ພົບຢາບ້າ 5.494.000 ເມັດ ໃນລົດຟໍຈູນເນີ ທີ່ເກີດອຸບັດເຫດຢູ່ບ້ານສີຫອມ

ທ່ານ ພັນໂທ ພອນໃຈ ພາມຸງຄຸນ ຮອງຫົວໜ້າກອງບັນຊາການ ປກສ ເມືອງຈັນທະບູລີ ໃຫ້ສຳພາດໃນລາຍການວາລະແຫ່ງຊາດ ແກ້ໄຂບັນຫາຢາເສບຕິດ ຂອງໂທລະພາບນະຄອນຫລວງວຽງຈັນ ວັນທີ 21 ມິຖຸນາ 2023 ວ່າ: ເວລາປະມານ 12 ໂມງກາງຄືນ ຂອງວັນທີ 15 ມິຖຸນາ 2023 ກອງບັນຊາການ ປກສ ເມືອງຈັນທະບູລີ ນະຄອນຫລວງວຽງຈັນ ໄດ້ຮັບແຈ້ງອຸບັດເຫດທີ່ເກີດຂຶ້ນຢູ່ທີ່ບ້ານສີຫອມ ເມືອງຈັນທະບູລີ ຈຶ່ງແຕ່ງຕັ້ງທີມງານລົງພື້ນທີ່ເພື່ອເກັບກຳຂໍ້ມູນພົບວ່າ: ອຸບັດເຫດຄັ້ງນີ້ ເປັນລົດຟໍຈຸນເນີ ສີເທົາ ປ້າຍທະບຽນ ລພ 5665 ກຳແພງນະຄອນ ຕໍາກັບລົດເກງແລ້ວໄປຕຳໃສ່ລົດກະບະຟອດ ຈົນເຮັດໃຫ້ລົດຟໍຈູນເນີປີ້ນ.

ໃນເຫດການດັ່ງກ່າວ ເຈົ້າໜ້າທີ່ຍັງໄດ້ພົບ ສິ່ງຜິດກົດໝາຍ ຢາເສບຕິດປະເພດ ຢາບ້າ 28 ເປົາ ຈຳນວນ 5.494.000 ເມັດ ຢູ່ພາຍໃນລົດຟໍຈູນເນີຄັນດັ່ງກ່າວນັ້ນ,  ສ່ວນຜູ້ຂັບລົດຟໍຈູນເນີໄດ້ເອົາຕົວຫລົບໜີ  ເຊິ່ງປັດຈຸບັນ ເຈົ້າໜ້າທີ່ສາມາດຈັບກຸມຕົວຜູ້ຮ່ວມຂະບວນການໄດ້ແລ້ວຈຳນວນໜຶ່ງ ແລະ ກຳລັງຢູ່ໃນຂັ້ນຕອນສືບສວນສອບສວນຂະຫຍາຍຜົນຫາຜູ້ຮ່ວມຂະບວນການຄ້າຂາຍຢາເສບຕິດຄັ້ງນີ້ມາດຳເນີນຕາມລະບຽບກົດໝາຍ.