ສວສ ສືບຕໍ່ຄົ້ນຄວ້າເນື້ອໃນປຶ້ມວັດຈະນານຸກົມພາສາລາວ ສະບັບແຫ່ງຊາດ ໃຫ້ສຳເລັດສົມບູນ

ການຈັດກອງປະຊຸມຄັ້ງນີ້, ແມ່ນເພື່ອລາຍງານຄວາມຄືບໜ້າໃນການຂຽນຮຽບຮຽງ, ນໍາສະເໜີປະເດັນບັນຫາ, ຂໍ້ສົນໃຈ ແລະ ຂໍ້ສະເໜີຕ່າງໆ ກ່ຽວກັບການຮຽບຮຽງເນື້ອໃນປຶ້ມວັດຈະນານຸກົມຕາມຄວາມຮັບຜິດຊອບ; ສົນທະນາ, ປຶກສາຫາລື ແລະ ແລກປ່ຽນຄຳຕິດເຫັນຕໍ່ປະເດັນບັນຫາທີ່ມີ; ສືບຕໍ່ຂຽນຮຽບຮຽງເນື້ອໃນປຶ້ມວັດຈະນານຸກົມພາສາລາວ.

ໃນກອງປະຊຸມ, ທ່ານ ປອ ອ່ອນແກ້ວ ນວນນະວົງ ຫົວໜ້າອະນຸກຳມະການຄົ້ນຄວ້າພາສາລາວ ໄດ້ກ່າວໃຫ້ຮູ້ວ່າ: ກອງປະຊຸມຄັ້ງນີ້ ຖືເປັນວາລະດີໃນການເຕົ້າໂຮມຄະນະຂຽນ ຮຽບຮຽງປຶ້ມວັດຈະນານຸກົມພາສາລາວແບບເຕັມຄະນະ ໂດຍແບ່ງເນື້ອໃນການປະຊຸມອອກເປັນ 2 ວາລະ ຄື:

1) ສົນທະນາແລກປ່ຽນກ່ຽວກັບຜົນສຳເລັດຄວາມຄືບໜ້າ ພ້ອມທັງປຶກສາຫາລືກ່ຽວກັບບາງບັນຫາ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ເພື່ອພ້ອມກັນຫາວິທີທາງແກ້ໄຂໃຫ້ສອດຄ່ອງກັບການຈັດຕັ້ງປະຕິບັດວຽກງານການຮຽບຮຽງເນື້ອໃນປຶ້ມວັດຈະນານຸກົມພາສາລາວຕົວຈິງໃນປັດຈຸບັນ ແລະ ຕໍ່ໜ້າ ແລະ ເພື່ອຄວາມເປັນເອກະພາບທາງດ້ານຫຼັກການ;

2) ສືບຕໍ່ຂຽນເນື້ອໃນເປັນລາຍບຸກຄົນຕາມຄວາມຮັບຜິດຊອບ.

ພ້ອມກັນນີ້, ທ່ານ ຫົວໜ້າອະນຸກຳມະການຄົ້ນຄວ້າພາສາລາວ ຍັງໄດ້ຊີ້ໃຫ້ເຫັນເຖິງເປົ້າໝາຍໃນການຈັດກອງປະຊຸມ ແມ່ນເພື່ອໃຫ້ໄດ້ປຶ້ມວັດຈະນານຸກົມທີ່ມີລັກສະນະສຳຄັນ 3 ປະການ ຄື: ລັກສະນະຄົບຖ້ວນທາງດ້ານຄຳສັບທີ່ພຽງພໍ ໂດຍລວມເອົາຄຳທຸກປະເພດ ເຊັ່ນ: ຄຳເຄົ້າ, ຄຳປະສົມ, ຄຳຊ້ອນ; ມີຄວາມສົມບູນທາງດ້ານການຮຽບຮຽງຄຳສັບ, ການໃຫ້ຄຳນິຍາມຄວາມໝາຍຕ້ອງມີຄວາມຊັດເຈນ, ກະທັດຮັດເຂົ້າໃຈງ່າຍ; ທັນສະໄໝທາງດ້ານຮູບແບບປຶ້ມ, ການອອກແບບການຈັດໜ້າ.

ໂອກາດລົງຢ້ຽມຢາມໃນຄັ້ງນີ້, ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ໃນໄລຍະຜ່ານມາ ການຄົ້ນຄວ້າຮຽບຮຽງປຶ້ມວັດຈະນານຸກົມພາສາລາວ ແມ່ນດຳເນີນການໂດຍຄະນະນ້ອຍ ເປັນຜົນງານຂອງບຸກຄົນ, ການຂຽນ ຮຽບຮຽງປຶ້ມວັດຈະນານຸກົມພາສາລາວຊຸດນີ້ຖືເປັນວຽກງານສຳຄັນຄັ້ງປະຫວັດສາດທີ່ດຳເນີນການເປັນຄະນະໃຫຍ່ທີ່ມີສ່ວນຮ່ວມຈາກຫຼາຍພາກສ່ວນ ມີລັກສະນະແບບເປີດກວ້າງ ຄວາມຄາດຫວັງຈຶ່ງມີສູງ ເພື່ອໃຫ້ໄດ້ຮັບຜົນສຳເລັດທີ່ຮອບດ້ານ. ນອກຈາກນັ້ນ, ທ່ານຍັງໃຫ້ທິດຊີ້ນໍາຕໍ່ຄະນະຂຽນ ຮຽບຮຽງປຶ້ມວັດຈະນານຸກົມພາສາລາວຊຸດນີ້ ໂດຍໃຫ້ເອົາໃຈໃສ່ບາງປະເດັນສຳຄັນ ເປັນຕົ້ນແມ່ນ ຮຽກຮ້ອງໃຫ້ຄະນະຂຽນເກັບກຳລວບລວມເອກະສານຕ່າງໆປະກອບການຂຽນໃຫ້ຫຼາກຫຼາຍຕື່ມຈາກແຫຼ່ງຂໍ້ມູນຫຼາຍພາສາ ເພື່ອເຮັດໃຫ້ການໃຫ້ຄວາມໝາຍຄຳມີຄວາມຊັດເຈນສົມບູນ; ການກຳນົດບັນຈຸຄຳສັບທີ່ຈະໃສ່ໃນວັດຈະນານຸກົມຕ້ອງມີຄົບຖ້ວນ ແລະ ຫຼາກຫຼາຍຕາມຄວາມຕ້ອງການໃນການນໍາໃຊ້ຂອງສັງຄົມປັດຈຸບັນ ໂດຍຍຶດໃຫ້ມີລັກສະນະຊາດ, ມະຫາຊົນ, ທັນສະໄໝ ແລະ ໃຫ້ຄວາມສໍາຄັນກັບຄ່ານິຍົມທີ່ບໍ່ແມ່ນແບບຊອດກະຈາ ແຕ່ເປັນຄ່ານິຍົມຂອງຄົນລາວແທ້; ຄຳສັບເກົ່າເຖິງແມ່ນວ່າຈະບໍ່ໄດ້ໃຊ້ຫຼາຍ ກໍຄວນຮັກສາໄວ້ບໍ່ໃຫ້ສູນຫາຍໄປ ຖືເປັນມໍລະດົກໃຫ້ລູກຫຼານໄດ້ຮັບຮູ້; ຄຳສັບທີ່ມີການປ່ຽນແປງຕາມຍຸກສະໄໝ ຄໍາສັບໃໝ່ທີ່ມາຈາກຕ່າງປະເທດ, ຄຳຍືມ, ພາສາເວົ້າ, ພາສາຂຽນ; ວຽກງານການສ້າງປຶ້ມວັດຈະນານຸກົມພາສາລາວນີ້ ຖືເປັນວຽກສໍາຄັນລະດັບຊາດ ເປັນຄວາມຄາດຫວັງຂອງລັດຖະບານ ຈຶ່ງຮຽກຮ້ອງໃຫ້ຄະນະຮັບຜິດຊອບທຸກທ່ານສັບຊ້ອນເວລາໃນການສືບຕໍ່ວຽກງານໃຫ້ສຳເລັດ ບຸກບືນວາງແຜນກວດຜ່ານ, ກວດແກ້ ແລະ ໃຫ້ສຳເລັດທັນຕາມແຜນໃນປີ 2025 ນີ້.

ນອກຈາກນີ້, ທ່ານ ລັດຖະມົນຕີ ສສກ ຍັງເນັ້ນຕື່ມວ່າ: ວັດຈະນານຸກົມພາສາລາວນີ້ ນອກຈາກຈະສ້າງເປັນປຶ້ມສຳເລັດແລ້ວ ກໍໃຫ້ຄົ້ນຄວ້າເຜີຍແຜ່ດ້ວຍຮູບແບບຟາຍເອເລັກໂຕຣນິກຕື່ມ ເພື່ອໃຫ້ຄົນລາວທີ່ຢູ່ທົ່ວທຸກບ່ອນຂອງໂລກສາມາດເຂົ້າເຖິງຮັບຮູ້ ແລະ ນຳໃຊ້ພາສາລາວໄດ້ຢ່າງຖືກຕ້ອງ ຫຼີກລ່ຽງຂໍ້ຂັດແຍ້ງທາງພາສາດ້ວຍຫຼັກການທີ່ເປັນເອກະພາບ ແລະ ເປັນທີ່ຍອມຮັບກັນ.

ຜ່ານການດຳເນີນກອງປະຊຸມຄັ້ງນີ້, ຄະນະຮຽບຮຽງສາມາດສຳເລັດການຂຽນເນື້ອໃນປຶ້ມວັດຈະນານຸກົມພາສາລາວສະບັບພື້ນຖານ ທັງໝົດໂດຍລວມ ໄດ້ 85%, ຊຶ່ງຫາກສໍາເລັດການຂຽນເນື້ອໃນເບື້ອງຕົ້ນທັງໝົດແລ້ວ ຈະໄດ້ນຳມາກວດຜ່ານພາຍໃນຄະນະນ້ອຍ ແລະ ຄະນະໃຫຍ່ໃນຕໍ່ໜ້າຕື່ມ.