ຍີ່ປຸ່ນ ຟອມດີຕໍ່ເນື່ອງ ຊະນະ 6 ນັດລວດ! ບານສົ່ງໃນຮົ່ມຊາຍ ເນຊັ່ນລີກ 2023
June 22, 2023 - 1:30 PM
ການແຂ່ງຂັນບານສົ່ງໃນຮົ່ມຊາຍລະດັບໂລກ ລາຍການ FIVB ເນຊັ່ນລີກ ປະຈຳປີ 2023 ການແຂ່ງຂັນອາທິດທີ 2 ກຸ່ມທີ 4 ແຂ່ງທີ່ອໍເຣອ໋ອງ ປະເທດຝຣັ່ງ, ຍີ່ປຸ່ນ ຜົນງານດີຕໍ່ເນື່ອງ ຄວ້າໄຊຊະນະ 6 ນັດລວດ ຫລ້າສຸດຊະນະ ຄິວບາ (ກູບ້າ) 3–0 ເຊັດ: 25–21, 25–16 ແລະ 25–21. ຂະນະທີ່ ຝຣັ່ງ ແຊ້ມເກົ່າ ຖືກ ອາເຈນຕິນ້າ (ອາກຊັງຕິນ) ແຊງຊະນະ 3–1 ເຊັດ, ສະໂລເວເນຍ (ສະໂລເວນີ້) ຊະນະ ແຄນນາດາ (ການາດ້າ) 3–0 ເຊັດ.
ກຸ່ມທີ 3 ແຂ່ງທີ່ຣັອດເຕີດຳ ປະເທດເນເທີແລນ (ໂຮນລັງ): ສະຫະລັດ ອາເມຣິກາ ຮອງແຊ້ມຄັ້ງຜ່ານມາ ຊະນະ ສປ ຈີນ 3–0 ເຊັດ, ອີຕາລີ ຊະນະ ອີຣານ 3–0 ເຊັດ ແລະ ໂປແລນ (ໂປໂລຍ) ຊະນະ ເຢຍລະມັນ 3–2 ເຊັດ.
ສະຫລຸບຕາຕະລາງອັນດັບປັດຈຸບັນ ຍີ່ປຸ່ນ ເປັນທີມນຳ ຊະນະ 6 ນັດລວດ, ຮອງລົງມາແມ່ນ ສະຫະລັດ ອາເມຣິກາ, ສະໂລເວເນຍ ຊະນະ 5 ເສຍ 1, ເບຣຊິນ, ໂປແລນ ຊະນະ 4 ເສຍ 1, ອາເຈນຕິນ້າ ຊະນະ 4 ເສຍ 2, ເນເທີແລນ, ອີຕາລີ ຊະນະ 3 ເສຍ 2, ອີຣານ ຊະນະ 2 ເສຍ 4, ເຊີເບຍ (ແຊັກບີ້) ຊະນະ 2 ເສຍ 3, ເບົາເກເຣຍ (ບຸນກາຣີ້), ຝຣັ່ງ, ຄິວບາ ຊະນະ 1 ເສຍ 4, ເຢຍລະມັນ, ການາດ້າ ແລະ ຈີນ ຊະນະ 1 ເສຍ 5.
ສຳລັບການແຂ່ງຂັນບານສົ່ງໃນຮົ່ມຊາຍ ເນຊັ່ນລີກ 2023 ມີ 16 ທີມເຂົ້າຮ່ວມ, ຮູບແບບການແຂ່ງຂັນໃນຮອບຄັດເລືອກ ທຸກທີມໄດ້ພົບກັນໝົດ ໂດຍແບ່ງການແຂ່ງຂັນອອກເປັນ 3 ອາທິດ, ທີມໜຶ່ງຕ້ອງແຂ່ງໃຫ້ສຳເລັດ 12 ນັດ ແລ້ວຄັດເອົາທີ 1–8 ໄປແຂ່ງຂັນຮອບສຸດທ້າຍທີ່ປະເທດໂປໂລຍ ໃນລະຫວ່າງວັນທີ 19–23 ກໍລະກົດ 2023, ສ່ວນການຄັດເລືອກຈະສຳເລັດໃນວັນທີ 9 ກໍລະກົດ 2023.
ຂ່າວ: ຂ່າວກິລາ Lao National TV
