ໂມດຣິດ ປະຕິເສດຂໍ້ສະເໜີຈາກຊາອຸ ກຽມຂະຫຍາຍສັນຍາກັບ ຣຽວ ມາດຣິດ

ລູກາ ໂມດຣິດ ກອງກາງຊາວໂຄຣເອເຊຍ ຍັງຮັກແລະສັດທາ ກັບ ຣຽວ ມາດຣິດ ຢ່າງຫມົດໃຈ ເມື່ອຈັດການປະຕິເສດຂໍ້ສະເໜີມະຫາສານຈາກຊາອຸດິ ອາຣະເບຍ ເພື່ອຫລິ້ນຢູ່ໃນ ເບນາເບລ ຕໍ່ໄປແລ້ວ.

ລູກາ ໂມດຣິດ ກອງກາງປະສົບການຫລາຍ ຂອງ ຣຽວ ມາດຣິດ ທີມໃຫຍ່ແຫ່ງ ລາ ລີກາ ສະເປນ ຕັດສິນໃຈປະຕິເສດຂໍ້ສະເໜີຈຳນວນມະຫາສານຈາກສະໂມສອນໃນລີກຊາອຸດິອາຣະເບຍ ແລະ ກຽມຈະຕໍ່ສັນຍາສະບັບໃຫມ່ໃນຖິ່ນ ຊານຕີອາໂກ ເບນາເບລ ອອກໄປອີກ 1 ປີແລ້ວ.

ໂມດຣິດ ພວມຈະຫມົດສັນຍາກັບ ຣຽວ ມາດຣິດ ທ້າຍເດືອນນີ້ ແລະ ມີລາຍງານວ່າ ໄດ້ຮັບຂໍ້ສະເໜີເປັນສັນຍາໄລຍະຍາວ 3 ປີ ພ້ອມຄ່າເມື່ອຍມະຫາສານເຖິງ 170 ລ້ານປອນ ຈາກ ອັລ ຮິລັລ ທີມດັງຂອງຊາອຸ.

ແນວໃດກໍຕາມ Daily mal  ສື່ຊື່ດັງຂອງອັງກິດລາຍງານວ່າ ດາວເຕະທີມຊາດໂຄຣເອເຊຍ ຕັດສິນໃຈປະຕິເສດຂໍ້ສະເໜີດັ່ງກ່າວຮຽບຮ້ອຍແລ້ວ ເນື່ອງຈາກຕ້ອງການຢູ່ກັບ ຣຽວ ມາດຣິດ ຕໍ່ໄປໃນລະດູການໜ້າ ແລະ ຫມັ້ນໃຈວ່າ ຕົນເອງຍັງມີດີພໍທີ່ຈະຫລິ້ນຢູ່ໃນລີກລະດັບຫົວແຖງຂອງຢູໂຣບໄດ້ຢ່າງສະບາຍ ເຖິງວ່າອາຍຸຈະຍ່າງເຂົ້າໄປ 37 ປີແລ້ວກໍຕາມ.