ກົມກວດກາ ກະຊວງອຸດສາຫະກໍາ ແລະ ການຄ້າ ລາວ-ຫວຽດນາມ ແລກປ່ຽນບົດຮຽນວຽກງານກວດກາ ຕ້ານການສໍ້ລາດບັງຫລວງ

ກົມກວດກາ ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ກົມກວດກາ ກະຊວງອຸດສາຫະກໍາ ແລະ ການຄ້າ ແຫ່ງ ສສ ຫວຽດນາມ ຈັດກອງປະຊຸມພົບປະຮ່ວມມື ແລະ ແລກປ່ຽນບົດຮຽນ ວຽກງານກວດກາ ໃນວັນທີ 14 ມິຖຸນາ 2023 ທີ່ນະຄອນຫລວງວຽງຈັນ, ເປັນປະທານຮ່ວມຂອງ ທ່ານ ພຸດທະວັນ ນັນທະວົງ, ຫົວໜ້າກົມກວດກາ ກະຊວງອຸດສາຫະກຳ ແລະ ການຄ້າ ລາວ ແລະ ທ່ານ ເລ ຫວຽດ ລອງ ຫົວໜ້າກົມກວດກາ ກະຊວງອຸດສາຫະກຳ ແລະ ການຄ້າ ຫວຽດນາມ.

ເພື່ອສືບຕໍ່ຜັນຂະຫຍາຍໝາກຜົນຂອງກອງປະຊຸມແລກປ່ຽນ ແລະ ແບ່ງປັນບົດຮຽນໃນວຽກງານກວດກາ ລະຫວ່າງ ກົມກວດກາ ກະຊວງ ອຸດສາຫະກຳ ແລະ ການຄ້າລາວ ແລະ ກົມກວດກາ ກະຊວງອຸດສາຫະກຳ ແລະ ການຄ້າ ຫວຽດນາມ ຄັ້ງທຳອິດ ປີ 2019 ທີ່ກົມກວດກາ ກະຊວງອຸດສາຫະກໍາ ແລະ ການຄ້າ ຫວຽດນາມ ເປັນເຈົ້າພາບ. ພ້ອມທັງຮ່ວມກັນຕີລາຄາຄືນການຈັດຕັ້ງ ແລະ ຜັນຂະຫຍາຍບັນດາໝາກຜົນ ໃນໄລຍະທີ່ຜ່ານມາ ຍັງເປັນການຮັດແໜ້ນຄວາມສາມັກຄີແບບພິເສດອ້າຍນ້ອງລາວ-ຫວຽດນາມ, ຫວຽດນາມລາວໃຫ້ແໜ້ນແຟ້ນຂຶ້ນຕື່ມ ແລະ ຍັງເປັນການແບ່ງປັນປະສົບການ ໃນຂົງເຂດວຽກງານກວດກາ; ວຽກງານຕ້ານການສໍ້ລາດບັງຫລວງ; ການຄົ້ນຄວ້າແກ້ໄຂຄໍາຮ້ອງຟ້ອງ-ຄໍາສະເໜີ ແລະ ວຽກງານກວດສອບພາຍໃນ, ພ້ອມນັ້ນ, ຍັງແລກປ່ຽນບົດຮຽນໃນວຽກງານກວດກາ ໃນ 5 ຂົງເຂດ ເປັນຕົ້ນ ວຽກງານຄົ້ນຄວ້າບັນດານິຕິກຳດ້ານກົດໝາຍ; ວຽກງານກວດກາພັກ, ກວດກາພາຍໃນ; ວຽກງານສະກັດກັ້ນ ແລະ ຕ້ານການສໍ້ລາດບັງຫລວງ: ວຽກງານຄົ້ນຄ້ວາຄໍາຮ້ອງຟ້ອງ ແລະ ຄຳສະເໜີ.

ພ້ອມນີ້, ສອງຝ່າຍຍັງເຫັນດີນຳໃຊ້ກົນໄກການຈັດກອງປະຊຸມຮ່ວມມືພົບປະແລກປ່ຽນບົດຮຽນເປັນເວທີປຶກສາຫາລື, ແລກປ່ຽນ ແລະ ຖ່າຍທອດບົດຮຽນເຊິ່ງກັນ ແລະ ກັນໃນຕໍ່ໜ້າ ແລະ ສະເໜີແຜນການຮ່ວມມື ພົບປະແລກປ່ຽນບົດຮຽນຂອງສອງກະຊວງ ຕໍ່ຄະນະນໍາຂອງຕົນ ເພື່ອພິຈາລະນາແຜນການຮ່ວມມືດັ່ງກ່າວ ເຂົ້າໃນແຜນການເພີ່ມທະວີການຮ່ວມມືວຽກ ງານລວມຂອງສອງກະຊວງປະຈຳປີ ແລະ ຕອນທ້າຍຂອງກອງປະຊຸມຍັງໄດ້ມີການເຊັນບົດບັນທຶກຮ່ວມກັນລະຫວ່າງສອງຝ່າຍອີກດ້ວຍ.