ແມັກຊິໂກ ພົບຜູ້ອົບພະຍົບລັກລອບເຂົ້າເມືອງ 129 ຄົນ ທີ່ຊຸກເຊື່ອງແອອັດກັນຢູ່ໃນຕູ້ຄອນເທນເນີຫລັງລົດບັນທຸກສິນຄ້າ
ສຳນັກຂ່າວໄທ ລາຍງານໃຫ້ຮູ້ວ່າ: ສະຖາບັນຄົນເຂົ້າເມືອງແຫ່ງຊາດຂອງແມັກຊິໂກ ໃຫ້ຮູ້ໃນວັນທີ 17 ມິຖຸນາ 2023 ວ່າເຈົ້າໜ້າທີ່ແມັກຊິໂກ ໄດ້ພົບເຫັນຜູ້ອົບພະຍົບເຂົ້າເມືອງ 129 ຄົນ ທີ່ຊຸກເຊື່ອງກັນຢູ່ຢ່າງແອອັດໃນຕູ້ຄອນເທນເນີຢູ່ຫລັງລົດບັນທຸກສິນຄ້າ.
ສະຖາບັນຄົນເຂົ້າເມືອງແຫ່ງຊາດ ກ່າວໃນຖະແຫລງການວ່າ: ຜູ້ອົບພະຍົບລັກລອບເຂົ້າເມືອງແມ່ນມາຈາກປະເທດ ກົວເຕມາລາ, ຮອນດູຣັສ, ເອວຊານວາດໍ ແລະ ອິນເດຍ ເຊິ່ງພົບເຫັນຢູ່ໃນລົດບັນທຸກ. ໃນຕອນກາງຄືນວັນສຸກ 16 ມິຖຸນາ ຜ່ານມາ, ໃນລັດ Veracruz ພາກຕາເວັນອອກຂອງປະເທດ. ປັດຈຸບັນນີ້ ແມັກຊິໂກກຳລັງປະເຊີນກັບຄື້ນຄວາມຮ້ອນທີ່ເຮັດໃຫ້ມີຜູ້ເສຍຊີວິດ 8 ຄົນ ແລະ ລົດບັນທຸກທີ່ເຕັມໄປດ້ວຍຄົນອົບພະຍົບໄດ້ຖືກພົບເຫັນຢູ່ໃນເມືອງ ຊາຢູລາເດີ ເອວແມນ, ເຊິ່ງອົງການອຸຕຸນິຍົມແຫ່ງຊາດຄາດວ່າ: ອຸນຫະພູມຈະສູງເຖິງ 44 ອົງສາ. ຂະນະດຽວກັນ, ສະຖາບັນຄົນເຂົ້າເມືອງແຫ່ງຊາດກ່າວວ່າ:
ຜູ້ອົບພະຍົບ 51 ຄົນຈາກກົວເຕມາລາໄດ້ຖືກສົ່ງກັບຄືນປະເທດແລ້ວ, ສ່ວນອີກ 19 ຄົນຈາກກົວເຕມາລາ ແລະ ຮອນດູຣັສ ທີ່ບໍ່ມີຜູ້ຕິດຕາມຈະຖືກສົ່ງໄປທີ່ພັກອາໄສພິເສດ ແລະ ສ່ວນທີ່ເຫລືອທັງໝົດຈະຖືກສົ່ງໃຫ້ສູນດູແລຜູ້ອົບພະຍົບ.
ຜູ້ອົບພະຍົບຄົນຫລາຍພັນຄົນ ສ່ວນໃຫຍ່ແມ່ນຕໍ່ສູ້ກັບຄວາມທຸກຍາກ ແລະ ຄວາມຮຸນແຮງໃນປະເທດຂອງເຂົາເຈົ້າ, ຂ້າມຊາຍແດນເຂົ້າມາໃນແມັກຊິໂກ. ດ້ວຍຄວາມຫວັງວ່າມື້ໜຶ່ງຈະໄປອາໄສຢູ່ໃນສະຫະລັດ ແຕ່ໃນລະຫວ່າງທາງ, ເຂົາເຈົ້າມັກຈະຕົກເປັນເຫຍື່ອຂອງກຸ່ມແກ້ງອາດຊະຍາກຳ ຫລື ພວກຄ້າມະນຸດ.
https://tna.mcot.net/world-1191430
