ແຝງໂຕເຂົ້າມາເປັນກຳມະກອນຂັບລົດ ເຮັດໃຫ້ຫົວໜ້າເຊື່ອໃຈ ຈຶ່ງລົງມືກໍ່ເຫດລັກຄຳ 4 ບາດ ພ້ອມເງິນຫລາຍກວ່າ 11 ລ້ານກີບ
ທ່ານ ພັຕ ເພັດສົມພົງ ທຳມະວົງ ຫົວໜ້າໜ່ວຍງານສືບສວນ-ສອບສວນຄະດີອາຍາ-ເສດຖະກິດ ເມືອງປາກງື່ມໃຫ້ຮູ້ວ່າ: ວັນທີ 4-5 ມິຖຸນາ 2023 ເຈົ້າໜ້າທີ່ຕຳຫລວດໄດ້ຮັບແຈ້ງຈາກປະຊາຊົນບ້ານໂຊກຄຳ ເມືອງໄຊທານີ ນະຄອນຫລວງວຽງຈັນ ວ່າມີຄົນຮ້າຍເຂົ້າມາລັກຊັບ ປະເພດ ສາຍແຂນ 1 ເສັ້ນ, ສາຍຄໍ 1 ເສັ້ນ ລວມ 4 ບາດ ພ້ອມເງິນ 11 ລ້ານກີບ.
ວັນທີ 6 ມິຖຸນາ 2023 ເຈົ້າໜ້າທີ່ສາມາດກັກຕົວຜູ້ກໍ່ເຫດໄດ້, ຜ່ານການສືບສວນສອບສວນຜູ້ກ່ຽວຮັບສາລະພາບວ່າ: ຕົນເອງມາຮັບຈ້າງຂັບລົດຢູ່ຮ້ານຂອງຜູ້ເສຍຫາຍ, ໂດຍໃຊ້ການໄວ້ເນື້ອເຊື່ອໃຈຂອງຜູ້ເສຍຫາຍ ແລະ ໄດ້ສ້າງເຫດການວ່າມີຄົນຮ້າຍພະຍາຍາມຈະເຂົ້າມາລັກເຄື່ອງແຕ່ບໍ່ສຳເລັດ ພໍຮຸ່ງເຊົ້າຂຶ້ນມາຕົນເອງຈຶ່ງໄດ້ເອົາຕົວຫລົບໜີຈາກສະຖານທີ່ດັ່ງກ່າວພ້ອມເຄື່ອງຂອງຈຳນວນໜຶ່ງ ແລະ ໃນວັນດຽວກັນເຈົ້າໜ້າທີ່ ປກສ ເມືອງປາກງື່ມ ໄດ້ເຂົ້າກັກຕົວ ທ້າວ ຄອນສະຫວັນ ຫລື ເອັມ ອາຍຸ 34 ປີ ບ້ານເຫລົ່າໂພໄຊ ເມືອງທ່າແຂກ ແຂວງຄຳມ່ວນ ໃນຂໍ້ຫາລັກຊັບພົນລະເມືອງພ້ອມຂອງກາງເງິນສົດ 8.300.000 ກີບ, ເງິນບາດ 3.100 ບາດ ແລະ ວັດຖຸຄ້າຍຄືຄຳ ສາຍແຂນ 1 ເສັ້ນ, ສາຍຄໍ 1 ເສັ້ນ.
ປັດຈຸບັນເຈົ້າໜ້າທີ່ໄດ້ນຳເອົາເຄື່ອງຂອງທີ່ເກັບກູ້ມາໄດ້ຄືນໃຫ້ເຈົ້າຂອງ, ສ່ວນຄົນຮ້າຍ ແມ່ນເຈົ້າໜ້າທີ່ກັກຕົວໄວ້ເພື່ອສືບສວນສອບສວນ ເພື່ອດຳເນີນການຕາມລະບຽບກົດໝາຍ.
