ອີຣັກເຕືອນອິດສະລາແອນເລື່ອງ ການສະໜັບສະໜູນເກີດິສຖານ
ລັດຖະບານອີຣັກປະກາດຈະບໍ່ມີທາງຍອມຮັບ “ລັດອິດສະລາແອນແຫ່ງທີສອງ”, ພາຍຫຼັງອິດສະລາແອນເປັນປະເທດດຽວໃນປັດຈຸບັນ ທີ່ສະໜັບສະໜູນການລົງປະຊາມະຕິແຍກເອກະລາດຂອງເຂດປົກຄອງຕົນເອງເກີດິສຖານ.
ສຳນັກຂ່າວຕ່າງປະເທດລາຍງານຈາກນະຄອນຫຼວງແບກແດດ ປະເທດອີຣັກ ໃນວັນທີ 18 ກັນຍາວ່າ: ທ່ານ ນູຣີ ອັດ ມາລິກີ ຮອງປະທານາທິບໍດີອີຣັກ ກ່າວພາຍຫລັງພົບປະຫາລືກັບທ່ານ ດັກລາສ ຊິລລິແມນ ເອກອັກຄະລັດຖະທູດອາເມລິກາ ຢູ່ທຳນຽບລັດຖະບານໃນນະຄອນຫຼວງແບກແດດ ວັນທີ 17 ກັນຍາວ່າ: ອີຣັກບໍ່ມີທາງອະນຸຍາດໃຫ້ເກີດການສະຖາປະນາຂອງ “ລັດອິດສະລາແອນແຫ່ງທີສອງ” ໃນພາກເໜືອຂອງປະເທດ ເຊິ່ງໝາຍເຖິງການລົງປະຊາມະຕິແຍກເອກະລາດຂອງເຂດປົກຄອງຕົນເອງເກີດິສຖານ ທີ່ຈະມີຂຶ້ນໃນວັນທີ 25 ກັນຍານີ້. ຂະນະດຽວກັນ, ການລົງປະຊາມະຕິຂອງຊາວເຄີດຈະຕາມມາເຊິ່ງຜົນກະທົບທີ່ອັນຕະລາຍຕໍ່ຄວາມໝັ້ນຄົງ, ອະທິປະໄຕ ແລະ ຄວາມເປັນເອກະລາດຂອງອີຣັກ, ພ້ອມທັງຮຽກຮ້ອງໃຫ້ລັດຖະບານເຄີດເຂົ້າຮ່ວມການເຈລະຈາກັບລັດຖະບານກາງໃນນະຄອນຫຼວງແບກແດດ.
