ສື່ເຜີຍແມນຢູ ຍັງບໍ່ປະກາດວ່າໃຜ ຈະໄດ້ເປັນເຈົ້າຂອງທີມລາຍໃໝ່ ຈົນກວ່າຈະເຖິງລະດູການໜ້າ
ເຖິງວ່າຈະມີກະແສຂ່າວວ່າ ແມນເຊັສເຕີ ຢູໄນເຕັດ ກໍາລັງຈະໄດ້ເຈົ້າຂອງຄົນໃໝ່ເຂົ້າມາຄອບຄອງກິດຈະການ ແຕ່ລາຍງານຈາກສື່ຕ່າງໆລະບຸວ່າ ຍອດທີມຊັ້ນນຳຂອງເມືອງແມນເຊັສເຕີ. ຈະຍັງບໍ່ຖືກປະກາດເລື່ອງນີ້ຈົນກ່ວາຈະເຖິງການແຂ່ງຂັນໃນລະດູການຕໍ່ໄປ.
ກ່ອນໜ້ານີ້ ຣອຍເຕີ ລວມທັງ ຣີໂອ ເຟີດີນັນ ຕຳນານກອງຫລັງຂອງ ແມນເຊສເຕີ ຢູໄນເຕັດ ລາຍງານວ່າ ການເຈລະຈາເລື່ອງການຊື້ຂາຍສະໂມສອນ “ຜີສາດແດງ” ໃກ້ຈະໄດ້ຂໍ້ສະຫລຸບແລ້ວ. ແລະ ເຜີຍວ່າທ່ານ ຊີກ ຢາດຊິມ ບິນຮາມານ ຂອງ ກາຕ້າ ແມ່ນຜູ້ທີ່ຈະເຂົ້າມາຄອບຄອງກິດຈະການຢູ່ທີ່ ໂອລ ແທຣັບຟອດ.
ໃນຂະນະນັ້ນ, ມີເອກະສານຂອງລັດຖະບານອັງກິດສະແດງໃຫ້ເຫັນວ່າບໍລິສັດ Nine Two UK Holdings Limited ພາຍໃຕ້ການຄຸ້ມຄອງຂອງ ຊີກ ກາຕ້າ. ໄດ້ຮັບການຈົດທະບຽນ ແລະ ສ້າງຕັ້ງບໍລິສັດໃນປະເທດອັງກິດສໍາເລັດແລ້ວ. ເປັນສັນຍານວ່າລາວຈະໄດ້ເປັນເຈົ້າຄົນໃຫມ່ຂອງທີມໃນໄວໆນີ້.
ຢ່າງໃດກໍ່ຕາມ, ໜັງສືພິມ The Times ແລະ Goal ໄດ້ໃຫ້ລາຍລະອຽດວ່າ ແມນເຊັສເຕີ ຢູໄນເຕັດ ເຊິ່ງປັດຈຸບັນຢູ່ພາຍໃຕ້ການເບິ່ງແຍງຂອງຄອບຄົວ ເກລເຊີ້ ຈະຍັງບໍ່ທັນມີການປະກາດວ່າໃຜຈະເປັນເຈົ້າຂອງໃຫມ່. ຈົນກ່ວາລະດູບານເຕະອັງກິດ 2023/24 ຈະເລີ່ມຕົ້ນໃນວັນທີ 12 ເດືອນສິງຫາ.
