ກ້າວເຂົ້າສູ່ລະດູຝົນ ຖະໜົນຫົນທາງ ຢູ່ນະຄອນຫລວງວຽງຈັນ ກໍເລີ່ມເປ່ເພ ເປັນບວກຂຸມໃຫ້ເຫັນ
ໂດຍ: ຜາຕຸງ
ໄລຍະນີ້ແມ່ນຕົ້ນລະດູຝົນ ເຊິ່ງເປັນໄລຍະປ່ຽນຜ່ານລະດູການຕາມທຳມະຊາດຄືດັ່ງທຸກໆປີທີ່ຜ່ານມາ ນັ້ນໝາຍຄວາມວ່າ ສະພາບການໄປມາໄລຍະນີ້ ອາດມີຄວາມຫຍຸ້ງຍາກຍ້ອນບາງເສັ້ນທາງເປ່ເພ ຕ້ອງໄດ້ລະມັດລະວັງໃນການຂັບຂີ່, ມີສະຕິເປັນເຈົ້າໃນການໃຊ້ບົດໃຊ້ຖະໜົນ, ຄ່ອຍໄປຄ່ອຍມາ ທັງນີ້ກໍເພື່ອຫລີກລ່ຽງການເກີດອຸບັດເຫດກັບຕົນເອງ ແລະ ຄູ່ຮ່ວມການສັນຈອນ.
ປັດໄຈພື້ນຖານຂອງການສັນຈອນທີ່ທີ່ມີຄວາມປອດ ນອກຈາກການເອົາໃຈໃສ່ຕໍ່ກົດລະບຽບຈະລາຈອນແລ້ວ ເສັ້ນທາງການສັນຈອນກໍຕ້ອງດີ, ບໍ່ເປັນບວກຂຸມ ຫລື ເປ່ເພຈົນເປັນໄພແກ່ຜູ້ໃຊ້ລົດໃຊ້ຖະໜົນ ແຕ່ເມື່ອມາເບິ່ງຄວາມເປັນຈິງຢູ່ບ້ານເຮົາແລ້ວຍັງເຫັນວ່າ ບາງເສັ້ນທາງພໍແຕ່ໂປໂລເຂົ້າສູ່ລະດູຝົນ ກໍມັກຈະປາກົດເຫັນມີນ້ຳຫົ້ງນ້ຳຂັງ, ທາງເມື່ອຖືກແຊ່ນ້ຳ ລົດລາງພາຫະນະທັງເບົາ ແລະ ລົດໜັກທຽວຢູ່ຕະຫຼອດເວລາ, ເຈົ້າພາຂ້ອຍໂຕນ ຂ້ອຍພາເຈົ້າຢຽບ ໜ້ອຍບໍ່ນານກໍ່ເຮັດໃຫ້ຂຸມນ້ອຍໆກາຍເປັນຂຸມໃຫຍ່ ແລະ ຍາກຕໍ່ການທີ່ຈະສ້ອມແປງຄືນ ທັງມີຄວາມສ່ຽງຕໍ່ການເກີດອຸບັດເຫດນຳອີກ.
ວັນພຸດຜ່ານມານີ້ ປະຊາຊົນໄດ້ສ່ອງແສງມາວ່າ ເສັ້ນທາງຈາກຫ້າແຍກ ຜ່ານໜ້າຂົວຫຼວງ ອອກສູ່ໄຟແດງຈະຂ້າມໄປໂຮງຮູບເງົາ ໂອດຽນຣາມາເກົ່າ ມີສະພາບເປັນບວກຂຸມອ່າວໃຫຍ່ ແລະ ເລິກພໍສົມຄວນ ຈຸດດັ່ງກ່າວເປັນບ່ອນລໍຖ້າໄຟສັນຍານຈາລະຈອນ, ທາງກໍອ່າວຄັບແຄບຢູ່ແລ້ວ ຍັງເຮັດໃຫ້ການທຽວທາງທັງລົດນ້ອຍ ແລະລົດໃຫຍ່ມີຄວາມຫຍຸ້ງຍາກສັບສົນໂດຍທີ່ບໍ່ມີຜູ້ຂັບຂີ່ລົດຄັນໃດກ້າໂຕນຂຸມນັ້ນເລີຍ, ເມື່ອກ່ອນທາງເສັ້ນນີ້ ຢູ່ຈຸດນີ້້ເປັນພຽງຂຸມນ້ອຍໆເທົ່ານັ້ນ ແຕ່ພາຍຫຼັງທີ່ມີຝົນຕົກລົງມາເຮັດໃຫ້ມີນ້ຳຫົ້ງນ້ຳຂັງ ລົດທີ່ທຽວໄປມາ (ລົດໃຫຍ່) ຫຼາຍຄັນໄດ້ພາກັນໂຕນລົງຂຸມນັ້ນ ຈາກວັນການເປັນເດືອນ, ສອງເດືອນ ເຮັດໃຫ້ຂຸມນ້ອຍກາຍມາເປັນຂຸມໃຫຍ່ຢ່າງໄວວາ ເຊິ່ງປັດຈຸບັນນີ້ຍັງຖືກປ່ອຍປະໃຫ້ເປັນບັນຫາຂອງຄົນທຽວທາງຢູ່ເຊັ່ນເດີມ.
ດັ່ງນັ້ນ, ຈຶ່ງຮຽກຮ້ອງໃຫ້ພາກສ່ວນກ່ຽວຂ້ອງຮີບຮ້ອນລົງແກ້ໄຂໂດຍໄວ ຫຼືວ່າເພິ່ນອາດມີແຜນການທີ່ຈະສ້ອມແປງໄວ້ແລ້ວ ຫຼື ວ່າຍັງລໍຖ້າຄຳຊີ້ນຳຢູ່ ກໍ່ອາດເປັນໄດ້ ທັງນີ້ກໍເພື່ອໃຫ້ການສັນຈອນໄປມາສະດວກຂຶ້ນ, ຫລຸດຜ່ອນອຸບັດເຫດທີ່ຈະເກີດຂຶ້ນ ຖ້າຫາກປ່ອຍປະໄປດົນມັນອາດຈະກາຍເປັນບັນຫາ ທີ່ຈະແກ້ໄຂຍາກ ແລະ ໃຊ້ງົບປະມານຈຳນວນຫລາຍກໍເປັນໄດ້.
