ຂໍ້ຕົກລົງ ວ່າດ້ວຍການກໍານົດອັດຕາແລກປ່ຽນ
ວັນທີ 19 ມິຖຸນາ 2023 ນີ້ ທະນາຄານແຫ່ງ ສປປ ລາວອອກ ຂໍ້ຕົກລົງ ວ່າດ້ວຍການກໍານົດອັດຕາແລກປ່ຽນ ດັ່ງນີ້:
ມາດຕາ 1 ຈຸດປະສົງ
ຜູ້ວ່າການທະນາຄານແຫ່ງສປປ ລາວ ຕົກລົງ:
ຂໍ້ຕົກລົງສະບັບນີ້ກໍານົດລະບຽບການກ່ຽວກັບການກໍານົດອັດຕາແລກປ່ຽນຂອງທະນາຄານແຫ່ງ ສປປ ລາວ ແລະ ທະນາຄານທຸລະກິດ ໃຫ້ສອດຄ່ອງກັບກົນໄກຕະຫຼາດທີ່ມີການຄຸ້ມຄອງຂອງລັດ, ສ້າງເງື່ອນໄຂໃຫ້ລະບົບທະນາຄານສາມາດເຄື່ອນໄຫວບໍລິການແລກປ່ຽນເງິນຕາໄດ້ຢ່າງຄ່ອງຕົວ ເພື່ອປະກອບສ່ວນເຂົ້າໃນການຮັກສາສະຖຽນລະພາບເງິນຕາ.
ມາດຕາ 2 ການກໍານົດອັດຕາແລກປ່ຽນຂອງທະນາຄານແຫ່ງ ສປປ ລາວ
ກົມນະໂຍບາຍເງິນຕາກໍານົດອັດຕາແລກປ່ຽນອ້າງອີງລະຫວ່າງເງິນກີບກັບເງິນໂດລາສະຫະລັດປະຈໍາວັນ ແລະ ແຈ້ງອັດຕາແລກປ່ຽນອ້າງອີງດັ່ງກ່າວ ຜ່ານເວັບໄຊທ໌ຂອງທະນາຄານແຫ່ງ ສປປ ລາວ ພາຍໃນເວລາ 08:10 ໂມງ ເຊົ້າຂອງທຸກໆວັນລັດຖະການ ເພືອໃຫ້ບັນດາທະນາຄານທຸລະກິດນໍາໃຊ້ເປັນບ່ອນອີງໃນການກໍານົດອັດຕາ ແລກປ່ຽນຂອງຕົນ ຕາມທີ່ໄດ້ກໍານົດໄວ້ໃນຂໍ້ຕົກລົງສະບັບນີ້.
ອີງໃສ່ອັດຕາແລກປ່ຽນອ້າງອີງທີ່ກົມນະໂຍບາຍເງິນຕາກໍານົດອອກ, ກົມບໍລິການທະນາຄານກໍານົດອັດຕາ ແລກປ່ຽນສໍາລັບຊື້ ແລະ ຂາຍເງິນກີບ ກັບເງິນໂດລາສະຫະລັດ ແລະ ເງິນຕາຕ່າງປະເທດສະກຸນອື່ນໆ ພ້ອມທັງແຈ້ງອັດຕາແລກປ່ຽນຊື້-ຂາຍດັ່ງກ່າວຂອງຕົນ ຜ່ານເວັບໄຊທ໌ຂອງທະນາຄານແຫ່ງ ສປປ ລາວ ພາຍໃນ ເວລາ 08:30 ໂມງເຊົ້າຂອງທຸກໆວັນລັດຖະການ.
ສໍາລັບການກໍານົດອັດຕາແລກປ່ຽນໃນວັນພັກລັດຖະການ ແມ່ນໃຫ້ຖືເອົາອັດຕາແລກປ່ຽນອ້າງອີງຂອງ ທະນາຄານແຫ່ງ ສປປ ລາວ ທີ່ໄດ້ກໍານົດອອກຫຼ້າສຸດ ກ່ອນວັນພັກລັດຖະການເປັນບ່ອນອີງໃນການຈັດຕັ້ງປະຕິບັດ,
ມາດຕາ 3 ການກໍານົດອັດຕາແລກປ່ຽນຂອງທະນາຄານທຸລະກິດ
ທະນາຄານທຸລະກິດເປັນເຈົ້າການກໍານົດອັດຕາແລກປ່ຽນລະຫວ່າງເງິນກີບກັບເງິນຕາຕ່າງປະເທດສະກຸນຕ່າງໆ
ດ້ວຍຕົນເອງໃນແຕ່ລະວັນ ຕາມຫຼັກການດັ່ງນີ້:
- ກໍານົດອັດຕາແລກປ່ຽນສໍາລັບການຊື້ ຫຼື ຂາຍເງິນກີບກັບເງິນໂດລາສະຫະລັດ ໄດ້ໃນຂອບບໍ່ເກີນ ± 7,5% ທຽບໃສ່ອັດຕາແລກປ່ຽນອ້າງອີງທີ່ກົມນະໂຍບາຍເງິນຕາປະກາດອອກໃນແຕ່ລະວັນ ແລະ ສ່ວນຕ່າງລະຫວ່າງອັດຕາຊື້-ອັດຕາຂາຍ ບໍ່ເກີນ 2%.
- ກໍານົດໃຫ້ສ່ວນຕ່າງລະຫວ່າງອັດຕາຊື້ ແລະ ອັດຕາຂາຍ ບໍ່ເກີນ 2% ສໍາລັບການແລກປ່ຽນເງິນກີບກັບ ເງິນບາດ, ເງິນຢວນ, ເງິນເອີໂຣ ແລະ ສະກຸນອື່ນ.
ມາດຕາ 4 ການແຈ້ງອັດຕາແລກປ່ຽນໃຫ້ແກ່ມວນຊົນ ແລະ ລາຍງານໃຫ້ທະນາຄານແຫ່ງ ສປປ ລາວ
ທະນາຄານທຸລະກິດ ຕ້ອງແຈ້ງອັດຕາແລກປ່ຽນສໍາລັບໃຫ້ບໍລິການແກ່ລູກຄ້າ ເປັນແຕ່ລະໄລຍະລະຫວ່າງວັນທີ່ ໃຫ້ບໍລິການຢູ່ສະຖານທີ່ບໍລິການ, ເວັບໄຊທ໌ ແລະ ຜ່ານຊ່ອງທາງໂຄສະນາເຜີຍແຜ່ຂໍ້ມູນຂ່າວສານອື່ນໆຂອງຕົນຢ່າງ ຊັດເຈນ ແລະ ຖືກຕ້ອງຕາມການຈັດຕັ້ງປະຕິບັດຕົວຈິງ.
ບັນດາທະນາຄານທຸລະກິດມີໜ້າທີ່ລາຍງານສະພາບການເຄື່ອນໄຫວແລກປ່ຽນເງິນຕາຂອງຕົນ ເປັນປະຈໍາວັນ ໃຫ້ແກ່ທະນາຄານແຫ່ງ ສປປ ລາວ ພາຍໃນເວລາ 16:00 ໂມງຂອງທຸກໆວັນລັດຖະການ ຢ່າງຄົບຖ້ວນ ແລະ ຖືກຕ້ອງກັບສະພາບການຈັດຕັ້ງປະຕິບັດຕົວຈິງ. ຂໍ້ມູນສໍາລັບລາຍງານປະກອບມີ ອັດຕາແລກປ່ຽນ, ມູນຄ່າການຊື້- ຂາຍເງິນຕາສໍາລັບແຕ່ລະຄູ່ສະກຸນເງິນ, ມູນຄ່າການຊື້-ຂາຍລວມຂອງແຕ່ລະສະກຸນເງິນ ແລະ ຂໍ້ມູນອື່ນໆຕາມທີ່ ທະນາຄານແຫ່ງ ສປປ ລາວ ໄດ້ກໍານົດໃນແບບຟອມເອກະສານລາຍງານທຸລະກໍາແລກປ່ຽນເງິນຕາ ແຕ່ລະໄລຍະ.
ມາດຕາ 5 ການກວດກາຕິດຕາມການຈັດຕັ້ງປະຕິບັດກົມນະໂຍບາຍເງິນຕາມີໜ້າທີ່ຕິດຕາມກວດກາການຈັດຕັ້ງປະຕິບັດຂໍ້ຕົກລົງສະບັບນີ້ຢ່າງໃກ້ຊິດ ແລະ ເປັນປົກກະຕິ, ລາຍງານໃຫ້ຄະນະຜູ້ວ່າການທະນາຄານແຫ່ງ ສປປ ລາວ ຊາບ ແຕ່ລະໄລຍະ, ປະຕິບັດນະໂຍບາຍຕໍ່ຜູ້ທີ່ມີ ຜົນງານ ແລະ ມາດຕະການຕໍ່ຜູ້ທີ່ລະເມີດຕາມກົດໝາຍ ແລະ ລະບຽບການທີ່ກ່ຽວຂ້ອງ ຢ່າງເຂັ້ມງວດ.
ມາດຕາ 6 ຜົນສັກສິດ
ຂໍ້ຕົກລົງສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ ແລະ ໃຊ້ປ່ຽນແທນຂໍ້ຕົກລົງວ່າດ້ວຍການກໍາ ນົດອັດຕາແລກປ່ຽນ ສະບັບເລກທີ 116/ທຫລ, ລົງວັນທີ 10 ກຸມພາ 2023 ແລະ ລະບຽບການກ່ຽວຂ້ອງອື່ນ ທີ່ມີ ເນື້ອໃນຂັດກັບຂໍ້ຕົກລົງສະບັບນີ້.
