ຫລາຍທ້ອງຖິ່ນເຂດພາກກາງ ແລະ ພາກໃຕ້ໄດ້ຮັບຜົນກະທົບໜັກຈາກພະຍຸ
ແຫລ່ງຂ່າວທ້ອງຖິ່ນລາຍງານວ່າ: ອິດທິພົນຂອງກະແສລົມມໍລະສຸມທີ່ພັດຜ່ານປະເທດເຮົາໃນທ້າຍອາທິດຜ່ານມານີ້, ໄດ້ເຮັດໃຫ້ຫລາຍທ້ອງຖິ່ນໃນເຂດພາກກາງ ແລະ ພາກໃຕ້ເກີດມີນໍ້າປ່າໄຫລຊຸແຮງ ແລະ ເກີດນໍ້າຖ້ວມກະທັນຫັນ ສົ່ງຜົນໃຫ້ພື້ນຖານໂຄງລ່າງ, ຖະໜົນຫົນທາງ, ເນື້ອທີ່ການຜະລິດຂອງປະຊາຊົນໄດ້ຮັບຄວາມເສຍຫາຍໜັກໜ່ວງ, ໂດຍສະເພາະກໍລະນີເຂື່ອນນ້ຳອ້າວຢູ່ເມືອງຜາໄຊແຂວງຊຽງຂວາງທີ່ພວມຢູ່ໃນໄລຍະກໍ່ສ້າງແຕກກະທັນຫັນໃນເວລາປະມານ 14:00 ໂມງຂອງວັນທີ 11 ກັນຍາຜ່ານມາ, ເຮັດໃຫ້ກະແສນ້ຳຈໍານວນຫລາຍໄຫລຊຸເຂົ້າຖ້ວມເຮືອນຊານບ້ານຊ່ອງ, ພ້ອມທັງພື້ນທີ່ການຜະລິດຂອງປະຊາຊົນເສຍຫາຍເປັນບໍລິເວນກວ້າງ ແລະ ພ້ອມນີ້ຍັງໄດ້ເຮັດໃຫ້ສະພາບການສັນຈອນໃນເສັ້ນທາງ D1 ແຕ່ເມືອງປາກຊັນແຂວງບໍລິຄໍາໄຊຫາເມືອງຜາໄຊແຂວງຊຽງຂວາງເປັນອໍາມະພາດ ແລະ ມາຮອດປັດຈຸບັນຍັງບໍ່ສາມາດປະເມີນຄວາມເສຍຫາຍໄດ້, ສ່ວນຢູ່ເມືອງອຸທຸມພອນ, ວິລະບູລີ, ເຊໂປນ ແລະ ເມືອງອື່ນໆຂອງແຂວງສະຫວັນນະເຂດ, ພາຍຫລັງມີຝົນຕົກຕິດຕໍ່ຫລາຍວັນຈາກພະຍຸດອກສຸຣິພັດຜ່ານໃນວັນທີ 15-17 ກັນຍານີ້, ເຮັດໃຫ້ເກີດ
ນໍ້າຖ້ວມໃນຫລາຍເຂດ, ໂດຍສະເພາະຢູ່ເມືອງອຸທຸມພອນມີຫລາຍບ້ານຄື: ໂພນຍາງນາ, ໂພນເດື່ອ, ໂພນຕູມ, ນາຄູ, ນາສະໂນດ, ດົງທ່າ, ດົງນ້ອຍ, ບ້ານໂຄກ, ພີນໃຕ້, ກາງໂພສີ, ເຫລົ່າໃຫຍ່ມີສະພາບນໍ້າຍຶ່ງຖ້ວມ ແລະ ມີປະຊາຊົນຫລາຍກວ່າ 500 ຄອບຄົວໄດ້ຮັບຜົນກະທົບ ແລະ ເນື້ອທີ່ການຜະລິດຫລາຍກວ່າ 100 ເຮັກຕາໄດ້ຮັບຄວາມເສຍຫາຍ. ສ່ວນຢູ່ແຂວງຄໍາມ່ວນ, ບໍລິຄໍາໄຊ ກໍມີຫລາຍເຂດໄດ້ຮັບຜົນກະທົບຈາກສະພາບຝົນຕົກໜັກເຊັ່ນດຽວກັນ, ສົ່ງຜົນໃຫ້ລະບົບພື້ນຖານໂຄງລ່າງ ເປັນຕົ້ນ: ຖະໜົນຫົນທາງ, ໄຟຟ້າ, ນໍ້າປະປາ, ລະບົບຄົມມະນາຄົມຈໍານວນໜຶ່ງເປ່ເພເສຍຫາຍ.
