ເສັ້ນທາງດີ ເປັນໜຶ່ງໃນປັດໄຈກະຕຸ້ນເສດຖະກິດ ແຕ່ຫາກເສັ້ນທາງບໍ່ດີ ອາດເຮັດໃຫ້ການພັດທະນາຕິດຂັດໃນຫລາຍດ້ານ

ໂດຍ: ທິດກໍ່າ

ໃນປັດຈຸບັນ ຕ້ອງຍອມຮັບວ່າໂຄງການກໍ່ສ້າງເສັ້ນທາງຫລາຍເສັ້ນຫລາຍສາຍໃນທົ່ວປະເທດພວມໄດ້ຮັບການປັບປຸງແກ້ໄຂ ແລະ ພັດທະນາໄປຢ່າງບໍ່ຢຸດຢັ້ງ. ອີກໜຶ່ງໂຄງການທີ່ພວມດໍາເນີນໄປຢ່າງເຄັ່ງຮ້ອນນັ້ນກໍຄືໂຄງການປັບປຸງຂະຫຍາຍເສັ້ນທາງ 13 ໃຕ້ ເຊິ່ງມາຮອດປັດຈຸບັນແມ່ນໄດ້ສໍາເລັດເກີນ 50% ແລ້ວ. ຄາດວ່າອີກບໍ່ພໍເທົ່າໃດເດືອນກໍຈະສໍາເລັດຕາມແຜນ ແລະ ຈະໄດ້ເຫັນທາງດີທາງງາມ, ການໄປມາຈາກນະຄອນຫລວງວຽງຈັນໄປຫາບັນດາແຂວງພາກກາງ, ພາກໃຕ້ກໍສະດວກສະບາຍຍິ່ງຂຶ້ນ. ສ່ວນອີກເສັ້ນທາງໜຶ່ງທີ່ຫາກໍສ້າງສໍາເລັດໃໝ່ອ່ຽມ ກໍແມ່ນເສັ້ນທາງ 13 ເໜືອ ເມືອງໂພນ,ເຊິ່ງໄດ້ຍົກລະດັບເປັນເສັ້ນທາງເບຕົງມາດຕະຖານ ພ້ອມປະດັບດອກໄຟເຍືອງທາງ ແຕ່ 4 ແຍກສີເກີດ,ນະຄອນຫລວງວຽງຈັນ ຫາ ເມືອງໂພນໂຮງ ແຂວງວຽງຈັນ ຢ່າງສວຍງາມໂດດເດັ່ນ ແລະ ນະຄອນຫລວງກໍໄດ້ຮັບການປັບປຸງ ໂດຍສະເພາະເສັ້ນທາງດົງປ່າແຫລບ,  ເສັ້ນທາງເຂດບ້ານໜອງດ້ວງ, ບ້ານຮ່ອງຄ້າ ແລະ ເສັ້ນອື່ນໆກໍຄາດວ່າຈະໄດ້ຮັບການແກ້ໄຂໃນໄວໆນີ້.

ນອກຈາກທີ່ກ່າວມານີ້ແລ້ວ ໃນທຸກທ້ອງຖິ່ນນັບແຕ່ຂັ້ນບ້ານ, ຂັ້ນເມືອງ ແລະ ຂັ້ນແຂວງ ຕ່າງກໍມີແຜນເລັ່ງລັດພັດທະນາສ້າງເສັ້ນທາງໃນທ້ອງຖິ່ນຂອງຕົນ ເພື່ອໃຫ້ປະຊາຊົນໄດ້ຊົມໃຊ້, ເດີນທາງໄປມາຫາສູ່ກັນສະດວກສະບາຍ ທັງຂົນສົ່ງສິນຄ້າ, ສົ່ງເສີມການທ່ອງ ທ່ຽວມີລາຍຮັບເຂົ້າປະເທດ, ເຂົ້າທ້ອງຖິ່ນນັບມື້ນັບຫລາຍ, ຜ່ານການຕິດຕາມຈາກຫຼາຍແຫລ່ງຂ່າວ ເວົ້າສະເພາະການສ້າງເສັ້ນທາງເບຕົງເຂົ້າບ້ານ ຫລື ພາຍໃນບ້ານໂດຍໃຊ້ທຶນຂອງປະຊາຊົນເອງ ແລະ ທຶນສົມທົບລະຫວ່າງລັດ ແລະ ປະຊາຊົນທີ່ໂດດເດັ່ນ ແລະ ເຮັດໄດ້ດີທີ່ສຸດກໍຄືເມືອງສອງຄອນ ແຂວງສະຫວັນນະເຂດ  ປັດຈຸບັນມີຫລາຍບ້ານໄດ້ຊົມໃຊ້ທາງເບຕົງທີ່ອໍານາດການປົກຄອງ ແລະ ປະຊາຊົນພ້ອມກັນເຮັດດ້ວຍຄວາມຕື່ນຕົວ.

ຢ່າງໃດກໍດີ, ໃນໄລຍະຜ່ານມາເຫັນໄດ້ວ່າບາງຂົງເຂດຈະລາຈອນ, ເສັ້ນທາງໄປມາຫາສູ່ກັນທັງໃນເມືອງ ຍັງພົບຄວາມຫຍຸ້ງຍາກ ເສັ້ນທາງເປ່ເພຢູ່ເປັນປະຈຳ  ແລະ ຊົນນະບົດບາງບ່ອນທຽວໄດ້ລະດູດຽວ ສ້າງຄວາມລຳບາກໃນການຂົນສົ່ງສິນຄ້າ, ການບໍລິການ ແລະ ການພັດທະນາດ້ານອື່ນໆ, ດັ່ງນັ້ນ ຈຶ່ງຕ້ອງຮີບຮ້ອນແກ້ໄຂໃຫ້ໂລ່ງລ່ຽນ ຢ່າປ່ອຍປະລະເລີຍ ໃຫ້ຕົກຢູ່ສະພາບວິກິດ ການສັນຈອນໄປມາຫຍຸ້ງຍາກ ເປັນການກົດໜ່ວງການພັດທະນາເສດຖະກິດ-ສັງຄົມ ຂອງທ້ອງຖິ່ນກໍຄືປະເທດຊາດ ເຊິ່ງ ຍາມໃດພັກ-ລັດຖະບານ ກໍເນັ້ນໃຫ້ການນໍາພາຂອງການນໍາທຸກຂັ້ນ ນັບແຕ່ຂັ້ນສູນກາງລົງຮອດທ້ອງຖິ່ນ ທຸກຂະແໜງການເອົາໃຈໃສ່ ປະຕິບັດຕາມທິດ 3 ສ້າງຂອງພັກ, ວາງແຜນນະໂຍບາຍປັບປຸງເສັ້ນທາງການສັນຈອນໃຫ້ສະດວກສະບາຍຢ່າງທົ່ວເຖິງ ທັງນີ້ເພື່ອເຮັດໃຫ້ ເສດຖະກິດໄດ້ຟື້ນຕົວໂດຍໄວ ດ້ວຍການເລັ່ງລັດນໍາພາປະຊາຊົນເຮັດການຜະລິດສິນຄ້າເພື່ອກຸ້ມຕົນເອງ ແລະ ສົ່ງອອກໃຫ້ຫລາຍໆ ເພາະຜ່ານມາຍ້ອນການຜະລິດສິນຄ້າຂອງລາວເຮົາຍັງບໍ່ທັນເຂັ້ມແຂງກວ້າງຂວາງຈຶ່ງເປັນເຫດໃຫ້ການນໍາເຂົ້າຫລາຍກວ່າການສົ່ງອອກ.

ເວົ້າລວມແລ້ວ ເສດຖະກິດຈະດີ ຫລື ຮ້າຍ, ສ່ວນໜຶ່ງແມ່ນມີປັດໄຈມາຈາກທາງດ້ານຄົມມະນາຄົມ ແຕ່ວ່າຖ້າເສັ້ນທາງບໍ່ດີ ການຂົນສົ່ງສິນຄ້າ,ການຈໍລະຈອນແຈກຢາຍສິນຄ້າກໍບໍ່ເຂັ້ມແຂງຄຶກຄັກ, ບໍ່ມີນັກທ່ອງທ່ຽວເດີນທາງໄປມາ  ສຸດທ້າຍເສດຖະກິດຈະຍິ່ງອ່ອນແອໄປຕະຫລອດ, ສົ່ງຜົນໃຫ້ມົວເມົານໍາແຕ່ການຫລິ້ນກິນສໍ້ລາດບັງຫລວງຫລາຍຂຶ້ນ, ປະເທດຊາດກໍຕົກຢູ່ໃນຊາຕາອາພັບ ເຮັດຫຍັງທໍາຫຍັງກໍນໍາຫລັງໝູ່ຢູ່ແຖວຫລັງໝູ່ ກາຍເປັນຄວາມລ້າຫລັງດ້ອຍພັດທະນາ ຢ່າງຫລີກເວັ້ນບໍ່ໄດ້.