ແຂວງບໍ່ແກ້ວ ສຸມໃສ່ການຜະລິດພືດສະບຽງອາຫານເພື່ອສະໜອງພາຍໃນ ໂດຍສະເພາະປູກຜັກເຮືອນຮົ່ມ ສົ່ງໃຫ້ຕະຫຼາດໃນເທສະບານ

ທ່ານ  ຄຳຜະຫຍາຍ ພົມປັນຍາ  ຄະນະປະຈໍາພັກແຂວງ  ຮອງເຈົ້າແຂວງ ແຂວງ ບໍ່ແກ້ວ ຜູ້ຊີ້ນຳວຽກງານວັດທະນະທຳ-ສັງຄົມ ໄດ້ລາຍງານການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ 2021-2023  ລາຍງານ ຕໍ່ກອງປະຊຸມຄົບຄະນະບໍລິຫານງານພັກແຂວງ ກາງສະໄໝ ໃນ ວັນທີ 13 ມີຖຸນາ 2023 ຜ່ານມາ.

ການແກ້ໄຂຄວາມຫຍຸ້ງຍາກເສດຖະກິດ-ການເງິນນັບແຕ່ປີ 2021 ເຖິງປັດຈຸບັນ ແມ່ນໄດ້ເອົາໃຈໃສ່ໃນການສົ່ງເສີມການຜະລິດ-ການບໍລິການ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ ໂດຍນຳໃຊ້ກາລະໂອກາດ ແລະ ທ່າແຮງບົ່ມຊ້ອນຂອງແຂວງ ເພື່ອສ້າງລາຍຮັບທີ່ເຂັ້ມແຂງ-ຍືນຍົງ. ການປັບປຸງສະພາບແວດລ້ອມ ແລະ ແກ້ໄຂຄວາມຫຍຸ້ງຍາກຂອງການດຳເນີນທຸລະກິດເກັບກໍາຂໍ້ມູນ ແລະ ປະເມີນຄືນບັນດາໂຄງການລົງທຶນຂອງເອກະຊົນພາຍໃນ ແລະ ຕ່າງປະເທດຈຳນວນ 86 ໂຄງການ ທີ່ໄດ້ຮັບການອະນຸມັດຖືກຕ້ອງຕາມກົດໝາຍ ທັງໄດ້ດັດແກ້ສັນຍາ ແລະ ເຊັນລົງນາມຮ່ວມກັບຜູ້ລົງທຶນຄືນໃໝ່ ເພື່ອສະໜອງຂໍ້ມູນໃຫ້ສວຍສາອາກອນ; ປະສານສົມທົບກັບບັນດາບໍລິສັດທີ່ລົງທຶນໃນກິດຈະການສໍາປະທານ ຈໍານວນ 38 ໂຄງການ ສ້າງສັນຍາສໍາປະທານໃຫ້ຖືກຕ້ອງຕາມລະບຽບກົດໝາຍ. ຊຸກຍູ້ ແລະ ສົ່ງເສີມການຜະລິດກະສິກຳເປັນສິນຄ້າເພື່ອທົດແທນການນຳເຂົ້າ ແລະ ສົ່ງອອກ: ໄດ້ຂະຫຍາຍຖານການຜະລິດພາຍໃນໂດຍສະເພາະການຜະລິດກະສິກຳ (ການປູກ-ການລ້ຽງ) ແລະ ການປຸງແຕ່ງທີ່ເປັນທ່າແຮງເພື່ອທົດແທນການນຳເຂົ້າ ແລະ ຂະຫຍາຍຖານການຜະລິດສົ່ງອອກຫຼາຍຂຶ້ນ ສາມາດປະຕິບັດໄດ້ 51,81 ລ້ານໂດລາສະຫະລັດ.ໄດ້ສຸມໃສ່ການຜະລິດພືດສະບຽງອາຫານສະໜອງພາຍໃນ, ສ້າງຕັ້ງກຸ່ມປູກຜັກຢູ່ເມືອງຫ້ວຍຊາຍມີ 8 ກຸ່ມ  ແລະ ເມືອງຕົ້ນເຜີ້ງ ມີ 2 ກຸ່ມ ອັນພົ້ນເດັ່ນແມ່ນ ຜູ້ປະກອບການຈາກ (ຈີນ) ປູກພືດຜັກເຮືອນຮົ່ມ ເພື່ອສະໜອງຕະຫຼາດສາມຫຼ່ຽມຄຳ ແລະ ເທສະບານໃນເນື້ອທີ່ 16 ຮຕ ຜົນຜະລິດສະໜອງໄດ້ 54,4 ໂຕນ, ຊຸກຍູ້ບັນດາເມືອງການຜະລິດຢາງພາລາສົ່ງອອກໄດ້ 40.766 ໂຕນ. ຄິດເປັນເງິນ 285,36 ຕື້ກວ່າກີບ; ສ້າງຕັ້ງສະຫະກອນຜະລິດຊາ ເກັບກູ້ຜົນຜະລິດຊາໄດ້ 7,83 ໂຕນ (ປຸງແຕ່ງສົ່ງອອກ 1,54 ໂຕນ); ໄດ້ຊຸກຍູ້ໃຫ້ຜູ້ປະກອບການລົງທຶນປູກຫຍ້າລ້ຽງສັດປະເພດຕ່າງໆແບບເປັນຟາມ.ໄດ້ສຸມໃສ່ພັດທະນາ MSME ເພື່ອຮັບປະກັນການສະໜອງສິນຄ້າພາຍໃນແຂວງ ໄດ້ຂຶ້ນທະບຽນໃຫ້ບັນດາຫົວໜ່ວຍທຸລະກິດທັງໝົດ 913 ຫົວໜ່ວຍ

ຊຸກຍູ້ ແລະ ສົ່ງເສີມບັນດາກິດຈະການຂຸດຄົ້ນ-ປຸງແຕ່ງຫີນໄດ້ 27.466 ແມັດກ້ອນຈໍາໜ່າຍອອກໄດ້ທັງໝົດ:34.415, ໄດ້ມອບພັນທະໃຫ້ແກ່ລັດ; 214.249.000 ກີບ ແລະ ຮັບຈາກແຍກເອົາ ແຮ່ທາດຕິດພັນ ລວມເປັນເງິນຊາຍອອກຈາກຫີນແຮ່ (ແຮ່ຄໍາ) ລວມເປັນເງິນ 8.164.034.400 ກີບ. ໄດ້ສຸມໃສ່ການພັດທະນາເສັ້ນທາງຄົມມະນາຄົມເພື່ອການບໍລິການຕາມແລວທາງເສດຖະກິດ: ການ ຂົນສົ່ງຜ່ານແມ່ນ້ຳຂອງຕອນເໜືອ ຜ່ານໄທ, ມຽນມາ ເຂົ້າຫາ ສປ ຈີນມີ 100.378 ໂຕນ; ຂົນສົ່ງສິນຄ້າພາຍໃນ: 11.800 ໂຕນ ບໍລິການຂົນສົ່ງໂດຍສານຫ້ວຍຊາຍ-ປາກແບງ-ຫຼວງພະບາງ ມີ  34.334 ຄົນ, ໃນນັ້ນ: ມີຄົນຕ່າງປະເທດ 31.925 ຄົນ;  ຂົນສົ່ງຜ່ານແດນ ດ້ວຍລົດຂົນສົ່ງບັນທຸກຫົວລາກຜ່ານແຂວງຫຼວງນ້ຳທາໄປຫາ ບໍ່ເຕນ ເສັ້ນທາງ R3A. ການແກ້ໄຂພາຫະນະທີ່ນໍາເຂົ້າ ແລະ ນໍາໃຊ້ແບບບໍ່ຖືກ ຕ້ອງໄດ້ທັງໝົດ 1.738  ຄັນ. ການເກັບລາຍຮັບເຂົ້າງົບປະມານໄດ້ 48.42 ຕື້ກີບ; ໄດ້ຂະຫຍາຍລະບົບຄຸ້ມຄອງເກັບລາຍຮັບ ສ່ວຍສາອາກອນແບບທັນສະໄໝ ຢູ່ບັນດາເມືອງ ແລະ ເຂດເສດຖະກິດພິເສດສາມຫຼ່ຽມຄໍາ; ຄຸ້ມຄອງ-ນຳໃຊ້ຊັບພະຍາກອນທຳມະຊາດຢ່າງປະຢັດ ແລະ ມີປະສິດທິຜົນ.