ອາເຊນອລ ສົມຫວັງຄວ້າໂຕ ຮາແວດ ຮ່ວມທີມຄ່າໂຕ 65 ລ້ານປອນ

ອາເຊນອລ ໄດ້ບັນລຸຂໍ້ຕົກລົງເຊັນສັນຍາກັບ ໄຄ ຮາແວດ ກອງໜ້າຂອງ ເຊວຊີ ມາຮ່ວມທີມໃນມູນຄ່າ 65 ລ້ານປອນ.

ອີງຕາມການລາຍງານຂອງ David Ornstein, ເຜີຍວ່າຂໍ້ສະເຫນີລາຄາ 65 ລ້ານປອນຂອງ ປືນໃຫຍ່ ໄດ້ຖືກຕົກລົງໃນເບື້ອງຕົ້ນເປັນທີ່ຮຽບຮ້ອຍ. ໃນຂະນະທີ່ສັນຍາເອກະຊົນໄດ້ຕົກລົງກັນກ່ອນຫນ້ານັ້ນ ກອງກາງທີມຊາດເຢຍລະມັນກຽມເດີນທາງໄປກວດຮ່າງກາຍກັບຕົ້ນສັງກັດໃໝ່ກ່ອນເປີດໂຕຢ່າງເປັນທາງການ.

ຢ່າງໃດກໍ່ຕາມ, ອາເຊນອລ ກໍາລັງເດີນໜ້າເສີມທັບຄັ້ງໃຫຍ່ໃນຕະຫລາດລະດູຮ້ອນນີ້. ໂດຍພວກເຂົາມີອີກ 2 ເປົ້າໝາຍໃນການໄລ່ລ່າ ດີແຄນ ໄຣສ໌ ທີ່ກຽມຈະຍື່ນຂໍ້ສະເໜີລາຄາຮອບທີສາມ, ແລະ ຈູເຣນ ທິມເບີ ກອງຫລັງຂອງ ອາແຈັກ.