ຫົວໜ້າຄະນະຈັດຕັ້ງສູນກາງພັກ ເນັ້ນໃຫ້ແຂວງເຊກອງ ຫັນປ່ຽນຢ່າງແຂງແຮງດ້ານແນວຄິດ-ຈິນຕະນາການ ແລະ ຕ້ານແນວຄິດເອື່ອຍອີງຄອງຄອຍ

ໃນໂອກາດມີຄໍາເຫັນໂອ້ລົມຕໍ່ກອງປະຊຸມຄົບຄະນະກາງສະໄໝທີ X ຂອງຄະນະບໍລິຫານງານພັກ ແຂວງເຊກອງ ໃນວັນທີ 16 ມິຖຸນາ 2023, ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ເນັ້ນໃຫ້ການນໍາແຂວງເຊກອງ ປັບປຸງແບບແຜນວິທີນໍາພາ, ຢຶດໝັ້ນ ແລະ ປະຕິບັດຫລັກການລວມສູນປະຊາທິປະໄຕຂອງພັກ, ຍົກສູງຄວາມເປັນ ແບບຢ່າງນໍາໜ້າ, ສ້າງຄວາມໄວ້ວາງໃຈໃຫ້ແກ່ປະຊາຊົນ, ຖືເອົາວຽກງານສຶກສາອົບຮົມການເມືອງ-ແນວຄິດ ເປັນສະໜາມຮົບໜຶ່ງທີ່ສໍາຄັນ ເພື່ອສ້າງການຫັນປ່ຽນຢ່າງແຂງແຮງດ້ານແນວຄິດ-ຈິນຕະນາການ, ຮູ້ຈໍາແນກມິດ-ສັດຕູ, ຈໍາແນກອັນຖືກ-ອັນຜິດ ແລະ ຕ້ານແນວຄິດເອື່ອຍອີງຄອງຄອຍ, ຮັກສາເດີມ, ອັດຕະວິໄສ, ອາດຍາສິດ ແລະ ແນວຄິດການຊີ້ນໍາແບບລວມໆໃນດ້ານທິດສະດີ, ສ້າງໃຫ້ໄດ້ແນວຄິດຮັກຊາດ-ພັດທະນາ, ປົກປ້ອງແນວທາງ, ຕອບໂຕ້ຖ້ອຍທໍານອງບິດເບືອນ, ໂຄສະນາທັບຖົມໂຈມຕີຂອງອິດທິກໍາລັງປໍລະປັກຕໍ່ການນໍາພາລວມຂອງພັກ-ລັດເຮົາ.

ພ້ອມນີ້, ໃຫ້ການນຳແຂວງ ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມຂອງແຂວງ ແລະ ປະຕິບັດ 2 ວາລະແຫ່ງຊາດ, ຂຸດຄົ້ນທ່າແຮງບົ່ມຊ້ອນພາຍໃນ, ຍາດແຍ່ງການຊ່ວຍເຫລືອ, ດຶງດູດການລົງທຶນຈາກທຸກພາກສ່ວນທົ່ວສັງຄົມຍູ້ແຮງຂະບວນການຜະລິດເປັນສິນຄ້າ ຕິດພັນກັບການປຸງແຕ່ງຜະລິດຕະພັນກະສິກໍາສະອາດ, ຮັກສາສິ່ງແວດລ້ອມໃຫ້ຍືນຍົງ; ສືບຕໍ່ຫັນພະນັກງານ-ນໍາພາຫລັກແຫລ່ງລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບ, ແກ້ໄຂຄວາມທຸກຍາກ ແລະ ວຽກງານ 3 ສ້າງໃຫ້ເຂົ້າສູ່ລວງເລິກ; ພັດທະນາຂົງເຂດວັດທະນະທໍາ-ສັງຄົມ, ປະຕິບັດຕົວເລກຄາດໝາຍຕົວຊີ້ວັດການພັດທະນາແບບຍືນຍົງ, ເຝົ້າລະວັງ ແລະ ແກ້ໄຂການແພ່ລະບາດຂອງພະຍາດໂຄວິດ-19, ພະຍາດລະບາດຕາມລະດູການ; ປົກປັກຮັກສາ ແລະ ເສີມຂະຫຍາຍມູນເຊື້ອວັດ ທະນະທໍາ, ຮີດຄອງປະເພນີທີ່ເປັນເອກະລັກຂອງບັນດາເຜົ່າ; ພັດທະນາການທ່ອງທ່ຽວດ້ານວັດທະນະທໍາ, ກະສິ ກໍາ, ທໍາມະຊາດ ແລະ ປະຫວັດສາດ ເພື່ອດຶງດູດນັກທ່ອງທ່ຽວໃຫ້ເຂົ້າມາທ່ຽວຊົມແຂວງເຊກອງຫລາຍຂຶ້ນ; ຄຸ້ມຄອງແຮງງານຕ່າງປະເທດໃຫ້ເຂົ້າສູ່ລະບຽບກົດໝາຍ, ພັດທະນາສີມືແຮງງານ, ສ້າງເງື່ອນໄຂໃຫ້ລູກ-ຫລານຂອງປະຊາຊົນໃນເຂດທີ່ມີໂຄງການຕັ້ງຢູ່ມີວຽກເຮັດງານທໍາ ເພື່ອແກ້ໄຂໄພຫວ່າງງານ ແລະ ການໜີໄປອອກແຮງງານຢູ່ຕ່າງປະເທດທີ່ບໍ່ຖືກກົດໝາຍ; ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ປັບປຸງກໍາລັງ ປກຊ-ປກສ ແຕ່ລະຂັ້ນ ແລະ ກໍາລັງສໍາຮອງໃຫ້ເຂັ້ມແຂງ ເຄື່ອນໄຫວເຮັດໜ້າທີ່ແກ້ໄຂບັນຫາຢາເສບຕິດ, ປຸ້ນຈີ້ຊີງຊັບ, ຂີ້ລັດງັດ ແງະ, ການພະນັນ ແລະ ບັນຫາອື່ນໆໃນສັງຄົມ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍພື້ນຖານ.

ພ້ອມນີ້, ສະຫາຍ ນາງ ສີໃສ ລືເດດມູນສອນ ຍັງຊີ້ນໍາໃຫ້ຄະນະພັກແຂວງ, ຮາກຖານພັກແຕ່ລະຂັ້ນ ເອົາໃຈໃສ່ກໍ່ສ້າງ ແລະ ຂະຫຍາຍການຈັດຕັ້ງພັກ ຕາມ 5 ຫລັກການ 3 ທິດນໍາ, ການບໍລິຫານລັດແຕ່ລະຂັ້ນໃຫ້ເຂັ້ມແຂງ, ບໍາລຸງສ້າງພະນັກງານໃຫ້ມີຄວາມຮູ້ຄວາມສາມາດ, ເພີ່ມທະວີຄວາມສາມັກຄີເປັນຈິດໜຶ່ງໃຈດຽວ, ເສີມຂະຫຍາຍສະຕິຊາດ, ເປັນເຈົ້າຕົນເອງ, ມີຄວາມຕັດສິນໃຈເປັນເອກະພາບ, ສູ້ຊົນອົດທົນ, ຍົກສູງນໍ້າໃຈເສຍ ສະຫລະ, ເດັດດ່ຽວຜ່ານຜ່າອຸປະສັກ ແລະ ຄວາມຫຍຸ້ງຍາກຕ່າງໆ ເພື່ອເຮັດສໍາເລັດບັນດາຄາດໝາຍທີ່ກໍານົດໄວ້, ສ້າງພື້ນຖານ ແລະ ທ່ວງທ່າໃຫ້ແກ່ການສືບຕໍ່ພັດທະນາ, ສ້າງສາປະເທດຊາດ ກໍຄືແຂວງເຊກອງໃຫ້ກ້າວຂຶ້ນ ຢ່າງບໍ່ຢຸດຢັ້ງ.

ຂ່າວ: ແຂວງເຊກອງ