ນະຄອນຫລວງວຽງຈັນ ລົງນາມຮ່ວມມື 4 ໂຄງການ ເພື່ອສ້າງຄວາມເຂັ້ມແຂງວຽກງານອຸດສາຫະກຳ ແລະ ການຄ້າ

ວັນທີ 16 ມິຖຸນາ 2023, ກະຊວງອຸດສາຫະກຳ ແລະ ການຄ້າ ແລະ ອົງການປົກຄອງນະຄອນຫຼວງວຽງຈັນ (ນວ) ພົບປະ ແລະ ລົງນາມແຜນ ການຮ່ວມມືເພື່ອຊຸກຍູ້ການຮ່ວມມື ຮັດແໜ້ນການປະສານງານລະຫວ່າງກະຊວງອຸດສາຫະກຳ ແລະ ການຄ້າ ແລະ ອົງການປົກຄອງ ນວ, ຮ່ວມລົງນາມໂດຍທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ທ່ານ ອາດສະພັງທອງ ສີພັນດອນ ເຈົ້າຄອງ ນວ.

ການລົງນາມຮ່ວມມືຄັ້ງນີ້ເພື່ອພັດທະນາວຽກງານອຸດສາຫະກຳ ແລະ ການຄ້າ ນວ ໃຫ້ມີຄວາມເຂັ້ມແຂງ ຂະຫຍາຍຕົວຕາມທ່າແຮງຂອງ ນວ ບົນພື້ນຖານການຜັນຂະຫຍາຍແນວທາງນະໂຍບາຍ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ກໍຄືແຜນພັດ ທະນາ 5 ປີ ຂອງກະຊວງອຸດສາຫະກຳ ແລະ ການຄ້າ ແລະ ແຜນພັດທະນາ 5 ປີ ຂອງນວ (2021-2025) ຕາມພາລະບົດບາດຂອງທັງສອງພາກສ່ວນໃຫ້ເກີດປະໂຫຍດສູງສຸດແກ່ການພັດທະນາຂອງ ນວ ກໍຄືປະເທດຊາດ.

ຂອບເຂດການຮ່ວມມືຄັ້ງນີ້ມີ 4 ໂຄງການຄື: ໂຄງການສ້າງຄວາມເຂັ້ມແຂງໃຫ້ແກ່ພະນັກງານວິຊາການໃນການຮັບຄໍາຮ້ອງຂໍຈົດທະບຽນແບບອຸດສາຫະກຳ ເຄື່ອງໝາຍການຄ້າ ແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ຄຳສະເໜີແກ້ໄຂຂໍ້ຂັດແຍ່ງທາງດ້ານຊັບສິນທາງປັນຍາ ໂຄງການກໍ່ສ້າງລະບົບການຄ້າຜ່ານທາງເອເລັກໂຕຣນິກ (E-Commerce) ສໍາລັບສິນຄ້າກະສິກໍາລາວ ໂຄງການສ້າງຂີດຄວາມສາມາດໃຫ້ແກ່ວຽກງານການຄ້າພາຍໃນ ໂຄງການສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ການຄຸ້ມ ຄອງ ແລະ ພັດທະນານິຄົມອຸດສາຫະກຳຢູ່ ນວ.