ເຈົ້າໜ້າທີ່ກວດກາການຄ້າ ແຂວງຈຳປາສັກ ກວດພົບເຄື່ອງດື່ມນຳເຂົ້າບໍ່ຖືກຕ້ອງ 695 ແກັດ ລວມມູນຄ່າຫລາຍກວ່າ 55 ລ້ານກີບ
ວັນທີ 15 ມິຖຸນາ 2023, ເຈົ້າໜ້າທີ່ກວດກາການຄ້າ ຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າແຂວງຈໍາປາສັກ, ນໍາໂດຍທ່ານ ໄກ່ທອງ ສຸວັນນາດີ ຮອງຫົວໜ້າຂະແໜງການຄ້າພພາຍໃນ ສົມທົບກັບ ຄະນະພັກ-ອົງການປົກຄອງບ້ານສາງນໍ້າມັນ ນະຄອນປາກເຊ ເຄື່ອນໄຫວກວດກາສິນຄ້າ ປະເພດເຄື່ອງດື່ມ ທີ່ນໍາເຂົ້າບໍ່ຖືກຕ້ອງຢູ່ບ້ານດັ່ງກ່າວ.
ການເຄື່ອນໄຫວຄັ້ງນີ້ໄດ້ກວດກາ 3 ຮ້ານ, ໃນນັ້ນ ຮ້ານຄົນຫວຽດນາມ(ແບບເຊົ່າເຮືອນຄົນລາວ ແລ້ວປະກອບອາຊີບຄ້າຂາຍ) 2 ຮ້ານ; ຮ້ານຄົນລາວ 1 ຮ້ານ ເຊິ່ງເປັນຮ້ານຈໍາໜ່າຍ, ຂາຍຍົກ ແລະ ຂາຍຍ່ອຍ. ຜ່ານການກວດກາຕົວຈິງພົບເຫັນສິນຄ້າ ເຄື່ອງດື່ມ ປະເພດ ເບຍ ຍີ່ຫໍ້ເບຍ ຄາເມວ (CAMEL) 189 ແກັດ, ເບຍຊາໂກຕ້າ (SAGOTA) 209 ແກັດ ແລະ ເບຍຊາວລາ (SAOLA) 297 ແກັດ ລວມທັງໝົດ 695 ແກັດ ຄິດເປັນມູນຄ່າ 55.965.000 ກີບ ເຊິ່ງພົບຢູ່ 2 ຮ້ານຂອງຄົນຫວຽດນາມ. ດັ່ງນັ້ນ, ເຈົ້າໜ້າທີ່ໄດ້ກວດກາດ້ານເອກະສານ ເຫັນວ່າ 2 ຮ້ານດັ່ງກ່າວ ບໍ່ມີທະບຽນໃນການດໍາເນີນທຸລະກິດ, ເບຍທີ່ນໍາເຂົ້າມາຈໍາໜ່າຍ ກໍ່ບໍ່ຖືກຕ້ອງ, ບໍ່ເຫັນເອກະສານຢັ້ງຢືນການນໍາເຂົ້າ, ບໍ່ຕິດສະແຕັມເສຍພາສີ ແລະ ບໍ່ມີສະຫລາກເປັນພາສາລາວ. ເຈົ້າໜ້າທີ່ ຈຶ່ງກັກຢຶດຊົ່ວຄາວ ພ້ອມທັງໃຫ້ຜູ້ເປັນເຈົ້າຂອງນໍາເອກະສານທີ່ກ່ຽວຂ້ອງມາຢັ້ງຢືນເອົາສິນຄ້າ ພາຍໃນ 7 ວັນ. ຖ້າກາຍກໍານົດ ແມ່ນສະຫລະສິດ.
ສ່ວນຮ້ານຈຳໜ່າຍຂາຍຍົກ ແລະ ຂາຍຍ່ອຍທີ່ ເປັນຂອງຄົນລາວ ເຫັນວ່າມີທະບຽນວິສາຫະກິດຖືກຕ້ອງຕາມລະບຽບການ, ແຕ່ຜ່ານມາເຄີຍນໍາເຄື່ອງດື່ມ ປະເພດເບຍ ເຂົ້າມາຈໍາໜ່າຍ ໂດຍທີ່ບໍ່ໄດ້ຕິດສະແຕັມພາສີ. ແຕ່ປັດຈຸບັນໄດ້ຈໍາໜາຍໝົດແລ້ວ ເຊິ່ງເຈົ້າໜ້າທີ່ ກໍໄດ້ແນະນໍາຕື່ມ ຕໍ່ໄປຖ້າຈະນໍາເຂົ້າມາຈໍາໜ່າຍ ກໍຂໍໃຫ້ຕິດສະແຕັມພາສີ ແບບຖືກຕ້ອງ ເພື່ອປະກອບສ່ວນພັນທະໃຫ້ແກ່ລັດ ທັງບໍ່ເປັນການເອົາປຽບຜູ້ປະກອບການທີ່ດໍາເນີນທຸລະກິດຖືກຕ້ອງຕາມລະບຽບກົດໝາຍ.
ຂ່າວ: ໜັງສືພິມຈຳປາໃໝ່
