ວາຍ, ເຄື່ອງໃຊ້ໄຟຟ້າ, ກາເຟ (ບໍ່ທັນໄດ້ປຸງແຕ່ງ) ແລະ ອື່ນໆ.

ສໍາລັບ ສະຖິຕິນັກທ່ອງທ່ຽວຂອງສິງກະໂປ ທີ່ເດີນທາງເຂົ້າມາລາວ ໃນສົກປີ 2022 ຜ່ານມາມີ 5.012 ຄົນ, ສິງກະໂປ ໄດ້ຈັດຫລັກສູດຝຶກອົບຮົມພາສາອັງອິດ, ຝຶກອົບຮົມໄລຍະສັ້ນ, ທຶນຮຽນຕໍ່ລະດັບມັດທະຍົມຕອນປາຍ ແລະ ທຶນລະດັບປະລິນຢາຕີ ແກ່ ສປປ ລາວ ແຕ່ປີ 1993-2022 ຈຳນວນທັງໝົດ 16.580 ເທື່ອຄົນ.