5 ຍຸດທະສາດການພັດທະນາແຮ່ທາດ 10 ປີ ແລະ ວິໄສທັດຮອດປີ 2035 ເພື່ອພັດທະນາເປັນອຸດສາຫະກໍາ-ທັນສະໄໝ, ສີຂຽວ ແລະ ຍືນຍົງ
ສະພາແຫ່ງຊາດ ຮ່ວມກັບ ກະຊວງພະລັງງານ ແລະ ບໍ່ແຮ່ ຈັດກອງປະຊຸມເປີດກວ້າງທາບທາມຄວາມຄິດເຫັນຕໍ່ (ຮ່າງ) ຍຸດທະສາດການພັດທະນາແຮ່ທາດ 10 ປີ (2021-2030) ແລະ ວິໄສທັດຮອດປີ 2035 ໃນວັນທີ 19 ມິຖຸນາ 2023 ຢູ່ເມືອງ ວັງວຽງ ແຂວງ ວຽງຈັນ, ເປັນປະທານຮ່ວມຂອງທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ລິນຄຳ ດວງສະຫວັນ ປະທານກຳມະທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ.
ໄລຍະຜ່ານມາ ລັດໄດ້ຊຸກຍູ້, ສົ່ງເສີມໃຫ້ມີການພັດທະນາວຽກງານແຮ່ທາດ ດ້ວຍການກໍານົດຍຸດທະສາດກາພັດທະນາແຮ່ທາດ, ແຜນພັດທະນາແຮ່ທາດ ໃນການຊອກຄົ້ນ, ສໍາຫລວດ, ຂຸດຄົ້ນ ແລະ ປຸງແຕ່ງແຮ່ທາດ, ຕິດພັນກັບການຄຸ້ມຄອງການນໍາໃຊ້ແຮ່ທາດຢ່າງປະຢັດ, ມີປະສິດທິພາບ ແລະ ປະສິດທິຜົນສູງຕາມທິດພັດທະນາເປັນອຸດສາຫະກໍາ ແລະ ທັນສະໄໝ, ສີຂຽວ ແລະ ຍືນຍົງ.
ຍຸດທະສາດການພັດທະນາແຮ່ທາດ ແມ່ນການວາງແຜນທີ່ມີເປົ້າໝາຍ, ຄາດໝາຍ ແລະ ຈຸດສຸມທີ່ມີລັກສະນະເປັນລະບົບ ແລະ ຕໍ່ເນື່ອງ ໂດຍໄດ້ຄົ້ນຄວ້າ ແລະ ສ້າງຂຶ້ນສອດຄ່ອງຕາມກົດໝາຍ, ນະໂຍບາຍ ແລະ ແຜນພັດທະນາ ເສດຖະກິດສັງຄົມແຫ່ງຊາດໃນແຕ່ລະໄລຍະ ລວມທັງ ແນວໂນ້ມ ແລະ ສິ່ງທ້າທາຍຕໍ່ການພັດທະນາແຮ່ທາດ ຢູ່ພາຍໃນ ປະເທດ, ພາກພື້ນ ແລະ ສາກົນ. ການສ້າງຍຸດທະສາດການພັດທະນາແຮ່ທາດ ແມ່ນອີງໃສ່ຫລັກການພື້ນຖານ ຕາມທີກໍານົດໄວ້ໃນມາດຕາ 13 ຂອງກົດໝາຍວ່າດ້ວຍແຮ່ທາດ ຄື:
- ສອດຄ່ອງກັບຍຸດທະສາດການພັດທະນາເສດຖະກິດ-ສັງຄົມແຫ່ງຊາດ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຄວາມປອດໄພ;
- ຮັບປະກັນຄວາມສົມດູນ ລະຫວ່າງ ການສະຫງວນ ແລະ ການຂຸດຄົ້ນ, ການນໍາໃຊ້ຢ່າງປະຢັດ ແລະ ມີປະສິດທິຜົນຕາມທິດສີຂຽວ ແລະ ຍືນຍົງ;
- ນໍາໃຊ້ຜົນການສໍາຫລວດທໍລະນີສາດ ແລະ ແຮ່ທາດ ຂັ້ນພື້ນຖານ;
- ຮັບປະກັນການສະໜອງແຮ່ທາດ ແລະ ຜະລິດຕະພັນແຮ່ທາດຢູ່ພາຍໃນ ແລະ ສົ່ງອອກຕ່າງປະເທດ ເພື່ອພັດທະນາເສດຖະກິດ-ສັງຄົມ;
- ສອດຄ່ອງ ກັບສັນຍາສາກົນ ແລະ ສົນທິສັນຍາທີ່ ສປປ ລາວ ເປັນພາຄີ. ຍຸດທະສາດການພັດທະນາແຮ່ທາດ ປະກອບດ້ວຍ 4 ພາກ, 6 ເປົ້າໝາຍ, 31 ຄາດໝາຍ ແລະ 49 ວຽກຈຸດສຸມ.
ຮ່າງຍຸດທະສາດການພັດທະນາແຮ່ທາດ 2021-2030 ແລະ ວິໄສທັດ ຮອດປີ2035 ສະບັບນີ້, ມາຮອດປະຈຸບັນໄດ້ຜ່ານກອງປະຊຸມລັດຖະບານ 2 ຄັ້ງ ແລະ ກອງປະຊຸມຍົກສູງຄຸນນະພາບທາງດ້ານເນື້ອໃນ ຖືວ່າໄດ້ດໍາເນີນຕາມຫລັກການ, ລະບຽບການ ແລະ ຂັ້ນຕອນ ຂອງການສ້າງນິຕິກໍາ ຢ່າງຖືກຕ້ອງ ແລະ ຄົບຖ້ວນສົມບູນ. ຕາມແຜນແລ້ວຈະສະເໜີຜ່ານກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະເປີດຂຶ້ນໃນທ້າຍເດືອນ ມິຖຸນາ 2023 ເພື່ອພິຈາລະນາຮັບຮອງຢ່າງເປັນທາງການ.
ທ່ານ ລັດຖະມົນຕີກະຊວງພະລັງງານ ແລະ ບໍ່ແຮ່ ກ່າວວ່າ: ດັ່ງທີ່ພວກເຮົາຮູ້ນໍາກັນແລ້ວວ່າ ສປປ ລາວ ຕັ້ງຢູ່ລະຫວ່າງກາງຂອງຫລາຍໂຄງສ້າງທໍລະນີສາດທີ່ອຸດົມສົມບູນໄປດ້ວຍຊັບໃນດິນສິນໃນນໍ້າ ໂດຍສະເພາະຊັບພະຍາກອນແຮ່ທາດ ທີ່ເປັນການດຶງດູດນັກລົງທຶນ ແລະ ສ້າງລາຍຮັບໃຫ້ແກ່ປະເທດຊາດຂອງ ພວກເຮົາຫລາຍພໍສົມຄວນ. ຜ່ານການຈັດຕັ້ງປະຕິບັດ, ສຶກສາຄົ້ນຄ້ວາ, ຕີລາຄາ ແລະ ຖອດຖອນບົດຮຽນ ຈາກຜົນສໍາເລັດ ແລະ ຈຸດຄົງຄ້າງ ໃນໄລຍະຜ່ານມາ, ບວກກັບການປະເມີນບັນດາທ່າແຮງບົ່ມຊ້ອນ ແລະ ກາລະໂອກາດ ຂອງ ສປປ ລາວ, ພາກພື້ນ ແລະ ສາກົນ ໃນປັດຈຸບັນ ແລະ ວິໄສທັດ ຮອດປີ 2030, ຍຸດທະສາດການພັດທະນາ 2025 ແລະ ແຜນພັດທະນາພະລັງງານ ແລະ ບໍ່ແຮ່ 5 ປີ ຄັ້ງທີ VIII 2016- 2020 ສະບັບເດືອນທັນວາ 2017 ເພື່ອຜັນຂະຫຍາຍບັນດານະໂຍບາຍ, ນິຕິກຳຕ່າງໆທີ່ພວມຫັນໄປສູ່ການຈັດຕັ້ງປະຕິບັດໂດຍເຫັນໄດ້ຄວາມຈໍາເປັນ ແລະ ຄຸນປະໂຫຍດທີ່ສໍາຄັນລັດຈຶ່ງໄດ້ອອກກົດໝາຍວ່າດ້ວຍບໍ່ແຮ່ ສະບັບເລກທ 04/ສພຊ, ລົງວັນທ 12 ເມສາ 1997, ກົດໝາຍວ່າ ດ້ວຍແຮ່ທາດ ສະບັບເລກທ 02/ສພຊ, ລົງວັນທ 20 ທັນວາ 2011 ແລະ ກົດໝາຍວ່າດ້ວຍແຮ່ທາດ (ສະບັບປັບປຸງ) ສະບັບເລກທ 31/ສພຊ, ລົງວັນທ 3 ພະຈິກ 2017. ນອກນັ້ນ, ຍັງໄດ້ມີນິຕິກໍາໃຕ້ກົດໝາຍຈໍານວນໜຶ່ງ ເພື່ອເປັນເຄື່ອງມືຮັບໃຊ້ໃນການຈັດຕັ້ງປະຕິບັດວຽກງານການພັດທະນາແຮ່ທາດ.
ຂໍ້ມູນ: ສູນຂ່າວພະລັງງານ ແລະ ບໍ່ແຮ່
