ສາລະວັນ ຍັງມີແພດອາສາສະໝັກຈຳນວນຫລາຍ ເພື່ອລໍຖ້າເຂົ້າເປັນລັດຖະກອນ

​ທ່ານ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກ ແຂວງສາລະວັນ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 16 ມິຖຸນາ 2023 ຜ່ານມາວ່າ: ມາຮອດປັດຈຸບັນ, ຢູ່ແຂວງສາລະວັນ ຍັງເຫລືອແພດອາສາສະໝັກທັງໝົດ 300 ກວ່າຄົນ, ເຊີ່ງອົງການປົກຄອງແຂວງພວມຫາວິທີແກ້ໄຂ ເພື່ອເຮັດໃຫ້ເຂົາເຈົ້າໄດ້ປະກອບສ່ວນເຂົ້າໃນການບໍລິການເບິ່ງແຍງສຸຂະພາບຂອງປະຊາຊົນທັງຢູ່ຂັ້ນແຂວງ, ເມືອງ ແລະ ໂຮງໝໍນ້ອຍຢູ່ແຕ່ລະທ້ອງຖິ່ນພາຍໃນແຂວງ. ແພດອາສາສະໝັກທີ່ຍັງເຫລືອທັງໝົດນີ້, ຂະແໜງສາທາລະນະສຸກແຂວງ ກໍຄື ອົງການປົກຄອງແຂວງ ໄດ້ເອົາໃຈໃສ່ຊຸກຍູ້ ແລະ ປຸກລະດົມເຂົາ ເຈົ້າໃຫ້ປະກອບສ່ວນປະຕິບັດໜ້າທີ່ຂອງຕົນ ເພື່ອບໍລິການເບິ່ງແຍງສຸຂະພາບຂອງປະຊາຊົນຢູ່ຈຸດທີ່ຕົນເອງໃຫ້ບໍລິການ, ນັບທັງຂັ້ນແຂວງ, ເມືອງ ແລະ ໂຮງໝໍນ້ອຍ ຢ່າງຕໍ່ເນື່ອງ, ພ້ອມນີ້ ໄດ້ຄັດເລືອກເພື່ອບັນຈຸເຂົ້າເປັນລັດຖະບານຕາມຕົວເລກທີ່ ກະຊວງສາທາລະນະສຸກ ກໍຄື ລັດຖະບານ ແບ່ງປັນໃຫ້ໃນແຕ່ລະປີ.

​ທ່ານໃຫ້ຮູ້ຕື່ມວ່າ: ໃນໄລຍະປະຕິບັດວຽກງານ ເພື່ອລໍຖ້າເຂົ້າເປັນລັດຖະກອນຕາມຕົວເລກທີ່ລັດຖະບານແບ່ງປັນໃຫ້, ຂະແໜງສາທາລະນະສຸກແຂວງ ແລະ ເມືອງທີ່ກ່ຽວຂ້ອງ ໄດ້ມີນະໂຍບາຍໃຫ້ຄູອາສາສະໝັກຫລາຍຢ່າງ, ນັບທັງນະໂຍບາຍໃນການເວນຍາມ, ນະໂຍບາຍໃນເວລາລົງເຄື່ອນໄຫວປະຕິບັດກິດຈະກໍາຢູ່ແຕ່ລະຈຸດສຸມ ເປັນຕົ້ນ: ການເຄື່ອນໄຫວສັກຢາ, ການເຄື່ອນໄຫວໂຄສະນາຂະບວນການເພື່ອປ້ອງກັນພະຍາດໄຂ້ເລືອດອອກ ຫລື ພະຍາດຕ່າງໆ ແລະ ກິດຈະກໍາອື່ນໆ ໄດ້ມີອັດຕາກິນ ແລະ ຄ່ານໍ້າມັນລົດຕາມອັດຕາທີ່ລັດຖະບານກໍານົດ.