ດາບິດ ເດ ເຄອາ ໃກ້ອຳລາ ແມນຢູ ລະດູການນີ້ ສະໂມສອນເດີນໜ້າຫາຕົວແທນແລ້ວ

ສື່ລາຍງານຂ່າວວ່າ ດາບິດ ເດ ເຄອາ ຜູ້ຮັກສາປະຕູມືຫນຶ່ງ ແມນເຊສເຕີ ຢູໄນເຕັດ ກຽມອຳລາທີມໃນລະດູການນີ້ ຂະນະທີ່ ສະໂມສອນພວມດຳເນີນການຫາຕົວແທນຂອງຜູ້ຮັກສາປະຕູລາຍນີ້.

ໂດຍ ເດເຄ ອາ ພວມຈະຫມົດສັນຍາກັບ ແມນຢູ ຫລັງຈົບເດືອນມິຖຸນານີ້ ແລະ ການປະກາດລາຍຊື່ນັກເຕະແມນຢູໃນລະດູການໜ້ານັ້ນບໍ່ມີຊື່ຂອງຜູ້ຮັກສາປະຕູ 31 ປີລາຍນີ້ແຕ່ຢ່າງໃດ.

ແນວໃດກໍຕາມ ແມນຢູ ແຈງສາເຫດທີ່ບໍ່ມີຊື່ຂອງ ເດ ເຄ ອາ ວ່າ ຂະນະນີ້ ສະໂມສອນພວມເຈດລະຈາເລື່ອງຕໍ່ສັນຍາໃຫມ່ຢູ່ “ ການເຈລະຈາຍັງຄົງເປີດກວ້າງກັບ ດາບິດ ເດ ເຄອາ ກ່ຽວກັບສັນຍາໃຫມ່ທີ່ອາດເກີດຂຶ້ນ ”.

ຫລ້າສຸດ Mirror ສື່ຊັ້ນນຳໃນອັງກິດລະບຸວ່າ ເດ ເຄອາ ກຽມທີ່ຈະຍ້າຍອອກຈາກ ແມນຢູ ເຊິ່ງລາວຫລິ້ນຢູ່ກັບທີມມາດົນກວ່າ 12 ປີ ໃນໄລຍະຜ່ານມາ ຫລັງການຕໍ່ສັນຍາໃຫມ່ຈົນເຖິງຕອນນີ້ຍັງບໍ່ມີຄວາມຄືບໜ້າເນື່ອງຈາກລາວບໍ່ຕ້ອງການຫລຸດຄ່າເມື່ອຍທີ່ໄດ້ອາທິດລະ 375,000 ປອນລົງ.

ຂະນະທີ່ ແມນຢູ ພວມຊອກຫາຕົວແທນຂອງ ເດ ເຄອາ ຢູ່ແລ້ວ ໂດຍມີ ຈໍແດນ ພິກຟອດ ຈາກ ເອຟເວີຕັນ, ດີໂອໂກ ຄອສຕ້າ ຈາກ ປໍໂຕ້ ແລະ ອັງເດຣ ໂອນານາ ຈາກ ອິນເຕີ ມິລານ ຢູ່ໃນລາຍຊື່.