UN ປະກາດຮັບຮອງສົນທິສັນຍາທະເລຫລວງ “ຄັ້ງປະຫວັດສາດ”
ສະຫະປະຊາຊາດ (UN) ຮັບຮອງສົນທິສັນຍາສາກົນວ່າດ້ວຍການປົກປ້ອງທະເລຫລວງສະບັບທໍາອິດຂອງໂລກ. ຖືເປັນການສ້າງຂໍ້ຕົກລົງດ້ານສິ່ງແວດລ້ອມທີ່ສໍາຄັນ ໂດຍໄດ້ຮັບການອອກແບບມາເພື່ອປົກປ້ອງລະບົບນິເວດທີ່ຢູ່ຫ່າງໄກ ເຊິ່ງມີຄວາມສໍາຄັນຕໍ່ມະນຸດ.
ວັນທີ 20 ມິຖຸນາ, ສໍານັກຂ່າວ AFP ລາຍງານວ່າ: ທ່ານ ອັນໂຕນິໂອ ກູເຕີເຣສ ເລຂາທິການ UN ຍົກຍ້ອງການຮັບຮອງດັ່ງກ່າວວ່າເປັນ “ຜົນສໍາເລັດຄັ້ງປະຫວັດສາດ” ຂອງສົນທິສັນຍາທີ່ຈະກໍານົດຂອບທາງກົດໝາຍ ເພື່ອຂະຫຍາຍການຄຸ້ມຄອງສິ່ງແວດລ້ອມໃຫ້ຄວບຄຸມນ່ານນໍ້າສາກົນ ເຊິ່ງມີພື້ນທີ່ຫລາຍກວ່າ 60% ຂອງມະຫາສະໝຸດໃນໂລກ.
ທັງນີ້, ນັກວິທະຍາສາດຫລາຍຄົນເລີ່ມເນັ້ນໜັກເຖິງຄວາມສໍາຄັນຂອງມະຫາສະໝຸດເພີ່ມຂຶ້ນເລື້ອຍໆ ເພາະເປັນສະຖານທີ່ທີ່ຜະລິດອົກຊີສ່ວນຫລາຍ, ຈໍາກັດການປ່ຽນແປງສະພາບອາກາດ ໂດຍການດູດຊັບແກັສກາກບອນ ແລະ ເປັນພື້ນທີ່ທີ່ມີຄວາມຫລາກຫລາຍທາງຊີວະພາບ ເຊິ່ງມັກຈະຢູ່ໃນລະດັບຈຸລະພາກ.
ເຖິງຢ່າງໃດກໍຕາມ, ເນື່ອງຈາກມະຫາສະໝຸດຫລາຍແຫ່ງຂອງໂລກຢູ່ນອກເຂດເສດຖະກິດສະເພາະຂອງແຕ່ລະປະເທດ, ການຄຸ້ມຄອງສິ່ງທີ່ເອີ້ນວ່າ: “ທະເລຫລວງ” ຈຶ່ງຈໍາເປັນຕ້ອງອາໄສການຮ່ວມມືສາກົນ ສົ່ງຜົນໃຫ້ມັນຖືກລະເລີຍມາດົນ ໃນການຕໍ່ສູ້ດ້ານສິ່ງແວດລ້ອມຫລາຍຄັ້ງ ເພາະຄວາມສົນໃຈສໍາຄັນຢູ່ນໍາພື້ນທີ່ແຄມຝັ່ງ ແລະ ສິ່ງມີຊີວິດ.
ສົນທິສັນຍາດັ່ງກ່າວ ເຊິ່ງຮູ້ຈັກຢ່າງເປັນທາງການໃນຊື່ “ສົນທິສັນຍາວ່າດ້ວຍການຈັດລະບຽບການໃຊ້ຊັບພະຍາກອນພັນທຸກໍາ ແລະ ຄວາມຫລາກຫລາຍທາງຊີວະພາບທາງທະເລໃນພື້ນທີ່ທີ່ຢູ່ນອກເຂດອໍານາດລັດ” ຫລື “BBNJ” ລະບຸຂໍ້ກໍານົດໃນການດໍາເນີນການສຶກສາຜົນກະທົບຕໍ່ສິ່ງແວດລ້ອມ ສໍາລັບກິດຈະກໍາຕ່າງໆທີ່ດໍາເນີນໃນນ່ານນໍ້າສາກົນ ອີກທັງຍັງກໍານົດຫລັກການສໍາລັບການແບ່ງປັນຜົນປະໂຫຍດຂອງ “ຊັບພະຍາກອນພັນທຸກໍາທາງທະເລ” (MGR) ທີ່ຮວບຮວມໂດຍການວິໄຈທາງວິທະຍາສາດໃນນ່ານນໍ້າສາກົນເຊັ່ນກັນ.
