ອາເຊນອລ ຍື່ນ 30 ລ້ານປອນ ທາບ ຢູຣຽນ ຕິມເບີ ເຕີມເກມຮັບ
June 20, 2023 - 10:36 PM




ອາເຊນອລ ຕົກເປັນຂ່າວວ່າໄດ້ຍື່ນຂໍ້ສະເໜີຈຳນວນ 30 ລ້ານປອນ ເພື່ອປິດການຊື້ຂາຍ ຢູຣຽນ ຕິມເບີ ກອງຫລັງ ອາແຈັກ ອຳເຕີດຳ ມາຮ່ວມທີມ ພ້ອມສາມາດບັນລຸຂໍ້ຕົກລົງສ່ວນຕົວກັບນັກເຕະໄດ້ແລ້ວ.
ສຳລັບ ຕິມເບີ ມີຂ່າວເຊື່ອມໂຍງເລື່ອງການຍ້າຍທີມໃນຕະຫລາດໜ້າຮ້ອນນີ້ ໂດຍມີ ແມນເຊສເຕີ ຢູໄນເຕັດ ແລະ ລີເວີພູລ ຈັບຕາສະຖານະການຢູ່ ແຕ່ວ່າຍັງບໍ່ມີການຍື່ນຂໍ້ສະເໜີຢ່າງເປັນທາງການ.
ແນວໃດກໍຕາມຫລ້າສຸດ ເດວິດ ອອນສະຕິນ ນັກຂ່າວຈາກ The Athletic ເປີດເຜີຍວ່າ ອາເຊນອລ ກາຍເປັນທີມທີ່ປາດໜ້າໃນການຍື່ນຂໍ້ສະເໜີຈຳນວນ 30 ລ້ານປອນ ໃຫ້ກັບ ອາແຈັກ ເພື່ອຫວັງເຊັນສັນຍາກັບ ຕິມເບີ ມາເສີມທີມ ພ້ອມມີລາຍງານວ່າພວກເຂົາສາມາດບັນລຸຂໍ້ຕົກລົງສ່ວນຕົວກັບດາວເຕະອາຍຸ 22 ປີ ລາຍນີ້ໄດ້ແລ້ວ.
ແຕ່ ອາແຈັກ ກໍຕ້ອງການຄ່າຕົວຂອງ ທິມເບີ ທີ່ 50 ລ້ານປອນ ແນວໃດກໍຕາມເຊື່ອວ່າທັງ 2 ສະໂມສອນສາມາດປະນີປະນອມເລື່ອງຄ່າຕົວກັນໄດ້.